«Ukraina nie prajhraje, Rasija nie pieramahaje». En Epłbaum pra pierałom u vajnie, jaki mianiaje ŭsio

En Epłbaum vyłučaje try asnoŭnyja teatry vajennych dziejańniaŭ, dzie rasijski naratyŭ pra toje, što Rasija pieramahaje, całkam paciarpieŭ krach.

Suchaputny front. «Miortvaja zona» šyrynioj 30 kiłamietraŭ

Nasupierak stereatypam pra pavolnaje prasoŭvańnie rasijskich vojskaŭ, z pačatku viasny 2026 hoda, padčas svajho nastupleńnia, Rasija straciła va Ukrainie bolš terytoryi, čym zachapiła.

Epłbaum tłumačyć, što front pieratvaryŭsia ŭ prazrystuju zonu, jakaja całkam kantralujecca dronami i štučnym intelektam.

Linija frontu stała šeraj 30‑kiłamietrovaj zonaj u šyryniu, dzie ŭsio ŭnutry hetaj zony bačna dronam. Heta aznačaje, što luby rasijski hruzavik, tank ci vajskoviec imhnienna identyfikujecca i pa im lohka nanieści ŭdar.

Heta dazvalaje Ukrainie štomiesiac likvidoŭvać i ranić da 30 tysiač rasijskich sałdat. Kijeŭ blizki da svajoj mety — źniščać bolš akupantaŭ, čym Rasija zdolnaja mabilizavać na zamienu, piša aŭtarka.

Vajna na dalokich dystancyjach. Kałaps rasijskaj SPA i naftavy kryzis

Pucin praciahvaje teraryzavać ukrainskija harady balistyčnymi rakietami, karystajučysia deficytam snaradaŭ dla sistem Patriot.

Adnak Kreml zamoŭčvaje, što ŭ samoj Rasii katastrafična zakančvajucca srodki SPA.

Heta dazvoliła ŭkrainskim dronam sistemna vybivać rasijskuju naftahazavuju infrastrukturu ŭ hłybokim tyle. Pavodle ekśpiertaŭ, naftapierapracoŭčyja mahutnaści Rasii ŭžo skaročany minimum na 20%, a amal usie bujnyja NPZ u centralnaj častcy krainy spynili abo istotna źmienšyli vytvorčaść. Heta ŭžo stvaryła surjozny kryzis z palivam na akupavanym Krymskim paŭvostravie.

Psichałahičnaja vajna

Upeŭnienaść Maskvy ŭ chutkaj pieramozie kančatkova razburana. Epłbaum pryvodzić dva prykłady psichałahičnaha złomu rasijskaha hramadstva: skaročany vajskovy parad u Maskvie z-za bojazi ŭkrainskich dronaŭ i čorny dym nad naftabazaj u Sankt-Pieciarburhu prosta ŭ dzień adkryćcia mižnarodnaha ekanamičnaha forumu.

Kiraŭnik Ofisa prezidenta Ukrainy Kirył Budanaŭ (eks-kiraŭnik HUR) adznačyŭ u kamientary žurnalistcy:

«Jany [rasijanie] nie mohuć zrazumieć, čamu jany pavinny praciahvać vajavać i čamu pa ich ciapier bjuć, bo im kazali, što jany pieramohuć, a Ukraina — heta ništo».

Epłbaum spasyłajecca na sakretnyja dakumienty, jakija prasačylisia z ofisa vysokapastaŭlenaha kramloŭskaha čynoŭnika Siarhieja Kiryjenki.

U ich raśpisany płan taho, jak ułady źbirajucca «pradać» rasijskamu hramadstvu kaniec vajny: abviaścić pieramohu i nazvać armiju RF «samaj bajazdolnaj u śviecie»; padać minimalnyja terytaryjalnyja nabytki jak kałasalny pośpiech; zajavić, što Jeŭropa atrymała niezvarotny ekanamičny ŭdar, a Ukraina voś-voś razvalicca.

Pavodle słoŭ Budanava, mienavita dziela taho, kab pakinuć u krainie tolki adnu aficyjnuju pazicyju padčas hetaha razvarotu, Kreml zahadzia zabłakavaŭ Telegram na terytoryi Rasii. Na jaho dumku, pieramovy, pačatyja administracyjaj Trampa, mohuć pryvieści da spynieńnia ahniu pa isnujučaj linii frontu ŭžo ŭ hetym hodzie. Niahledziačy na toje, što Uładzimir Zialenski nakiravaŭ Pucinu list z prapanovaj pramych pieramoŭ, rasijski dyktatar pakul publična admoviŭsia ad sustrečy.

Navat kali bajavyja dziejańni zaciahnucca, Epłbaum prahnazuje stvareńnie novaha status-kvo. Pa miery raźvićcia technałohij «prazrystaja zona» na froncie pašyrycca z 30 da 50—65 kiłamietraŭ.

U vyniku linija frontu pieratvarycca ŭ faktyčnuju demilitaryzavanuju zonu, padobnuju da toj, što adździalaje Paŭnočnuju i Paŭdniovuju Kareju, jakaja patrulujecca bieśpiłotnikami.

Heta stanie časovaj miažoj, jakuju nichto nie pryznaje, ale jakuju budzie niemahčyma zrušyć.

Dla Ukrainy heta nie budzie absalutnaj pieramohaj, ale stanie hałoŭnym paražeńniem Pucina, bo jaho klučavaja meta — ścierci Ukrainu z karty śvietu — tak i nie była dasiahnutaja.

• 32
• 1
• 0
• 2
• 0
• 0
• 0
• 1