Jeŭrasajuz abiacaje admovicca ad kupli rasijskaha hazu, ale pakul što zakupki tolki pavialičylisia

Za pieršyja dzieviać miesiacaŭ hoda ŭ party ES pastupiła 12,18 miljona ton rasijskaha zvadkavanaha pryrodnaha hazu ahulnym koštam 7,88 miljarda jeŭra. Kala troch čverciaŭ usiaho impartu prypała na francuzskija party.

Pavodle Ahienctva Jeŭrasajuza pa supracoŭnictvie enierhietyčnych rehulataraŭ, u mai Rasija pa-raniejšamu zabiaśpiečvała 12% impartu zvadkavanaha hazu ŭ ES. Rasijski ZPH pastupaje ŭ Ispaniju, Francyju, Bielhiju i Niderłandy, a trubapravodny haz — u Vienhryju, Słavakiju i Hrecyju.

Paśla pačatku poŭnamaštabnaj vajny va Ukrainie dola rasijskaha hazu ŭ ahulnym imparcie ES značna skaraciłasia — raniej jana składała 45%. Adnak niekatoryja jeŭrapiejskija krainy ŭsio adno praciahvajuć zakuplać jaho, niahledziačy na płany pazbavić Kreml dachodaŭ, jakija mohuć vykarystoŭvacca dla finansavańnia vajny.

Raniej prezident ZŠA Donald Tramp abvinavačvaŭ krainy ES u dvajnych standartach: pavodle jaho, jany krytykujuć jaho za zaklučeńnie pahadnieńniaŭ z Rasijaj, ale sami praciahvajuć nabyvać rasijskija enierharesursy. Tramp aceńvaŭ ich zakupki ŭ 250 miljardaŭ dalaraŭ. Vice-premjer Rasii Alaksandr Novak zajaŭlaŭ, što z 2022 hoda jany skłali 302 miljardy jeŭra, tady jak Jeŭrakamisija acaniła hetuju sumu ŭ 197 miljardaŭ jeŭra.

Viasnoj u ES pačała dziejničać zabarona na karotkaterminovyja kantrakty na pastaŭku rasijskaha hazu. Zabaronu na doŭhaterminovyja kantrakty na pastaŭku rasijskaha ZPH płanujecca ŭvieści ŭ kancy 2026 hoda, a na trubapravodny haz — da vieraśnia 2027-ha. Akramia taho, jeŭrapiejskija krainy abaviazalisia da 2027 hoda spynić impart rasijskaj syroj nafty, dola jakoj składaje ad 1% da 3% ahulnaha abjomu impartu.

Aktyvist Urgewald Siebaśćian Reters adznačyŭ, što kožny dadatkovy miesiac amal bieśpierapynnaha handlu zvadkavanym hazam prynosić Rasii novyja dachody, u toj čas jak Ukraina praciahvaje štodnia zaznavać rakietnyja i dronavyja ŭdary.

Analityki sumniavajucca, što ES zmoža svoječasova spynić impart rasijskich enierharesursaŭ. Siarod pieraškod jany nazyvajuć nizkija zapasy hazu i vysokija ceny. Jeŭrakamisija, adnak, nastojvaje, što ŭstanoŭlenyja terminy buduć vykananyja.

Tym časam, pavodle raniejšaha paviedamleńnia Reuters, u kastryčniku 2026 hoda dachody rasijskaha fiederalnaha biudžetu ad padatkaŭ na naftu i haz mohuć vyraści na 10% u hadavym vymiareńni — da adnaho tryljona rasijskich rubloŭ, abo 11,97 miljarda dalaraŭ. Čakajecca, što jany bolš čym udvaja pieravysiać vieraśnioŭskija pakazčyki.

Hałoŭnaja pryčyna rostu — štokvartalnaja vypłata dadatkovaha padatku na prybytak ad zdabyčy nafty. Biez uliku hetaha padatku kastryčnickija pastupleńni, pavodle prahnozaŭ, buduć prykładna na 164 miljardy rubloŭ, abo 1,96 miljarda dalaraŭ, bolšymi za vieraśnioŭskija. Heta rost na 36%.

• 0
• 0
• 1
• 1
• 1
• 1
• 5
• 0