Hienieralny štab USU paviedamiŭ, što ŭviečary 10 červienia i ŭ noč na 11 červienia 2026 hoda ŭkrainskija vajskoŭcy praviali sieryju ŭdaraŭ pa šerahu vajskovych, łahistyčnych i pramysłovych abjektaŭ, jakija vykarystoŭvajucca rasijskimi vojskami dla viadzieńnia vajny suprać Ukrainy. Adnoj z hałoŭnych celaŭ staŭ Afipski naftapierapracoŭčy zavod, raźmieščany ŭ Krasnadarskim krai Rasii.
Jak paviedamlaje Hienštab USU, udar byŭ paśpiachovy, i na terytoryi pradpryjemstva ŭźnik pažar.
Afipski NPZ ličycca adnym z najbujniejšych naftapierapracoŭčych zavodaŭ na poŭdni Rasii. Jon zdolny pierapracoŭvać kala 6,25 miljona ton nafty za hod. Pradpryjemstva vypuskaje dyzielnaje paliva, bienzin, mazut i inšyja naftapradukty. Takaja pradukcyja vykarystoŭvajecca nie tolki ŭ cyvilnaj ekanomicy, ale i dla zabieśpiačeńnia rasijskaj vajskovaj łahistyki, tamu zavod razhladajecca jak važny stratehičny abjekt.
Akramia taho, na terytoryi akupavanaha Rasijaj Kryma byŭ naniesieny ŭdar pa abjekcie ŭ Sievastopali, dzie ažyćciaŭlałasia vytvorčaść, zborka i abstalavańnie marskich bieśpiłotnych kataraŭ. Taksama ŭ Krymie byŭ naniesieny ŭdar pa składzie zachoŭvańnia bieśpiłotnych latalnych aparataŭ kala nasielenaha punkta Hryhoraŭka.
Taksama ŭkrainskija vajskoŭcy paviedamili pra ŭdary pa punktach kiravańnia rasijskich vojskaŭ u rajonach Davydaŭskaha, Novaznamienki, Bachmuta, Sialidava i Pakroŭska na terytoryi Danieckaj i Łuhanskaj abłaściej.
Asobna paviedamlajecca pra paražeńnie punkta kiravańnia rasijskimi bieśpiłotnikami kala nasielenaha punkta Novaandrejeŭka ŭ Danieckaj vobłaści. U rajonie Daŭžanska Łuhanskaj vobłaści byŭ atakavany rajon kancentracyi padraździaleńnia rasijskich apierataraŭ bieśpiłotnikaŭ. A jašče adnym abjektam stała majsternia pa vytvorčaści i ramoncie bieśpiłotnych latalnych aparataŭ u rajonie Aŭdziejeŭki Danieckaj vobłaści.
Kamientary