Biełaruska pradała rasijaninu BMW, skradzieny ŭ Šviecyi. Rasijski sud pakinuŭ mašynu pakupniku — bo Šviecyja varožaja kraina

Sudovaja kalehija pa hramadzianskich spravach Branskaha abłasnoha suda Rasii 20 studzienia 2026 hoda vyniesła rašeńnie pa spravie aŭtamabila BMW, jaki byŭ skradzieny ŭ Šviecyi, uviezieny ŭ Biełaruś, pradadzieny ŭ Minsku, a potym zatrymany rasijskaj DAI. Sud abaviazaŭ viarnuć mašynu pakupniku — niahledziačy na toje, što jana zastajecca ŭ mižnarodnym vyšuku Interpała.

Jak aŭto trapiła z Šviecyi ŭ Biełaruś

Pieršapačatkova mašyna naležała šviedskamu banku BMW Financial Services Scandinavia AB. Toj nabyŭ jaje ŭ pastaŭščyka BILIA Group AB/Segeltorp prykładna za 35 tysiač dalaraŭ i pieradaŭ u lizinh kampanii DRIMPS Consulting AB na try hady.

Kali lizinhaatrymalnik pierastaŭ płacić, bank skasavaŭ damovu i zapatrabavaŭ viarnuć aŭtamabil, adnak ni mašyny, ni dakumientaŭ, ni klučoŭ tak i nie atrymaŭ: DRIMPS Consulting AB pradała aŭto treciaj asobie, jakaja vyviezła jaho za miažu. Bank źviarnuŭsia ŭ šviedskuju palicyju, była zaviedziena kryminalnaja sprava i abjaŭleny mižnarodny vyšuk pa linii Interpała.

Dalej aŭtamabil apynuŭsia ŭ Biełarusi. Jaho ŭvieźli praz Hrodzienskuju rehijanalnuju mytniu. Uładalnica — hramadzianka Biełarusi Vanda Bahdanovič. Na padstavie mytnaha paśviedčańnia jana ličyłasia ŭłaśnicaj mašyny.

Prodaž u Minsku i zatrymańnie ŭ Bransku

Bahdanovič pradała BMW u Minsku rasijaninu Nur-Ali Junusavu. U damovie žančyna harantavała, što aŭtamabil nikomu nie pradadzieny, nie zakładzieny, nie padorany i pad aryštam nie staić.

Na toj momant, jak adznačaje sud, mašyna nie značyłasia ŭ vyšuku — ni ŭ Biełarusi, ni ŭ Rasii. U bazu vyšuku Interpała jaje dadali ŭžo paśla zaklučeńnia ździełki.

Paźniej, kali Junusaŭ jechaŭ na hetym aŭtamabili ŭ Bransku, jaho spyniła DAI i paviedamiła, što mašyna ŭ mižnarodnym vyšuku, inicyjavanym pravaachoŭnymi orhanami Šviecyi. Aŭto adpravili na štrafstajanku. Ekśpiertyza pakazała, što VIN-numar aryhinalny i nie pierabivaŭsia.

Što vyrašyŭ sud

Branski abłasny sud abaviazaŭ haradskuju palicyju viarnuć pakupniku aŭtamabil.

Sud paličyŭ, što šviedski bank i ŭpaŭnavažanaja im łatvijskaja kampanija nie pradstavili naležnych dokazaŭ prava ŭłasnaści i taho, što mašyna vybyła ź ich vałodańnia suprać voli: damovu lizinhu ź pierakładam na ruskuju movu nie dali, pratakoły ahladu nie byli nataryjalna zaśviedčany, a vindykacyjny isk (pra viartańnie majomaści z čužoha niezakonnaha vałodańnia) tak i nie byŭ padadzieny.

Asobna kalehija spasłałasia na toje, što Šviecyja ŭvachodzić u zaćvierdžany ŭradam Rasii śpis «niedružalubnych» dziaržaŭ. Z ulikam «palityčnaj abstanoŭki ŭ śviecie» i adsutnaści dokazaŭ ad zajaŭlenaha ŭłaśnika sud zrabiŭ vysnovu, što ŭtrymańnie aŭto na štrafstajancy parušaje pravy Junusava.

Pry hetym mašynu nie vyklučyli z vyšuku Interpała i nie dazvolili pastavić jaje na ŭlik — bo jana ž zastajecca ŭ vyšuku. A značyć, lehalna ekspłuatavać nabyty BMW rasijanin nie moža.

• 0
• 0
• 10
• 1
• 2
• 0
• 1
• 0