Pryniaćcie 21‑ha pakieta sankcyj suprać Rasii pieranieśli jašče na tydzień
Pryniaćcie 21‑ha pakieta sankcyj Jeŭrapiejskaha sajuza suprać Rasii adkłali jašče na adzin tydzień. Novaje abmierkavańnie i sproba ŭchvalić dakumient zapłanavanyja na 22 lipienia padčas pasiadžeńnia Kamiteta pastajannych pradstaŭnikoŭ ES (Coreper), paviedamlaje «Jeŭrapiejskaja praŭda».
Pavodle źviestak dypłamataŭ, apošniaje pierad letnim pierapynkam pasiadžeńnie pasłoŭ ES stanie mahčymaściu dasiahnuć damoŭlenaści pa novym pakiecie sankcyj.
Pieraškodaj dla chutkaha pryniaćcia rašeńnia stali roznahałośsi pamiž krainami ES. Hrecyja vystupaje za zachavańnie mahčymaści pierapradavać rasijski zvadkavany haz u trecija krainy. Aŭstryja, u svaju čarhu, patrabuje vyklučyć z sankcyjnaha śpisu rasijskuju inviestycyjnuju kampaniju, kab možna było razmarozić jaje aktyvy i vypłacić kampiensacyju aŭstryjskaj bankaŭskaj hrupie Raiffeisen.
Paviedamlajecca, što dla Aŭstryi ŭžo prapanavali kampramisny varyjant, jaki ciapier razhladajecca ŭ Vienie. Dla Hrecyi taksama płanujuć padrychtavać mahčymy kampramis na praciahu tydnia.
Raniej Coreper nie zmoh pryniać kančatkovaje rašeńnie pa novym pakiecie sankcyj, ale pahadziŭsia časova zachavać abmiežavańnie na canu rasijskaj nafty da 23 lipienia.
Pieršapačatkova ES imknuŭsia zaćvierdzić novyja sankcyi da 15 lipienia, bo zakančvaŭsia termin, źviazany ź pierahladam cenavaha abmiežavańnia na rasijskuju naftu.
Raniej mahčymaść błakiroŭki pakieta taksama razhladali Bałharyja i Italija, jakija patrabavali vyklučyć z sankcyjnych śpisaŭ aktyŭnaha prychilnika vajny, maskoŭskaha patryjarcha Kiryła. Paśla vykreślivańnia Kiryła sa śpisu ich piarečańni byli źniatyja.
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary