Baćku Miehan Markł abvinavacili ŭ seksualnym hvałcie nad dziećmi. Jana nie stała maŭčać

Pavodle źviestak tabłoida The Sun, zvodny brat Miehan Tomas Markł-małodšy śćviardžaŭ, što znajšoŭ kalekcyju vyjaŭ seksualnaha hvałtu nad dziećmi ŭ byłym žylli baćki na Filipinach. Sam Tomas Markł-starejšy ŭ kamientary Daily Mail adchiliŭ abvinavačańni, zajaviŭšy, što nie vałodaje takimi vyjavami, i nazvaŭ ich «chvaravitaj chłuśnioj».

Miehan raskazała, što jašče ŭ 2018 hodzie ź joj źviazalisia pravaachoŭniki paśla atrymańnia lista, u jakim jaje baćku abvinavačvali ŭ złačynstvach.

«U im utrymlivalisia tryvožnyja i žachlivyja abvinavačańni suprać majho baćki, i mianie zapeŭnili, što jany buduć rasśledavanyja», — zajaviła hiercahinia.

Jana taksama vykazała padtrymku dzieciam, jakija mahli paciarpieć, i padkreśliła, što imkniecca da spraviadlivaści i abarony niepaŭnaletnich. Miehan spadziajecca, što novyja abstaviny dapamohuć hramadskaści lepš zrazumieć pryčyny jaje adčužeńnia ad baćki.

Jak piša The Independent, stasunki Miehan z baćkam pahoršylisia jašče napiaredadni jaje viasiella z brytanskim pryncam Hary ŭ mai 2018 hoda. Tomas Markł nie prysutničaŭ na cyrymonii nibyta praz prablemy sa zdaroŭjem i sprečku vakoł fatahrafij, jakija, pavodle paviedamleńniaŭ ŚMI, jon arhanizavaŭ razam z paparacy.

Paśla viasiella Tomas nieadnarazova davaŭ intervju brytanskim miedyja, raskazvajučy pra kanflikt z dačkoj i sproby adnavić ź joj kantakt. U 2019 hodzie hazieta Mail on Sunday apublikavała pryvatny list Miehan da baćki. Paśla hetaha hiercah i hiercahinia Sasiekskija raspačali sudovy praces suprać vydańnia.

U nastupnyja hady Tomas Markł publična zaklikaŭ dačku dazvolić jamu pabačycca z unukami Arčy i Lilibiet. U śniežni 2025 hoda, kali jon znachodziŭsia ŭ balnicy na Filipinach i pieranios amputacyju nahi, pradstaŭnik Miehan paviedamiŭ, što jana pieradała baćku list.

Ciapierašniaja zajava hiercahini stała čarhovym etapam šmathadovaha kanfliktu, jaki supravadžaŭsia publičnymi abvinavačańniami, intervju i sudovymi sprečkami.

«Maja samaja ščyraja nadzieja ŭ tym, što spraviadlivaść budzie całkam zabiaśpiečanaja, a pryjarytetam zastanucca biaśpieka i abarona nievinavatych dziaciej», — adznačyła Miehan Markł.

U žniŭni stała viadoma, što prync Hary i Miehan Markł płanujuć viarnucca ŭ Vialikabrytaniju praz šeść hadoŭ paśla admovy ad vykanańnia karaleŭskich abaviazkaŭ. Paviedamlałasia, što jany mohuć pakinuć svoj majontak u Kalifornii i pasialicca ŭ pryvatnym domie niepadalok ad Łondana, a ich dzieci ź vieraśnia buduć vučycca ŭ adnoj z brytanskich škoł.

Pry hetym niama prykmiet taho, što muž i žonka majuć namier viarnucca da vykanańnia abaviazkaŭ členaŭ brytanskaj karaleŭskaj siamji. Ich pradstaŭniki aficyjna hetuju infarmacyju nie kamientavali.

• 0
• 0
• 0
• 6
• 1
• 1
• 0
• 0