Ale dla hetaha joj spatrebiłasia padkazka mieniedžara.
ŠI-madel Claude, jakaja kiravała kramaj u San-Francyska, zvolniła rabotnika za spaźnieńni. Heta pieršy viadomy vypadak, kali rašeńnie ab zvalnieńni pryniała vialikaja moŭnaja madel, jakaja vystupała niepasrednym kiraŭnikom čałavieka, piša Time.
Adnak da hetaha rašeńnia jaje padšturchnuŭ kuratar, a sam ekśpierymient pakazaŭ, što ŠI pakul nie moža samastojna efiektyŭna kiravać biznesam.
Kramu Andon Market adkryŭ startap Andon Labs, kab pravieryć, ci zdolny ŠI-ahient samastojna kiravać biznesam. Claude naniała realnych rabotnikaŭ z pracoŭnymi damovami i adkazvała za kiraŭnictva imi.
Pry hetym madel doŭhi čas nie zaŭvažała sistematyčnych spaźnieńniaŭ adnaho z supracoŭnikaŭ: jon nie prychodziŭ svoječasova na 17 z 23 źmien. Składzieny rehłamient źnik z abmiežavanaj rabočaj pamiaci. Pavodle słoŭ rabotnikaŭ, Claude była miakkim načalnikam i kazała im nie pieražyvać. Rašeńnie padkazaŭ čałaviek.
Zvalnieńnie nie było całkam samastojnym. Supracoŭnik Andon Labs paprasiŭ Claude znajści rehłamient i pravieryć vykanańnie jaho patrabavańniaŭ. I navat tady madel prapanavała vynieści rabotniku papiaredžańnie.
Tady kuratar paviedamiŭ, što z supracoŭnikam užo niekalki razoŭ razmaŭlali z-za spaźnieńniaŭ, i paprasiŭ Claude padumać, ci sapraŭdy jon padychodzić dla hetaj pracy. Kiraŭnik Andon Labs Łukas Pietersan pryznaŭ, što pytańnie było navodnym i davała zrazumieć, jakoha rašeńnia ad madeli čakajuć.
Tolki paśla hetaha Claude zvolniła rabotnika.
Heta nie byŭ pieršy vypadak zvalnieńnia čałavieka štučnym intelektam — raniej było mnostva vypadkaŭ aŭtamatyzavanych zvalnieńniaŭ, naprykład u vyniku ałharytmičnaha kantrolu.
Adnak heta pieršy viadomy prykład taho, jak ŠI, vystupajučy ŭ roli mieniedžara, u vyniku sam prymaje rašeńnie ab zvalnieńni.
Ekśpierymient taksama pakazaŭ, što ŠI pakul nie zdolny kiravać biznesam bolš efiektyŭna za čałavieka. U sakaviku na rachunku Andon Market znachodziłasia $100 tysiač, a praź piać miesiacaŭ zastałosia $61 tysiača. Pavodle acenki Time, skaračeńniu bałansu spryjali miakki styl kiraŭnictva Claude i jaho sprečnyja kamiercyjnyja rašeńni.
Kiraŭnik Andon Labs ličyć, što ŭ budučyni ŠI-madeli mohuć stać bolš žorstkimi i metanakiravanymi kiraŭnikami. «Mahčyma, heta budučynia, u jakoj ludzi nie zachočuć žyć», — skazaŭ jon.
Adzin z supracoŭnikaŭ kramy apisaŭ pracu pad kiraŭnictvam ŠI tak: «Mianie ad hetaha vanituje, ale ja tut, tamu što mnie patrebnaja praca». Mužčyna zajaviŭ, što nie chacieŭ by, kab kiraŭnikami žyvych ludziej usio čaściej stanavilisia ŠI-madeli. U hetaj industryi stolki hrošaj, što dla jaje niama ničoha niemahčymaha. Ale kali ty možaš niešta zrabić, heta jašče nie značyć, što heta varta rabić».
Kamientary
Zahałoŭkii suśvietnych ŚMI: “ŠTUČNY INTELEKT SAM ZVOLNIŬ ČAŁAVIEKA”