Nie moža zhadać svajo žyćcio miesiac tamu, pazabyvaŭ znajomych. Kaskadzior, jaki ledź nie zahinuŭ na aŭtašou ŭ Lidzie, zapisaŭ videa z balnicy
Arciemij Prakapienka cudam vyžyŭ: imaviernaść pamierci paśla traŭm, jakija jon atrymaŭ, była 95%. Chłopiec raskazaŭ, što ź im ciapier.
Małady błohier-kaskadzior apublikavaŭ videa z balnicy. Bačna, što havaryć jamu davoli składana.
Kaža, što ŭsio jašče adčuvaje siabie drenna. Dziakuje daktaram i siabram za dapamohu. Dadaje, što vielmi vieryŭ u toje, što musić vyžyć, bo nie paśpieŭ navat zrabić prapanovu ruki i serca.
Arciom raspaviadaje, što maje prablemy z pamiaćciu: jon amal nie pamiataje ŭsie dni paśla trahiedyi. A kali chłopcu zadajuć pytańni pra toje, što adbyvałasia ŭ jaho žyćci miesiac-dva tamu, jon daloka nie ŭsio moža zhadać. Źnikli z pamiaci i imiony-proźviščy niekatorych znajomych.
— Ja vielmi mocna paškodziŭ mozh, praz heta mahu tryźnić.
Adnaŭleńnie, pa roznych prahnozach daktaroŭ, zojmie ad hoda da troch. Napieradzie ŭ Arcioma praciahłaja reabilitacyja, na jakuju nieabchodna šmat hrošaj.
Jon nie tracić nadziei stać tym čałaviekam, jakim byŭ.
— Usio vielmi mocna zaležyć ad majoj dyscypliny, siły voli. A taksama mocna zaležyć ad finansaŭ.
Chłopiec dziakuje tym, chto danaciŭ jamu na lačeńnie. Kaža, što chapała danacieraŭ, jakija pieraličvali nievialikija hrošy — i pa 80 kapiejek, i pa 2 rubli. Ale adhuknuŭšychsia było šmat.
Ciapier Arciom vučycca ŭsiamu nanova. Abiacaje pakazvać praces u sacsietkach.
Nahadajem: błohier-trukač Arciemij Prakapienka — adzin z samych znakamitych kaskadzioraŭ Biełarusi, jaho videa sabrali amal paŭmiljarda prahladaŭ.
Na svajoj staroncy ŭ instahramie chłopiec paznačaŭ, što 25 razoŭ ryzykavaŭ žyćciom — mienavita stolki patencyjna śmiarotnych trukaŭ jon vykanaŭ za svaje 24 hady. Ale ž u hety raz u Lidzie niešta pajšło nie pa płanie.
Padčas aŭtamabilnaha šou «Tački. Piknik», jakoje prachodziła la ścien Lidskaha zamka ŭ žniŭni, adbyŭsia niaščasny vypadak. Arciemij Prakapienka stajaŭ na vialikaj bočcy. Jon padskočyŭ i ŭžo ŭ pavietry jaho na chutkaści źbiła adna z mašyn, jakija dryftavali.
Na adnym ź videa incydentu bačna, što da chłopca, jaki lažyć na asfalcie, padbiahajuć inšyja mužčyny. Jany chutka chapajuć Arciemija za ruki i nohi i vynosiać jaho ź placoŭki. Dalej šou praciahnułasia.
U kamientary «Anłajnieru» arhanizatary šou padkreślili, što na mierapryjemstvie dziažuryli dźvie karety chutkaj dapamohi — i miedyki apieratyŭna akazali pieršuju dapamohu, paśla jakoj Arciemija špitalizavali ŭ balnicu Lidy.
Publiku na miescy pasprabavali supakoić: abviaścili, što chłopiec tolki złamaŭ nahu dy atrymaŭ udar hałavy.
Ale, jak vyśvietliła «Naša Niva», situacyja była bolš surjoznaja. Znajomyja Arciemija raspaviali, što jaho pieravieźli ŭ balnicu ŭ Minsk — i stan byŭ siaredniaj ciažkaści.
Paźniej svajaki chłopca adkryli dabračynny rachunak, sabranyja srodki ź jakoha pojduć na adnaŭleńnie kaskadziora.
Svajaki kaskadziora, jaki ledź nie zahinuŭ na aŭtašou ŭ Lidzie, raskazali, što ź im ciapier
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?
Jak 23‑hadovy chłopiec z homielskaj vioski źbiraje sotni miljonaŭ prahladaŭ na kaskadziorskich trukach i maje kantrakt z Red Bull
Ciapier čytajuć
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf44
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf4
«Tekst prysiahi prahučaŭ tady dvojčy». Statkievič padzialiŭsia ŭspaminami pra prysiahu biełaruskich vajskoŭcaŭ u 1992 hodzie na Dzień bitvy pad Oršaj1818
Kamientary