U Vialikabrytanii ślapy čałaviek prajechaŭ za rulom 240 km u niećviarozym stanie
Jon vypiŭ čatyry butelki vina i adpraviŭsia ŭ darohu. Pravoŭ kiroŭcy ŭ jaho nie było.
Sud u Vialikabrytanii vynies umoŭny prysud ślapomu mužčynu, jaki ŭ niećviarozym stanie sieŭ za rul aŭtamabila svajoj siabroŭki i prajechaŭ 240 kiłamietraŭ, piša Bi-bi-si.
29 červienia palicyja spyniła aŭtamabil 50‑hadovaha Entani Choła na šašy kala horada Karłajł, pakolki mašyna vilała pamiž pałosami i pieryjadyčna źjazdžała na abočynu.
Choł raspavioŭ palicejskim, što adpraviŭsia ŭ darohu paśla taho, jak razam sa svajoj partniorkaj vypiŭ čatyry butelki vina.
Padčas suda mužčyna pryznaŭ svaju vinu ŭ niebiaśpiečnym kiravańni, kiravańni transpartnym srodkam u niećviarozym stanie, kiravańni biez pravoŭ, a taksama vykarystańni aŭtamabila biez strachoŭki i zhody ŭładalnicy.
Palicejskija raspaviali sudu, što ŭ noč na 29 červienia atrymali infarmacyju pra toje, što na šašy M6 — adnoj z asnoŭnych aŭtamahistralaŭ Vialikabrytanii — znachodzicca ślapy čałaviek, jaki kiruje aŭtamabilem u niećviarozym stanie.
Aficer, jaki spyniŭ aŭtamabil, adčuŭ pach ałkaholu i spytaŭ u kiroŭcy, ci ŭžyvaŭ jon śpirtnoje. Toj pryznaŭsia, što piŭ vino razam sa svajoj partniorkaj. Jon taksama raspavioŭ, što straciŭ zrok kala dvuch hadoŭ tamu, ale ŭsio jašče moža bačyć niekatoryja ahni.
Tłumačačy, jakim čynam jamu ŭdałosia prajechać takuju adlehłaść, Choł skazaŭ, što prosta aryjentavaŭsia na habarytnyja ahni hruzavika.
Svoj učynak jon patłumačyŭ žadańniem źjechać u Šatłandyju jak maha dalej ad doma, składanych asabistych adnosin i finansavych prablem.
Pa darozie Choł taksama spyniŭsia na zapraŭcy, dzie supracoŭnik dapamoh jamu zapravić aŭtamabil.
Advakat abvinavačanaha skazała ŭ sudzie, što toj raniej nie mieŭ sudzimaściaŭ i imknuŭsia ŭciačy ad składanych žyćciovych abstavinaŭ.
«Hety čałaviek pieražyvaŭ kryzis i prymaŭ padčas hetaha kryzisu drennyja rašeńni», — skazała jana.
Pry vyniasieńni ŭmoŭnaha prysudu sudździa ŭličyła toj fakt, što Choł raniej byŭ zakonapasłuchmianym čałaviekam i pieražyvaŭ niaprosty pieryjad u žyćci.
Mužčynu prysudzili da 36 tydniaŭ pazbaŭleńnia voli, ale vykanańnie prysudu adkładajecca na paŭtara hoda — u brytanskaj sistemie pravasudździa heta anałah umoŭnaha pakarańnia.
Choł taksama abaviazany prajści prahramu reabilitacyi i ŭstrymlivacca ad užyvańnia ałkaholu na praciahu 90 dzion.
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary