U čas udaru pa ŭkrainskim pamiežnym pierachodzie tam byli jeŭrapiejskija daradcy pa biaśpiecy i Borys Džonsan
Rasijskaja armija naniesła sieryju ŭdaraŭ pa łahistyčnaj infrastruktury na ŭkrainska-polskaj miažy, ledź nie zakranuŭšy śpiećciahnik z vysokapastaŭlenymi palitykami. Načnaja ataka prymusiła polskija ŭłady padniać u pavietra źniščalniki i pravieści ekstranuju evakuacyju zachodnich čynoŭnikaŭ prama na čyhunačnych puciach.
Vydańnie Der Spiegel paviedamlaje pra metanakiravany napad na stratehičny pamiežny pierachod Jahadzin — Darahusk.
Incydent adbyŭsia kala piataj hadziny ranicy ŭ momant, kali niepadalok spyniŭsia pryvatny čartarny ciahnik z udzielnikami mižnarodnaj kanfierencyi pa biaśpiecy YES. Siarod evakujavanych praz pahrozu ŭdaraŭ pasažyraŭ akazalisia daradca kanclera Hiermanii pa źniešniaj i biaśpiekavaj palitycy Hiunter Zaŭter, były premjer-ministr Vialikabrytanii Borys Džonsan, a taksama daradcy pa biaśpiecy z Francyi i Italii.
Drony ŭdaryli pa łakamatyvie rejsavaha pasažyrskaha ciahnika Kijeŭ — Varšava ŭsiaho za dva kiłamietry ad miažy z Polščaj. Abyšłosia biez achviar dziakujučy tamu, što manitorynhavaja hrupa zahadzia papiaredziła bryhadu ab pahrozie. Adnačasova bieśpiłotniki atakavali infrastrukturu samoha prapusknoha punkta, dzie zaharelisia hruzaviki i była paškodžana aŭtazapravačnaja stancyja.
Napad vyklikaŭ ekstrannuju reakcyju Varšavy. U polskim prymiežžy spracavali sireny pavietranaj tryvohi, a vajenna-pavietranyja siły krainy padniali bajavuju avijacyju dla pierachopu bieśpiłotnikaŭ u vypadku ich praniknieńnia ŭ pavietranuju prastoru Polščy. Deputat niamieckaha bundestaha Robin Vahienier, jaki taksama znachodziŭsia ŭ evakujavanym śpiećciahniku, nazvaŭ incydent pravakacyjaj suprać sajuźnikaŭ Ukrainy i zapatrabavaŭ pakłaści kaniec padobnamu teroru na miežach Paŭnočnaatłantyčnaha aljansu.
Ministr zamiežnych spraŭ Ukrainy Andrej Sibiha acharaktaryzavaŭ načnyja padziei jak pramy vyklik Zachadu. Pavodle jaho słoŭ, pucinski teror stukajecca niepasredna ŭ dźviery ES i NATA, a rasijskija varvary stajać pierad bramaj Jeŭropy.
Ź leta hetaha hoda rasijskaje kamandavańnie źmianiła taktyku, pačaŭšy sistematyčna źniščać pamiežnuju infrastrukturu na zachadzie Ukrainy. Metaj hetaj kampanii źjaŭlajecca błakiroŭka ekspartu i razbureńnie łahistyčnych maršrutaŭ pastavak dapamohi ad jeŭrapiejskich krain. Ahułam u noč na 13 vieraśnia rasijskaja armija vykarystała dla ŭdaraŭ pa ŭkrainskaj terytoryi 453 bieśpiłotniki roznych typaŭ, što pryviało da pieravodu ŭsiaho piersanału ŭkrainskaj čyhunki ŭ stan najvyšejšaj hatoŭnaści.
Kamientary