У Белым доме не падтрымалі планы Пентагона радыкальна скараціць колькасць войскаў ЗША у Еўропе
Адміністрацыя прэзідэнта ЗША не падтрымала прапанову міністра абароны Піта Хегсэта аб значным скарачэнні амерыканскай вайсковай прысутнасці ў Еўропе. Пра гэта паведамляе выданне The Wall Street Journal са спасылкай на крыніцы, знаёмыя з сітуацыяй.
Паводле інфармацыі выдання, Піт Хегсэт планаваў абвясціць на сустрэчы міністраў абароны краін НАТА ў Бруселі пра далейшае скарачэнне амерыканскіх войскаў у Еўропе. Аднак пасля абмеркавання ў Белым доме гэтыя планы былі адкладзеныя.
Замест гэтага Пентагон абвясціў толькі пра правядзенне рэвізіі, каб вызначыць аптымальную колькасць вайскоўцаў на еўрапейскім кантыненце.
Паведамляецца, што праект нібыта трапіў да дзяржаўнага сакратара ЗША Марка Рубіа і іншых высокапастаўленых чыноўнікаў, пасля чаго быў адхілены. Паводле сцвярджэння крыніц, Дональд Трамп таксама выказаў незадаволенасць рашэннем Хегсэта адмяніць планавую ратацыю амерыканскай бранятанкавай брыгады ў Польшчы і асабіста пацікавіўся прычынамі такога кроку.
Пазней Трамп заявіў пра намер накіраваць у Польшчу пяць тысяч амерыканскіх вайскоўцаў, аднак, як адзначае выданне, на сёння гэтае разгортванне яшчэ не адбылося.
Ініцыятывы Пентагона выклікалі занепакоенасць як у Рэспубліканскай, так і ў Дэмакратычнай партыях. Заканадаўцы лічаць, што істотнае скарачэнне амерыканскіх сіл у Еўропе можа аслабіць НАТА і павялічыць рызыку больш агрэсіўных дзеянняў з боку Расіі.
У сувязі з гэтым Кангрэс прапануе забараніць скарачэнне колькасці амерыканскіх вайскоўцаў у Еўропе ніжэй за 76 тысяч без спецыяльнай ацэнкі рызык і ўзгаднення з вышэйшым вайсковым кіраўніцтвам ЗША.
Паводле ранейшых ацэнак, да пачатку гэтых змяненняў у Еўропе знаходзіліся каля 85 тысяч амерыканскіх вайскоўцаў.
Каментары