Kola pajšoŭ u armiju, ale kudy? Voś dzie słužyli Viktar i Dźmitryj Łukašenki
Alaksandr Łukašenka śćviardžaje, što jaho małodšy syn słužyć u vojsku «jak usie». Kudy mahli pasłać Mikałaja i jak słužyli jaho starejšyja braty?
Mikałaj Łukašenka, akazvajecca, užo słužyć, pryčym, pa słovach baćki, u niejkim asabliva składanym padraździaleńni lejtenantam — choć niajasna, kali i dzie jon moh skončyć vajskovuju kafiedru, kab atrymać aficerskaje zvańnie..
Alaksandr Łukašenka pra słužbu syna raskazaŭ žurnalistam 11 vieraśnia.
«Małodšy syn užo słužyć u armii. Nichto navat i nie viedaŭ. Viktar Chrenin pryzvaŭ. Słužyć u armii, jak i naležyć, jak usie. Lejtenant. Nie budu kazać dzie, ale ŭ samym składanym padraździaleńni», — zajaviŭ Łukašenka.
Jakoje mienavita miesca dastałosia małodšamu synu, jon nie ŭdakładniŭ. Ale ŭ siamji Łukašenkaŭ jość svaja vajskovaja tradycyja: baćka słužyŭ u pamiežnych vojskach, a abodva starejšyja syny — u elitnym śpiecpadraździaleńni pamiežnikaŭ. Prynamsi, farmalna.
Baćka: palitrabotnik u pamiežnych i motastrałkovych vojskach
Alaksandr Łukašenka słužyŭ u savieckim vojsku dvojčy.
Pieršy raz — u 1975‑1977 hadach, paśla zakančeńnia histaryčnaha fakulteta Mahiloŭskaha piedahahičnaha instytuta. Jaho nakiravali ŭ pamiežnyja vojski, jakija ŭ toj čas uvachodzili ŭ sistemu KDB SSSR. Pavodle aficyjnaj bijahrafii, Łukašenka byŭ instruktaram palitadździeła vajskovaj čaści Zachodniaj pamiežnaj akruhi ŭ Breście.
Druhi raz jon trapiŭ u vojska ŭ 1980 hodzie i słužyŭ da 1982-ha. Jaho aficyjnaja bijahrafija nazyvaje pasadu namieśnika kamandzira roty pa palityčnaj rabocie.
Ciapier Łukašenka maje zvańnie padpałkoŭnika zapasu, choć na vajskovych mierapryjemstvach nosić śpiecyjalnuju formu viarchoŭnaha hałoŭnakamandujučaha z pahonami, jakija vizualna nahadvajuć maršalskija.
Viktar: ASAM, nielehalnyja mihranty i miedal
Starejšy syn Viktar Łukašenka ŭ 1998 hodzie skončyŭ fakultet mižnarodnych adnosin BDU. Spačatku jon paśpieŭ papracavać u Ministerstvie zamiežnych spraŭ, a zatym pajšoŭ u pamiežnyja vojski.
Z 1998 da 2001 hoda Viktar słužyŭ u Asobnaj słužbie aktyŭnych mierapryjemstvaŭ — ASAM. Heta elitnaje śpiecyjalnaje padraździaleńnie pamiežnych vojskaŭ, jakoje śpiecyjalizujecca na baraćbie z teraryzmam, niezakonnaj mihracyjaj, narkatrafikam i kantrabandaj na dziaržaŭnaj miažy. Słužbu jon skončyŭ u zvańni kapitana.
Pra adzin z epizodaŭ jaho słužby paźniej raskazvaŭ kamandzir padraździaleńnia. Pavodle jaho, pad Hrodnam Viktar udzielničaŭ u zatrymańni hrupy nielehalnych mihrantaŭ i za heta atrymaŭ dziaržaŭnuju ŭznaharodu. Sam fakt uznaharodžańnia paćviardžajecca dakumientalna. Ukazam №105 ad 23 lutaha 2001 hoda Viktar Łukašenka byŭ uznaharodžany miedalom «Za adznaku ŭ achovie dziaržaŭnaj hranicy».
Paśla słužby Viktar viarnuŭsia ŭ hramadzianskija struktury, a ŭ 2005 hodzie staŭ pamočnikam baćki pa nacyjanalnaj biaśpiecy. Ciapier jon uznačalvaje Nacyjanalny alimpijski kamitet.
Dźmitryj: sakretnaja čaść i chakiej padčas słužby
Siaredni syn Dźmitryj Łukašenka pajšoŭ amal tym ža šlacham. U 2002 hodzie jon skončyŭ fakultet mižnarodnych adnosin BDU pa śpiecyjalnaści «mižnarodnaje prava» i adrazu paśla ŭniviersiteta trapiŭ u vojska. Słužyŭ Dźmitryj taksama ŭ ASAM, pačynaŭ adrazu ŭ zvańni lejtenanta.
U teleprahramie pačatku 2000‑ch Dźmitryj tak apisvaje svoj dzień: padjom a siomaj ranicy, raźminka, śniadanak i vyjezd na słužbu, jakaja skančałasia a 18-j.
