«Zaŭsiody chočacca bolš». Jak traciać hrošy biełarusy z zarobkam 5—6 tysiač rubloŭ
5—6 tys. rubloŭ u miesiac — zarobak, ź jakim, zdajecca, u Biełarusi ŭžo možna nie zanadta ŭvažliva hladzieć na ceńniki. Ale ci aznačaje taki dachod, što pytańnie hrošaj uvohule pierastaje chvalavać? Vydańnie «Anłajnier» pahutaryła ź biełarusami, jakija zarablajuć ad 5 tysiač rubloŭ: daviedałasia, kudy iduć ich hrošy, kolki ŭdajecca adkładać i ci sapraŭdna vysoki zarobak robić žyćcio prykmietna bolš kamfortnym.
«U dzień zarobku kuplaju dołary — minimum tysiaču ŭ miesiac»
Alehu 31 hod, i amal tracinu žyćcia jon pravioŭ u prodažach: pačynaŭ jašče ŭ 20 hadoŭ zvyčajnym mieniedžaram, daros da kiraŭnika adździeła, a zaraz pracuje ŭ kansałtynhavaj kampanii i dapamahaje inšym biznesam vybudoŭvać prodažy i ŭnutranyja pracesy. I kali raniej jahony dachod trymaŭsia ŭ rajonie 2—3 tysiač. rubloŭ, to za apošni hod vyras da 5—6 tysiač.
Žyvie mužčyna ŭ Minsku z žonkaj i maleńkim dziciom va ŭłasnaj kvatery.
— Na dzicia, pa sutnaści, iduć dekretnyja žonki — prykładna 1 tysiača rubloŭ u miesiac. Na našaje z žonkaj žyćcio my zakładajem dzieści 1,7—2 tys. rubloŭ u miesiac. Jašče kala 350 rubloŭ tracim na kamunalnyja płaciažy. Vychodzić, hruba kažučy, na asnoŭnyja patreby siamji z majho zarobku idzie trochi mienš za 2,5 tysiačy rubloŭ.
Samy vialiki artykuł raschodaŭ u nas — pradukty. Na ich možam patracić 800 rubloŭ, možam 1000. Siudy ž dadajem zvyčajnyja bytavyja rečy: paraški, kandycyjaniery, paścielnuju bializnu, navałački, časam niejki posud. Heta nie tyja kupli, jakija mocna bjuć pa biudžecie, ale jany jość pastajanna.
Adzieńnie taksama kuplajem z hetych hrošaj. Kali razumiejem, što chutka spatrebicca niešta bujnoje — naprykład, palito, puchavik abo abutak za 300, 500, 800 rubloŭ, — starajemsia padrychtavacca zahadzia. Možam dva miesiacy adkładać pa 200—300 rubloŭ, naźbirać 400—600 i ŭžo spakojna kupić patrebnuju reč. Mnie ŭvohule psichałahična praściej, kali ja viedaju pra vydatki zahadzia.
Sa sportam raniej taksama byŭ asobny artykuł — prykładna 200 rubloŭ u miesiac na dvaich. Ale apošnim časam ja arhanizavaŭ sabie sportzału prosta ŭ ofisie, tamu kankretna dla mianie hety vydatak adpaŭ.
Usio, što zastajecca paśla abaviazkovych vydatkaŭ, my starajemsia adkładać. Ja zvyčajna prosta ŭ dzień zarobku kuplaju dalary. Maja minimalnaja płanka — tysiača dalaraŭ u miesiac. Kali atrymlivajecca potym kupić bolš, kuplaju bolš. Kali razumieju, što dziela hetaj tysiačy ŭ kankretnym miesiacy na žyćcio treba pakinuć nie 2000 rubloŭ, a, naprykład, 1700, 1600 abo 1500, značyć, pastarajemsia trochi ŭcisnucca. Dla mianie važna nie źbivacca z rytmu nakapleńniaŭ.
Ciapier niejkaj kankretnaj mety ŭ hetych hrošaj niama, chutčej chočacca prosta mieć narmalnuju padušku biaśpieki. Časy davoli niestabilnyja, plus u nas maleńkaje dzicia, tamu mnie spakajniej razumieć, što ŭ vypadku čaho jość zapas. Kali za hod naźbirajecca $10+ tysiač, heta ŭžo suma, ź jakoj možna dumać pra niešta bolš surjoznaje: pamianiać aŭtamabil, zrabić ramont, kupić učastak niedaloka ad Minska, zadumacca pra nieruchomaść — chaj navat u kredyt.
Byŭ pieryjad času, kali my źbirali na kankretnuju metu — płastyčnuju apieracyju dla žonki, jana kaštavała kala 18 tysiač rubloŭ (paradku $6 tysiač u ekvivalencie). Prykładna čatyry miesiacy my asobna adkładali hrošy mienavita na jaje, u vyniku zrabili. Kali zarablaŭ mienš, moh adkładvać i $50, i $100, i $200, i $300 u miesiac.
Ja liču, što lepš adkłaści choć kolki-niebudź, čym uvohule ničoha.
Napeŭna, tamu rost dachodu sam pa sabie nie mocna źmianiŭ majo štodzionnaje žyćcio. Kali b ja pačaŭ atrymlivać jašče na tysiaču abo paŭtary tysiačy rubloŭ bolš, siamja b, chutčej za ŭsio, heta amal nie adčuła: ja b bolš adkładaŭ, čym traciŭ. Prosta kuplaŭ by nie tysiaču dalaraŭ u miesiac, a, dapuścim, paŭtary.
Na čym ja dakładna nie chaču aščadžać, dyk heta na charčavańni. Mnie važna, kab doma byli narmalnyja jakasnyja pradukty — nie abaviazkova samyja darahija, ale dobry nabor ježy dla siamji. Ja starajusia, kab u racyjonie było dastatkova białku, a potym užo tłuščy i vuhlavody, a nie naadvarot.
Toje ž tyčycca zdaroŭja. Kali patrebnyja vitaminy, minierały abo niejkija inšyja rečy dla zdaroŭja, my ich kuplajem. Kali ja ŭpeŭnieny, što peŭny brend abo pradukt sapraŭdy jakasny i za jaho treba zapłacić bolš, taksama nie baču sensu aščadžać.
I asabliva nie chaču aščadžać na dziciaci. Jamu jašče niama 3 hadoŭ, i kali jamu patrebnyja dadatkovyja zaniatki, rečy dla raźvićcia, adzieńnie abo niešta źviazanaje sa zdaroŭjem, pytańnie ekanomii dla mianie ŭvohule nie staić.
A voś zabavy — heta toj artykuł, dzie my całkam možam ucisnucca. Asabliva nie chodzim pa barach i restaranach, možam zapłanavać kino, zajści ŭ kaviarniu, ale nie ŭ darahija ŭstanovy, dzie za paru hadzin pakidaješ paŭzarobku. Z padarožžami padobnaja historyja: apošnim časam jeździm u asnoŭnym pa Biełarusi. Tak što heta taksama nievialiki artykuł vydatkaŭ.
Jość, praŭda, u nas adno guilty pleasure — dastaŭka ježy. Pryčym sprava navat nie ŭ tym, što nam lanota hatavać. Chutčej heta taki dadatkovy sposab atrymać zadavalnieńnie ŭviečary: uklučyli film — i chočacca zakazać picu, kryłcy i hetak dalej. Asobna zdajecca, što niby i niedaraha, ale kali ty dziesiać razoŭ za miesiac zakazaŭ tuju ž picu, ličy, prajeŭ 500 rubloŭ.
Kali kazać pra kupli asabista dla siabie, to tut ja, naadvarot, davoli skupy. Mahu doŭha nie mianiać adzieńnie, techniku, uvohule nie kuplać sabie ničoha bujnoha. Dva-try hady spakojna žyvu biez surjoznych kuplaŭ, a potym mnie raptoŭna što-niebudź prychodzić u hałavu. Adzin raz, naprykład, kupiŭ MacBook prykładna za 4,5 tysiačy rubloŭ. Jašče praz paru hadoŭ abnaviŭ stacyjanarny kampjutar.
Kali žonka choča pamianiać telefon, kupić hadzińnik, fitnes-braślet abo ŭpryhažeńnie, ja zvyčajna nie suprać. Adzinaje, pra što prašu, — heta kab pakupka była choć u jakim-niebudź sensie karysnaj.
Pa słovach Aleha, raptoŭnyja vydatki jaho razdražniajuć: mužčyna pryvyk płanavać biudžet choć by na miesiac-dva napierad i zahadzia razumieć, kudy pojduć hrošy.
— Dla kahości niepradbačanyja vydatki — heta, naprykład, pałomka aŭtamabila z ramontam na 3 tysiačy rubloŭ. Dla mianie ž stresavaj moža akazacca navat niečakanaja pajezdka da svajakoŭ, na jakuju pojduć 500—600 rubloŭ plus čas. Abo žonka niejki čas dumaje pra pakupku, ničoha mnie nie kaža, a potym raptam pierad zimoj paviedamlaje, što joj patrebna novaje palito, abutak i jašče što-niebudź. I ty razumieješ, što kamplekt — heta ŭmoŭnyja 1,5 tysiačy rubloŭ.
Ja nie suprać samoj pakupki, mnie prosta było b značna lahčej, kali b ja viedaŭ pra jaje choć by trochi zahadzia. Tady možna padrychtavacca, pastupova adkłaści hrošy i nie skaračać nakapleńni.
U cełym ja liču, što 5—6 tysiač rubloŭ i vyšej — heta dobry, kamfortny zarobak dla Minska. Ale, jak pa mnie, važna nie toje, kolki čałaviek zarablaje, a toje, kolki ŭ jaho zastajecca. Možna atrymlivać bolš i tracić usio da apošniaha rubla, a možna pry bolš ścipłym dachodzie rehularna štości adkładvać.
Pry hetym ja nie baču niejkaj vielizarnaj prorvy pamiž čałaviekam, jaki atrymlivaje 2—3 tysiačy rubloŭ, i tym, chto atrymlivaje 5—6 tysiač. Kali abodva narmalna staviacca da hrošaj, jany buduć chadzić u adnyja i tyja ž kramy, kuplać adnyja i tyja ž rečy, vieści padobnaje žyćcio. Prosta ŭ druhoha źjaŭlajecca mahčymaść adkładać.
«Nu što tam mužyku treba?»
Uładzisłavu amal 32 hady, jon žyvie ŭ Minsku i ŭžo dziesiać hadoŭ zajmaje pazicyju inchaŭs-jurysta. Na ruki atrymlivaje kala 5—6 tysiač rubloŭ u miesiac. Na taki ŭzrovień dachodu mužčyna vyjšaŭ prykładna hod tamu. U jaho daviedalisia, kudy iduć takija hrošy i ci zrabiŭ vysoki dachod jaho ščaśliviejšym.
— Žyvu adzin, zdymaju adnapakajovuju kvateru trochi bolš čym za 1000 rubloŭ u miesiac. Mahu, kaniešnie, dazvolić sabie štości daražejšaje, ale navošta, kali ŭsio zadavalniaje? Dobraje raźmiaščeńnie doma, dobry ramont — nie śviežy, ale akuratny. Hościej zaprasić nie soramna. U cełym ja nie asabliva pieraborlivy ŭ hetym płanie.
Aŭtamabila ŭ mianie niama, dy i vialikaj patreby ŭ im niama. Da ofisa dźvie stancyi na mietro, štomiesiac kuplaju prajazny. Kali treba vybracca kudyści dalej, vaźmu taksi. Darečy, u mianie amal zaŭsiody adziny kryteryj vybaru taryfu — heta cana. Jakaja roźnica, jakoha kłasa aŭto, kali tabie jechać pa horadzie maksimum 20—30 chvilin? Ale zrazumiełaja reč, što kali ja spaźniajusia, a ŭ kłasie vyšejšym padača mašyny chutčejšaja, to ja vybieru jaho, i roźnica ŭ niekalki rubloŭ mianie nie źbiantežyć.
Kolki dakładna traču na ježu, ja nie liču — jak pa mnie, šmat. Zamiest śniadanku ja časta pju tolki čaj, abiedaju ŭ stałovych abo kaviarniach, a na viačeru hatuju štości prostaje (kašy, paŭfabrykaty, sałaty) abo zamaŭlaju dastaŭku ježy. Napeŭna, dastaŭkami karystajusia zanadta časta — paru razoŭ u tydzień. Uvohule, ja lublu smačna pajeści, i na hetym, kaniešnie, možna było b aščadzić. Ale hatavać viečarami mnie zvyčajna lanota, chočacca prosta adpačyvać paśla pracy.
Paru razoŭ sprabavaŭ «siadzieć» na dastaŭcy racyjonaŭ pravilnaha charčvańnia (kala 1,1 tys. rubloŭ u miesiac). Pa sutnaści dobra, pa smaku — kali jak, ale vielmi ŭžo niazručna čakać kurjeraŭ: nikudy dalej za śmietnicu kala doma nie adyści. Dy i kurynaja hrudka choć i karysnaja, ale časam usio ž chočacca sakavitaha čabureka sa śvininaj. Tamu bolš za miesiac na takim charčavańni ja nie praciahnuŭ.
Adzieńnie zakazvaju na markietpłejsach. Starajusia vybirać usio jakasnaje, u pravieranych pradaŭcoŭ, ale nie vielmi darahoje. Z apošniaha — kupiŭ poła za 80 rubloŭ. Pa kramach chadzić nie lublu, maksimum, što kuplaju afłajn, — heta biełaruskaja nižniaja bializna i futbołki.
Pa bytavoj chimii, kaśmietycy i tamu padobnym skazać składana, tamu što nu što tam mužyku treba? Hiel 10 u 1, zubnaja pasta, dezadarant? U mianie prykładna taki nabor plus srodki dla prybirańnia. Vydatki na ŭsio heta nastolki drobnyja, što ja ich nie liču. Jašče raz u niekalki miesiacaŭ ja zakazvaju klininh, bo lepš za ich ja dakładna nie prybiarusia. Kaštuje heta pasłuha prykładna 100 rubloŭ, ale na heta hrošaj nie škada.
Ja redka kudyści vybirajusia, chiba što časam na kancerty. Addać paru sotniaŭ rubloŭ na kvitki abo sotniu ŭ kłubnym bary dla mianie nie prablema. U kaviarni i restarany chadžu redka, bo ŭsie maje siabry pracujuć, zaniatyja, jak i ja, niekatoryja žanatyja — pasprabuj źbiary ich usich! Raz-dva na hod mahu dazvolić sabie schadzić u kino, kali jość štości vartaje (zvyčajna niama).
Jašče biudžet padjadajuć usiakaha rodu padpiski na internet-servisy: YouTube biez rekłamy, chutki VPN, narmalny muzyčny stryminh — dla mianie heta mastcheŭ. Sumarna na heta idzie rubloŭ sa 100 u miesiac. Paru sotniaŭ rubloŭ štomiesiac zakidaju na kašalok u Steam, kab kuplać hulni, jakija nikoli nie zapušču.
Rasterminoŭki i kredyty starajusia nie brać, tolki kali treba zrabić bujnuju kuplu. Naprykład, kala paŭhoda tamu ja źbiraŭ kampjutar, uklučajučy manitor i pieryfieryju. Usie kamplektujučyja biez prablem kupiŭ za dva miesiacy — pa niekalki štuk z kožnaha zarobku. Ale voś na videakartu ŭsio ž uziaŭ rasterminoŭku: jana kaštavała kala 3,5 tysiač rubloŭ, i addać takuju sumu adnamomantna ja nie moh.
Patrochu źbiraju hrošy na kuplu žytła. U miesiac, kali niama surjoznych vydatkaŭ, ja mahu adkładać 1000—2000 rubloŭ, a kali b byŭ bolš dyscyplinavanym i trochi ŭcisnuŭsia, to, napeŭna, moh by apuskać u skarbonku i 3000. U mianie ciapier jość mahčymaść zarablać bolš, ale dla hetaha pryjdziecca tracić volny čas pa viečarach i vychadnych, a ja ŭsio ž caniu work-life balance — i ŭsim raju.
U cełym svoj zarobak ja liču kamfortnym dla žyćcia adnaho čałavieka. A kali z takim dachodam u ciabie jość ułasnaje žytło, to heta ŭvohule dobra.
