Homielskaha pradprymalnika pryznali darmajedam, kali jon kvartał spracavaŭ biez prybytku
Historyja vyklikała šmat rozhałasu ŭ tyktoku.
Uviesnu historyja homielskaha pradprymalnika, jakoha ŭklučyli ŭ bazu «niezaniatych u ekanomicy», aburyła biełaruski tyktok. Mužčyna ździŭlaŭsia: jak možna ličyć «darmajedam» čałavieka, jaki maje IP, pracuje amal biez vychodnych i časta zakančvaje spravy pozna ŭviečary.
Ciapier u hetaj historyi źjaviŭsia praciah.
Pradprymalnik atrymaŭ aficyjny adkaz z vykankama i zapisaŭ novaje videa ŭ tyktoku. Pavodle jaho słoŭ, pryčyna papadańnia ŭ bazu akazałasia ŭ tym, što ŭ adzin z kvartałaŭ jon pakazaŭ nulavy prybytak.
«Atrymałasia, što ŭ mianie vydatkaŭ było stolki ž, kolki i dachodaŭ. Tak byvaje: zapłaciŭ arendu, zarobak rabotniku, aciapleńnie, zakupiŭ materyjały — i na vychadzie nul. I zimoj zdarajucca zastojnyja miesiacy», — tłumačyć jon.
A dalej spracavała sistema: kali niama adličeńniaŭ, čałaviek moža trapić u bazu hramadzian, jakija ličacca nie zaniatymi ŭ ekanomicy.
«Vychodzić, što ja i tak ničoha nie zarabiŭ u ciažki pieryjad, a mnie jašče źvierchu dali bonus u vyhladzie pavyšanaj kamunałki», — kaža pradprymalnik u roliku.
Videa imhnienna sabrała bolš za sotniu kamientaroŭ. Šmat chto staŭ na bok pradprymalnika.
«Nulavy dachod nie aznačaje darmajedstva», — napisaŭ adzin z karystalnikaŭ.
«Kali vy zarehistravanyja jak IP, nichto nie maje prava pryznać vas darmajedam. Bolš niedarečnaj adhavorki źvierchu ja jašče nie čuŭ», — ličać u kamientarach.
Mnohija kamientatary pieraviali razmovu na łukašenkaŭcaŭ, jakich nazyvali hałoŭnymi «darmajedami» krainy i paraŭnoŭvali ich pryvilei z patrabavańniami, što dziaržava vystaŭlaje da zvyčajnych hramadzian.
«Čynoŭniki — samyja hałoŭnyja darmajedy. Spadziajusia, svaboda słova jašče isnuje, bo nie chaciełasia b adkazvać za ŭłasnaje mierkavańnie», — pišuć u kamientarach.
«Zakon pra darmajedstva — niejki absurd. Kali ŭžo jaho prymianiać, dyk i čynoŭnikaŭ varta było b pad jaho padvieści. Žyvuć za narodnyja hrošy, atrymlivajuć roznyja lhoty, sanatoryi, dadatkovyja vypłaty. A što jany vyrablajuć? Adny prablemy», — aburajecca jašče adzin udzielnik dyskusii.
«Moža, varta pravieryć tych, chto sam praviaraje inšych? Bo, zdajecca, jany ŭžo zanadta šmat sabie dazvalajuć», — ličyć inšaja karystalnica.
«Takija zakony pieratvarajuć ludziej u niešta nakštałt pryhonnych. Niezdarma kažuć: trymaj ludziej biednymi i hałodnymi — imi budzie praściej kiravać. A nas tym časam usio bolš abkładajuć padatkami. I my praciahvajem heta ciarpieć», — napisaŭ jašče adzin kamientatar.
Častka ŭdzielnikaŭ dyskusii pačała abmiarkoŭvać sam pryncyp farmavańnia bazy.
«Zhodna z Kanstytucyjaj, praca źjaŭlajecca pravam, a nie abaviazkam. Artykuł 41 harantuje hramadzianam prava na vybar prafiesii, rodu zaniatkaŭ i miesca pracy, a taksama zabaraniaje prymusovuju pracu. Heta aznačaje, što kožny čałaviek maje prava samastojna vyrašać, pracavać jamu ci nie, a taksama vybirać, dzie mienavita pracavać. Kanstytucyja harantuje prava na pracu, ale nie abaviazvaje čałavieka hetym pravam karystacca», — nabraŭ pad sotniu łajkaŭ adzin z samych papularnych kamientaroŭ.
Inšyja źviartali ŭvahu na toje, što čałaviek moža ŭdzielničać u ekanomicy navat biez aficyjnaha dachodu.
«Usie, chto kuplaje tavary ŭ kramach, užo płaciać PDV. Značyć, taksama ŭdzielničajuć u ekanomicy», — pisaŭ adzin z karystalnikaŭ.
Inšy koratka sfarmulavaŭ takuju pazicyju: «Dziaržavie patrebnyja tvaje hrošy na isnavańnie. Kali ich niama, to ty kiepski».
Adnak nie ŭsie ŭdzielniki dyskusii stali na bok pradprymalnika. Niekalki kamientataraŭ pastaviła pad sumnieŭ samu historyju z nulavym dachodam i vykazała zdahadku, što prablema moža być źviazanaja z asablivaściami viadzieńnia biznesu i spravazdačnaści.
«Tak vychodzić, kali chavaješ dachody. Za što vy charčujeciesia i žyviacie?» — zadajecca pytańniem adzin z karystalnikaŭ.
«Niaviedańnie zakonaŭ nie vyzvalaje ad padatkaŭ», — nahadvaje inšy.
Ale takija kamientary nie atrymali padtrymki astatnich udzielnikaŭ dyskusii.
Ciapier čytajuć
«Lutaja, abraźlivaja krytyka ŭsiaho biełaruskaha. Ale ź minułaha ŭ budučyniu niemahčyma prajści mima sučasnaści». Nasievič hruntoŭna adkazaŭ Alesiu Biełamu144144
Kamientary