U navička NBA z top-30 drafta baćka — biełarus: vyras u halečy, dziela raźvićcia syna pradaŭ matacykł
Biełaruskich spartsmienaŭ u najmacniejšaj baskietbolnaj lizie śvietu nie było nikoli, ale ciapier tudy prabiŭsia syn emihranta ź Minska — 23‑hadovy Aleks Karaban, raspaviadaje «Trybuna». Atrymałasia zorka studenckaha baskietboła ZŠA.
Abvieščany top-30 drafta NBA — i pad 29‑m numaram pajšoŭ 23‑hadovy lohki forvard Aleks Karaban. Vybiraŭ «Kliŭlend», ale pa damoŭlenaści z «Sakramienta», jakomu adrazu ž pierajšli pravy na hulca. Novaja kamanda Karabana ŭ minułym siezonie była aŭtsajdaram Zachodniaj kanfierencyi, padzialiŭšy apošniaje miesca. Ź inšaha boku, u słabiejšaj kamandzie i prabicca praściej.
Baćka baskietbalista Alaksiej Karaban naradziŭsia ŭ Minsku. Sam kazaŭ, što vyras u halečy — byŭ dziciom u siamji inžyniera i buchhałtara, jakija žyli na 15 dołaraŭ u miesiac.
Alaksiej Karaban, jak i jaho baćka, pastupiŭ u BDU, staŭ inžynieram-prahramistam. Paśla taho jak pabyvaŭ u Amierycy na viasielli siabra — kraina spadabałasia, dy i adčuŭ, što jaho śpiecyjalnaść budzie zapatrabavanaja. Zdoleŭ atrymać pracoŭnuju vizu i ŭ 2001 hodzie pierajechaŭ nazaŭsiody. Pasialiŭsia ŭ štacie Masačusiets, viadomym svaim topavym technałahičnym univiersitetam.
«U Biełarusi, kali ty nie pastupaješ, to idzieš u armiju. Heta tvoj vybar. Ty nie chočaš iści zmahacca ŭ pieršych šerahach abo budavać dom dla hienierała. Heta nie takija ž mahčymaści, jak u Amierycy», — uspaminaŭ Karaban pra Biełaruś.
Nieŭzabavie paśla pierajezdu, špacyrujučy ŭ miascovym parku, mužčyna pačuŭ, jak dziaŭčyna pa-rusku razmaŭlaje sa svaim sabakam — i padyšoŭ paznajomicca. Volha Miahkova rasła va ŭkrainskim Lvovie, dzie prafiesijna zajmałasia płavańniem, a ŭ 1996 hodzie jaje siamja pierajechała ŭ Masačusiets — pryčynaj nazyvaŭsia antysiemityzm. Z vypadkovaj sustrečy ŭ parku atrymaŭsia doŭhi šlub z tryma dziećmi.
Pieršym 11 listapada 2002 hoda naradziŭsia chłopčyk, jakoha nazvali Aleks. Ź dziacinstva jon zachapiŭsia baskietbołam i ŭ niejki momant paprasiŭ u baćkoŭ zrabić placoŭku prosta na ŭčastku siamiejnaha doma ŭ haradku Saŭtbara.
Baćka padumaŭ — i pradaŭ svoj matacykł Kawasaki, kab vykanać žadańnie syna. Na pakryćcio nanieśli inicyjały AK, jakija padychodziać abodvum.
Karaban hadzinami kidaŭ miač u košyk i letam, i zimoj — rabiŭ heta i z baćkam, jaki zachaplaŭsia hulnioj u studenctvie. Kali treba było pieravodzicca ŭ starejšuju škołu, siamja pierajechała ŭ susiedni Nortbara, dzie była bližejšaja prydatnaja pa baskietbolnych paramietrach navučalnaja ŭstanova. Praz hod maładoha baskietbalista zaŭvažyli ŭ susiednim štacie Ńju-Hempšyr. Hulnia za škołu Ńju-Chemptana prypała na kavidny pieryjad, ale jon nie pieraškodziŭ u siezonie-2020/21 nabirać 25,8 ačka i 8,7 padboru ŭ siarednim za matč i stać najlepšym u štacie pa svaim kłasie, dzie byŭ samym maładym.
Užo ŭ 2021 hodzie Karaban, jakomu zastavaŭsia jašče adzin školny hod, vybraŭ na budučyniu ŭniviersitet štata Kanektykut. Paśla ekskursii pa im byŭ vielmi ŭražany ŭmovami dla baskietboła, a voś maci była niezadavolenaja — im amal ničoha nie raskazali pra vučobu. Ale hulca tak chacieli atrymać, što paśla jaho zvanka trenieru z apoviedam pra heta chutka prysłali za im i maci mašynu i praviali ekskursiju pa ŭsich navučalnych korpusach.
Volha Karaban supakoiłasia, a syn vyrašyŭ, što pavodle prykładu baćki pojdzie na inžynierny fakultet. I sapraŭdy sumiaščaŭ vučobu sa sportam.
Ale ŭ baskietbole, kaniešnie, prasłaviŭsia pakul macniej. U hałoŭnaj amierykanskaj studenckaj lizie NCAA Karaban praktyčna nie prapuskaŭ matčy, chutka staŭ lidaram «JUKon Chaskis» — a kamanda dva hady zapar stanaviłasia čempijonam, što ŭ studenckim baskietbole vialikaja redkaść.
U siezonie-2022/23 hulec dapamoh tytułu, nabraŭšy 9,3 ačka i 4,5 padboru za matč, u siezonie-2023/24 demanstravaŭ 13,3 ačka pry 5,1 padbora. Paśla hetaha ŭžo moh vychodzić na draft NBA, ale padumaŭ, paraiŭsia z maci — i zastaŭsia davučycca.
U siezonie-2024/25 Karaban mieŭ najlepšuju vynikovaść — 14,3 ačka, ale kamanda praviała słaby dla siabie siezon i chutka vylecieła ŭ rehijanalnym adbory. Ale ŭ siezonie-2025/26 viarnułasia — i dajšła da finalnaha matča NCAA, choć tam i prajhrała, a Karaban nabiraŭ 13,2 ačka pry 5,3 padbora. Usiaho za karjeru ŭ «JUKon Chaskis» atrymałasia 151 hulnia i 126 pieramoh — rekordnyja ŭ historyi kamandy pakazčyki, jašče Karaban staŭ lidaram usich časoŭ pa chvilinach na placoŭcy i realizavanych trochačkovych. A ŭsiaho nabraŭ 1880 ačkoŭ, što źjaŭlajecca šostym vynikam za historyju.
Za takija dasiahnieńni ŭ sakaviku 2026 hoda Karabana ŭviali ŭ Zału słavy ŭniviersiteta i vyvieli z abarotu jaho 11‑y numar — upieršyniu takoje adbyłosia jašče padčas karjery hulca. «Kapitan Amieryka», jak daŭno prazvali lidara kamandy, nie strymaŭ śloz.
Pierad draftam NBA Karabana z rostam u 2 mietry i vahoj 102 kh aceńvali jak «paśpiachovaha rolevaha hulca, jaki dobry i ŭ abaronie». Chvalili za «zdolnaści prymać rašeńni, chutka pieramiaščać miač, realizoŭvać kidki i nievierahodna dobra ruchacca bieź miača». Słabymi miescami nazyvali dryblinh i abaronu adzin u adzin. Tym nie mienš pradkazvali vybar u kancy pieršaha raŭnda drafta-2026 — jak i atrymałasia.
Pryčym kali Karaban siadzieŭ z tavaryšami pierad ekranam, čakajučy tranślacyi drafta, to atrymaŭ zvanok. Adkazaŭ, pačuŭ pra mahčymaść patrapić u «Sakramienta», skazaŭ «Voś łajno» (bieź niehatyvu, heta łajanka ŭ Amierycy na ŭzroŭni vykličnika) i «Davaj zrobim heta» — a chutka prymaŭ vinšavańni, kali ŭsio abviaścili aficyjna.
Nie zabyvaje Karaban i padziakavać za svoj pośpiech baćkam.
«Dumaju, samaachviaravańnie — hałoŭnaje, što ja ŭ ich šanuju. Pierajezd u Amieryku — nie samy lohki šlach, asabliva kali adrazu źjaŭlajecca dzicia. Maje baćki — śviedčańnie taho, jak imihranty mohuć dasiahnuć pośpiechu. Bačačy, kolki pracy jany ŭkłali, ja razumieju, što mahu pryśviacić svaim zaniatkam dadatkovuju hadzinu abo dźvie. Jany achviaravali ŭsim dziela mianie. Ja chaču zarabić stolki, kab kupić im dom abo pahasić ipateku, kab adździačyć za ŭsio, što jany zrabili ŭ maim dziacinstvie», — kaža baskietbalist. Što ž, ciapier jon bližej da hetaj mety.
Jaho małodšy brat Endru Karaban taksama moža pakazać siabie ŭ baskietbole — daŭno zajmajecca, vypuskajecca sa škoły ŭ 2027‑m i vidavočna pryciahnie ŭniviersitety chacia b praz proźvišča. Tym časam u UConn pierajšoŭ — i całkam moža zamianić Aleksa Karabana pa pazicyi — inšy syn biełarusa.
19‑hadovy Nik Chamienia ŭ 2025 hodzie staŭ čempijonam śvietu siarod junijoraŭ za zbornuju ZŠA i ličycca vielmi pierśpiektyŭnym baskietbalistam.
Kamientary
Narešcie i trybunka daviedałaś pra jaho. Nie kali jon dvojčy zapar staŭ čempijonam siarod studentaŭ, a tolki zaraz, praz dva hady.