U Biełym domie nie padtrymali płany Pientahona radykalna skaracić kolkaść vojskaŭ ZŠA u Jeŭropie
Administracyja prezidenta ZŠA nie padtrymała prapanovu ministra abarony Pita Chiehseta ab značnym skaračeńni amierykanskaj vajskovaj prysutnaści ŭ Jeŭropie. Pra heta paviedamlaje vydańnie The Wall Street Journal sa spasyłkaj na krynicy, znajomyja ź situacyjaj.
Pavodle infarmacyi vydańnia, Pit Chiehset płanavaŭ abviaścić na sustrečy ministraŭ abarony krain NATA ŭ Brusieli pra dalejšaje skaračeńnie amierykanskich vojskaŭ u Jeŭropie. Adnak paśla abmierkavańnia ŭ Biełym domie hetyja płany byli adkładzienyja.
Zamiest hetaha Pientahon abviaściŭ tolki pra praviadzieńnie revizii, kab vyznačyć aptymalnuju kolkaść vajskoŭcaŭ na jeŭrapiejskim kantyniencie.
Paviedamlajecca, što prajekt nibyta trapiŭ da dziaržaŭnaha sakratara ZŠA Marka Rubia i inšych vysokapastaŭlenych čynoŭnikaŭ, paśla čaho byŭ adchileny. Pavodle śćviardžeńnia krynic, Donald Tramp taksama vykazaŭ niezadavolenaść rašeńniem Chiehseta admianić płanavuju ratacyju amierykanskaj braniatankavaj bryhady ŭ Polščy i asabista pacikaviŭsia pryčynami takoha kroku.
Paźniej Tramp zajaviŭ pra namier nakiravać u Polšču piać tysiač amierykanskich vajskoŭcaŭ, adnak, jak adznačaje vydańnie, na siońnia hetaje razhortvańnie jašče nie adbyłosia.
Inicyjatyvy Pientahona vyklikali zaniepakojenaść jak u Respublikanskaj, tak i ŭ Demakratyčnaj partyjach. Zakanadaŭcy ličać, što istotnaje skaračeńnie amierykanskich sił u Jeŭropie moža asłabić NATA i pavialičyć ryzyku bolš ahresiŭnych dziejańniaŭ z boku Rasii.
U suviazi z hetym Kanhres prapanuje zabaranić skaračeńnie kolkaści amierykanskich vajskoŭcaŭ u Jeŭropie nižej za 76 tysiač bieź śpiecyjalnaj acenki ryzyk i ŭzhadnieńnia z vyšejšym vajskovym kiraŭnictvam ZŠA.
Pavodle raniejšych acenak, da pačatku hetych źmianieńniaŭ u Jeŭropie znachodzilisia kala 85 tysiač amierykanskich vajskoŭcaŭ.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury2
Kamientary