«Zaŭsiody chočacca bolš»
Maksimu 38 hadoŭ, jon žyvie ŭ Minsku i pracuje ŭ budaŭničaj halinie (apošnija šeść hadoŭ — viadučym inžynieram pa achovie pracy), paralelna supracoŭničaje ź inšymi kampanijami pa svaim profili. Paśla vypłaty padatkaŭ i alimientaŭ u jaho zastajecca kala 6—6,5 tysiač rubloŭ u miesiac.
Da ciapierašniaha dachodu chłopiec pryjšoŭ pastupova. Niekalki hadoŭ tamu jon sumiaščaŭ asnoŭnuju pracu z padpracoŭkaj kurjeram, a paźniej pačaŭ brać dadatkovyja prajekty pa achovie pracy, ekałohii i pažarnaj biaśpiecy.
— Samy vialiki pastajanny artykuł vydatkaŭ ciapier — heta ipateka — 1700 rubloŭ. «Kamunałka» razam ź internetam uletku vychodzić dzieści ŭ rajonie 100 rubloŭ. Jość jašče niekalki rasterminovak — prykładna na 300 rubloŭ u miesiac, ale jany ŭžo zakančvajucca. U asnoŭnym braŭ štości z techniki i rečaŭ dla kvatery. U pryncypie, ja moh by zapłacić adrazu, ale kali prapanujuć biespracentnuju rasterminoŭku, čamu b joj nie skarystacca?
Na transpart traču niašmat — prykładna 100—150 rubloŭ u miesiac. Mašyna ŭ mianie jość, ale ja starajusia čaściej jeździć hramadskim transpartam. Z aŭtamabilem u pryncypie składana prahnazavać vydatki. Možna paŭhoda spakojna jeździć i ničoha nie rabić, a potym u adzin miesiac patracić na ramont 1000—1200 rubloŭ.
Na ježu ŭ siarednim idzie kala 600 rubloŭ. Ja nie mahu skazać, što mocna ekanomlu: starajusia kuplać dobryja pradukty, nie charčavacca ŭmoŭnymi sasiskami. Pry hetym u asnoŭnym hatuju sam, tamu što mnie padabajecca chatniaja ježa. Dastaŭkaj karystajusia redka — mahu zakazać picu abo sušy, kali chočacca, ale pastajanna zakazvać hatovuju ježu nie lublu. Mnie praściej kupić, naprykład, dva dobryja stejki z čyrvonaj ryby pa 30—40 rubloŭ, samomu pryhatavać i razumieć, što ty jasi.
Jašče adzin prykmietny artykuł vydatkaŭ — sustrečy ź dziaŭčynaj i siabrami. Na kaviarni i restarany ŭ siarednim idzie 600—700 rubloŭ u miesiac. Časam my možam vybracca kudy-niebudź čatyry razy za miesiac, časam radziej. Prosta chočacca pieryjadyčna schadzić u dobraje miesca, smačna pajeści i spakojna pahavaryć.
Na bytavyja rečy hrošaj idzie zusim niašmat. Ja prosta starajusia kuplać usio vialikimi ŭpakoŭkami: naprykład, uziaŭ adrazu 100 tabletak dla posudamyjnaj mašyny — i na try miesiacy heta pytańnie zakryta. Kali takija vydatki raskłaści na kožny miesiac, dumaju, atrymajecca rubloŭ z 30—40.
Z adzieńniem i abutkam taksama niama niejkaj fiksavanaj sumy. Ja nie kuplaju rečy kožny miesiac prosta dziela taho, kab štości kupić. Ale i da stanu, kali ŭsio kančatkova parviecca, nie zanošvaju. Raniej staraŭsia brać jakasny abutak, choć ciapier navat vysokaja cana nie zaŭsiody štości harantuje. U lipieni, naprykład, na adzieńnie ŭvohule ničoha nie patraciŭ, a na žnivień zakłaŭ prykładna 300—400 rubloŭ.
Bolš za ŭsio hrošaj paśla ipateki ciapier źjadaje ramont. Tolki ŭ lipieni na jaho pajšło kala 5 tys. rubloŭ: naciažnyja stoli, špalery ŭ adzin pakoj, śviacilni i inšyja rečy. Kvateru ja kuplaŭ z ramontam, ale mnie chaciełasia zrabić usio całkam pad siabie. Na materyjałach taksama asabliva nie aščadžaŭ: kali špalery, to italjanskija, kali technika, to ŭbudavanaja. Tamu ramont zabiraŭ vielmi šmat hrošaj. Ciapier, na ščaście, zastalisia ŭžo apošnija štrychi.
— Niejkuju sumu atrymlivajecca adkładać?
— Raniej ja staraŭsia, źbiraŭ i na pieršy ŭniosak za kvateru, i prosta na niejkija bujnyja kupli. A potym u niejki momant zrazumieŭ: žyćcio ž prachodzić. Možna pastajanna siabie abmiažoŭvać, źbirać hrošy i hladzieć na ich, ale navošta tady ŭvohule zarablać? Tamu ciapier ja chutčej starajusia žyć siońniašnim dniom. Nie ŭ sensie spuścić uvieś zarobak za niekalki dzion, a dazvalać sabie toje, čaho sapraŭdy chočacca.
Dalary ciapier taksama śpiecyjalna nie kuplaju. Raniej, napeŭna, adkładaŭ by hrošy ŭ valucie, a ciapier nie baču asablivaha sensu. Kvatera jość, mašyna jość, niejkaj kankretnaj vialikaj mety, dziela jakoj treba hadami źbirać, niama.
Napeŭna, nastupnaja takaja hłabalnaja meta — adpačynak. Na jaho mnie, darečy, čamuści zaŭsiody trochi škada hrošaj. Ja razumieju, što mahu dazvolić sabie pajezdku, ale časam uklučajecca heta «žaba», kali zdajecca, što lepš jašče što-niebudź kupić u kvateru.
Uvohule, z rostam dachodu rastuć i patreby, źmianiajecca jakaść žyćcia. Raniej ty spakojna žyŭ biez kavamašyny i piŭ raspuščalnuju kavu, a potym razumieješ, što možaš kupić kavamašynu. I tak pastupova źjaŭlajecca šmat rečaŭ, jakija raniej zdavalisia nieabaviazkovymi. Tamu ja b navat skazaŭ, što zarabić hrošy časam praściej, čym potym narmalna raźmierkavać biudžet. Kali pačynaješ atrymlivać bolš, adrazu chočacca i taho, i druhoha, i treciaha. Voś heta dla mianie ciapier samaje składanaje.
— Dla vas heta kamfortny zarobak?
— Zaŭsiody chočacca bolš. Pry hetym ja ŭžo prachodziŭ pieryjad, kali zarablaŭ kala 7,6—7,8 tysiačy rubloŭ, i zrazumieŭ, jakoj canoj dajucca mnie hetyja hrošy. Było vielmi ciažka, praca pačynała zabirać zanadta šmat času i sił. A mnie ŭsio ž chočacca, kab zastavaŭsia čas na adnosiny, na dačku, na kvateru i prosta na siabie. Tamu što, kali całkam syści ŭ pracu, hrošy ŭ ciabie buduć, tolki hladzieć na ich u niejki momant stanie nie radasna.
Tamu ciapier ja śviadoma abmiažoŭvaju pracoŭny čas. U vychadny biarusia za pracu tolki tady, kali sapraŭdy štości horyć, a ŭ budni starajusia zakančvać maksimum da šaści-siami viečara. Mnie zdajecca, ja narešcie pryjšoŭ da taho ŭzroŭniu, kali ŭžo nie treba luboj canoj hnacca za nastupnaj tysiačaj. Kali źjavicca cikavaja prapanova pra supracoŭnictva, razhledžu. Ale śpiecyjalna šukać pracu dniom i nočču dziela taho, kab ličba stała jašče bolšaj, ciapier nie chaču.
Biełarusy raskazali pra siamiejny biudžet i vydatki na ipateku ŭ Polščy
«My ačmureli ad taho, nakolki heta doraha». Kolki biełarusy zaraz traciać na viasielle
«Za hod možna zarabić na kvateru ŭ Minsku». Biełaruska raskazała, jak pajechała pracavać u horad budučyni
«Časam ja žyła na 100 i na 40 rubloŭ u miesiac». Jak maci z 4 dziećmi vystajała ŭ hłuchoj biełaruskaj vioscy
Maładaja siamja z Žodzina raskazała, jak u čatyry razy skaraciła vydatki na ježu
Kamientary