Smartfony koštam mienš za 100 dalaraŭ mohuć źniknuć z prodažu
Vinoj tamu častkova — štučny intelekt.
Telefony Xiaomi. Ilustracyjnaje fota: Xiaomi
Smartfony tańniejšyja za 100 dalaraŭ chutka mohuć źniknuć, pakolki vydatki na pamiać imkliva rastuć, paviedamlaje CNBC.
Kala 173 miljonaŭ smartfonaŭ koštam mienš za 100 dalaraŭ byli pastaŭleny letaś pa ŭsim śviecie. U druhim kvartale 2026 hoda pastaŭki ŭ hetym siehmiencie ŭpali amal na 60% u paraŭnańni z papiarednim hodam, śviedčać danyja IDC.
Telefony koštam da 100 dalaraŭ składali 27,7% suśvietnych pastavak kitajskaj kampanii Xiaomi ŭ pieršaj pałovie 2025 hoda. Praz hod hetaja dola źniziłasia da 11,2%.
Vinoj tamu, častkova, nienažerny apietyt štučnaha intelektu da pamiaci. Vytvorcy čypaŭ addali pryjarytet bolš darahim praduktam, jakija vykarystoŭvajucca ŭ infrastruktury ŠI, što pryviało da skaračeńnia pastavak kampanientaŭ dla smartfonaŭ i pavyšeńnia vydatkaŭ.
Pamiać zaraz składaje amal 60% sabiekoštu materyjałaŭ dla smartfonaŭ koštam nižej za 200 dalaraŭ, kaža Šoŭ Šeń Uinia z Omdia.
«Vytvorčaść biudžetnych telefonaŭ stanovicca ekanamična niavyhadnaj», — zajaviŭ vice-prezident IDC pa daśledavańniach spažyvieckich pryład Brajan Ma.
U imknieńni pavysić maržu kitajskija vytvorcy pierachodziać u bolš vysoki cenavy siehmient. Pakolki vytvorčaść samych tannych madelaŭ stanovicca niavyhadnaj, vytvorcy prybirajuć ich sa svaich liniejek, padciahvajučy ahulny rynak uvierch.
Dola pastavak Xiaomi koštam da 200 dalaraŭ upała z 60% da 52,5% z 2023 hoda, pa danych IDC.
Ciapier čytajuć
Toj samy masažyst raskazaŭ, navošta zdymaŭ hołych klijentak22
Kamientary