U adnym z epizodaŭ Dźmitryj u halštuku siadzić za manitoram kampjutara i vyvučaje zakanadaŭstva ab achovie miažy.
«Śpiecyjalnaść u mianie hramadzianskaja — juryst-mižnarodnik. Vybraŭ hety šlach, bo treba nie parušać tradycyju: jak vy viedajecie, i baćka byŭ pamiežnikam, i starejšy brat Viktar», — tłumačyŭ jon.
U prahramie pakazali, jak ranicaj Dźmitryj hulaje ŭ chakiej u Ladovym pałacy, nazvaŭšy heta fizičnaj padrychtoŭkaj u padraździaleńni. A ŭviečary Pałac sportu ŭžo ačapili pierad chakiejnym matčam, u jakim razam vychodzili na lod Alaksandr, Viktar i Dźmitryj Łukašenki.
Paźniej Dźmitryj dasłužyŭsia da kapitana. Jak i Viktar, jon maje miedal «Za adznaku ŭ achovie dziaržaŭnaj miažy», a taksama viedamasnyja znaki «Vydatnik pahranvojskaŭ» pieršaj i druhoj stupieniaŭ. Paśla vojska jon uznačaliŭ Prezidencki spartyŭny kłub.
Ci moh Mikałaj taksama trapić u ASAM?
Taki varyjant vyhladaje łahičnym. U ASAM słužyli abodva jaho starejšyja braty, a pamiežnaja słužba ŭ siamiejnaj bijahrafii padajecca jak tradycyja, raspačataja jašče baćkam.
Da taho ž Łukašenka nazvaŭ miesca słužby Mikałaja «samym składanym padraździaleńniem». ASAM jakraz doŭhi čas padavaŭsia dziaržaŭnaj prapahandaj jak elita pamiežnych vojskaŭ.
Ale jość niestykoŭka. ASAM uvachodzić u sistemu Dziaržaŭnaha pamiežnaha kamiteta, a nie Ministerstva abarony. Tamu ministr abarony Viktar Chrenin nie pavinien niepasredna «pryzyvać» tudy ludziej.
Mahčyma, Łukašenka skazaŭ pra Chrenina ŭ šyrokim sensie, majučy na ŭvazie pryzyŭ na vajskovuju słužbu ŭvohule. Ale mahčyma i toje, što Mikałaj słužyć u niejkim padraździaleńni Uzbrojenych sił, a nie ŭ śpiecnazie pamiežnikaŭ.
A moža, u Słužbie biaśpieki prezidenta?
Apošnim časam Mikałaj nie raz źjaŭlaŭsia pobač z baćkam u ciomnaj formie i vyhladaŭ jak adzin ź ludziej sa Słužby biaśpieki. Jana zajmajecca achovaj Łukašenki, inšych vyšejšych słužbovych asob i dziaržaŭnych abjektaŭ.
Tak, u mai 2026 hoda Mikałaj Łukašenka źjaviŭsia na treniroŭcy sił, zadziejničanych u prymianieńni jadziernaj zbroi, u vajskovaj formie z šaŭronam Słužby biaśpieki.
Raniej, padčas vizitu ŭ Manholiju ŭ 2024 hodzie, jon nasiŭ vopratku koleru chaki z emblemaj hetaj słužby. Adnak aficyjna pra zaličeńnie Mikałaja ŭ SBP nie paviedamlałasia.
Dy i trapić tudy, prynamsi pavodle raniejšych publična ahučanych praviłaŭ, biez słužby ŭ vojsku było nielha. U 2014 hodzie SBP paviedamlała, što kandydataŭ adbirajuć siarod mužčyn — hramadzian Biełarusi va ŭzroście 20‑25 hadoŭ, jakija ŭžo prajšli vajskovuju słužbu pa pryzyvie.
Adnak u dziejnym Zakonie «Ab dziaržaŭnaj achovie» takoje patrabavańnie naŭprost nie prapisana: jon źmiaščaje tolki ahulnyja patrabavańni, a paradak pravierki kandydataŭ vyznačaje sama SBP.
Słužyć i praciahvaje jeździć z baćkam
Uletku 2026 hoda Mikałaj skončyŭ sumiesnuju prahramu BDU i Piekinskaha ŭniviersiteta pa bijatechnałohijach. Ciapier, pavodle baćki, jon adnačasova słužyć i ŭ volny čas praciahvaje zajmacca svajoj śpiecyjalnaściu.
Pry hetym vajskovaja słužba nie pieraškodziła jamu supravadžać Łukašenku za miažoj. U 2026 hodzie Mikałaj niekalki razoŭ traplaŭ u abjektyvy padčas zamiežnych pajezdak baćki. Apošni taki vypadak — samit u Biškieku 31 žniŭnia — 1 vieraśnia.
Sam pa sabie vyjezd vajskoŭca za miažu nie supiarečyć słužbie: jaho mohuć nakiravać u aficyjnuju kamandziroŭku. Kali ž Mikałaj słužyć u achovie baćki, takija pajezdki mohuć być častkaj jaho abaviazkaŭ.
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary