Namieśnikam dyrektara Kupałaŭskaha teatra, imavierna, staŭ były aficer KDB
Namieśnikam dyrektara Kupałaŭskaha teatra staŭ Viktar Druzik. Vidavočna, heta śpiecsłužbist, jaki ŭ minułym byŭ načalnikam adździeła ŭłasnaj biaśpieki KDB.
Pa źviestkach, jakija «Lusterka» atrymała ad «Kibierpartyzan», poŭny ciozka hetaha čałavieka — Viktar Vasiljevič Druzik — naradziŭsia ŭ 1956-m. Až da kanca nulavych hadoŭ jon byŭ supracoŭnikam KDB. U 2010—2019 hadach pracavaŭ u handlovym domie «Uschodni», jaki naležyć Kiraŭnictvu spraŭ Łukašenki, dzie zajmaŭ pasadu namieśnika dyrektara. U 2019—2020 hadach nie byŭ nidzie aformleny. Ź listapada 2021 da listapada 2024 hoda značyŭsia ŭ spartyŭna-azdaraŭlenčym kompleksie «Frystajł».
Čałaviek z takimi ž dadzienymi zhadvajecca na sajcie «Uznaharody Biełarusi».
Tam jon fihuruje jak načalnik adździeła ŭłasnaj biaśpieki KDB, padpałkoŭnik justycyi, uznaharodžany ŭ 1997‑m miedalom «Za biezdakornuju słužbu» I stupieni.
Ciapier ža, vidać, hety čałaviek pryjšoŭ u Kupałaŭski teatr. Jašče ŭ studzieni 2026‑ha namieśnikam dyrektara tam byŭ inšy čałaviek, Uładzimir Kuchcik. Ale ŭ siaredzinie sakavika hetuju pasadu ŭžo zajmaŭ Viktar Druzik. Na sajcie kalektyvu ŭ hetaha čałavieka niama partreta (tady jak u dyrektara i inšaha namieśnika dyrektara jany jość), nie zapoŭniena i bijahrafija.
Pryznačeńnie siłavikoŭ u kiraŭnictva biełaruskich teatraŭ — novy trend ad uładaŭ. Viadoma jak minimum pra čatyroch takich asob.
Namieśnikami dyrektara Nacyjanalnaha teatra opiery i baleta Biełarusi pracujuć dva padpałkoŭniki milicyi. Heta Vadzim Martysievič, jaki znachodzicca na hetaj pasadzie z 2023 hoda (jon sychodziŭ z orhanaŭ z pasady načalnika adździeła ideałahičnaj raboty i kadravaha zabieśpiačeńnia Śpiecliceja MUS), i Dźmitryj Kisły, jaki zaśviaciŭsia na pasadzie ŭ lutym 2026‑ha (raniej jon byŭ načalnikam centra kulturna-vychavaŭčaj raboty MUS).
Major milicyi Viačasłaŭ Leanienka, jaki pracavaŭ ekśpiertam-kryminalistam u staličnym RUUS, a zatym u śfiery achovy, z 2024‑ha byŭ namieśnikam dyrektara Biełaruskaha dziaržaŭnaha teatra lalek. A z krasavika 2026‑ha mužčyna ŭznačalvaje ŭstanovu.
U tym ža 2024‑m namieśnikam dyrektara biaśpieki, režymu i kadraŭ staličnaha Horkaŭskaha teatra staŭ Juryj Pietrašeŭski. Pravierka praz bot «Voka zmahara», stvorany «Kibierpartyzanami», pakazała, što jon byŭ namieśnikam načalnika adździeła ŭnutranych spraŭ Miadzielskaha rajvykankama ŭ ranhu padpałkoŭnika milicyi.
Kamientary