Бацьку Меган Маркл абвінавацілі ў сэксуальным гвалце над дзецьмі. Яна не стала маўчаць
Герцагіня Сасекская Меган Маркл заявіла, што калісьці вырашыла спыніць зносіны са сваім бацькам Томасам Марклам-старэйшым і не дазваляла яму кантактаваць са сваімі дзецьмі, бо хацела абараніць іх. Яе заява прагучала на фоне абвінавачанняў супраць бацькі ў сэксуальным гвалце над дзецьмі, пра якія паведамілі брытанскія СМІ, піша The Independent.
Паводле звестак таблоіда The Sun, зводны брат Меган Томас Маркл-малодшы сцвярджаў, што знайшоў калекцыю выяў сэксуальнага гвалту над дзецьмі ў былым жыллі бацькі на Філіпінах. Сам Томас Маркл-старэйшы ў каментары Daily Mail адхіліў абвінавачанні, заявіўшы, што не валодае такімі выявамі, і назваў іх «хваравітай хлуснёй».
Меган расказала, што яшчэ ў 2018 годзе з ёй звязаліся праваахоўнікі пасля атрымання ліста, у якім яе бацьку абвінавачвалі ў злачынствах.
«У ім утрымліваліся трывожныя і жахлівыя абвінавачанні супраць майго бацькі, і мяне запэўнілі, што яны будуць расследаваныя», — заявіла герцагіня.
Яна таксама выказала падтрымку дзецям, якія маглі пацярпець, і падкрэсліла, што імкнецца да справядлівасці і абароны непаўналетніх. Меган спадзяецца, што новыя абставіны дапамогуць грамадскасці лепш зразумець прычыны яе адчужэння ад бацькі.
Як піша The Independent, стасункі Меган з бацькам пагоршыліся яшчэ напярэдадні яе вяселля з брытанскім прынцам Гары ў маі 2018 года. Томас Маркл не прысутнічаў на цырымоніі нібыта праз праблемы са здароўем і спрэчку вакол фатаграфій, якія, паводле паведамленняў СМІ, ён арганізаваў разам з папарацы.
Пасля вяселля Томас неаднаразова даваў інтэрв’ю брытанскім медыя, расказваючы пра канфлікт з дачкой і спробы аднавіць з ёй кантакт. У 2019 годзе газета Mail on Sunday апублікавала прыватны ліст Меган да бацькі. Пасля гэтага герцаг і герцагіня Сасекскія распачалі судовы працэс супраць выдання.
У наступныя гады Томас Маркл публічна заклікаў дачку дазволіць яму пабачыцца з унукамі Арчы і Лілібет. У снежні 2025 года, калі ён знаходзіўся ў бальніцы на Філіпінах і перанёс ампутацыю нагі, прадстаўнік Меган паведаміў, што яна перадала бацьку ліст.
Цяперашняя заява герцагіні стала чарговым этапам шматгадовага канфлікту, які суправаджаўся публічнымі абвінавачаннямі, інтэрв’ю і судовымі спрэчкамі.
«Мая самая шчырая надзея ў тым, што справядлівасць будзе цалкам забяспечаная, а прыярытэтам застануцца бяспека і абарона невінаватых дзяцей», — адзначыла Меган Маркл.
У жніўні стала вядома, што прынц Гары і Меган Маркл плануюць вярнуцца ў Вялікабрытанію праз шэсць гадоў пасля адмовы ад выканання каралеўскіх абавязкаў. Паведамлялася, што яны могуць пакінуць свой маёнтак у Каліфорніі і пасяліцца ў прыватным доме непадалёк ад Лондана, а іх дзеці з верасня будуць вучыцца ў адной з брытанскіх школ.
Пры гэтым няма прыкмет таго, што муж і жонка маюць намер вярнуцца да выканання абавязкаў членаў брытанскай каралеўскай сям’і. Іх прадстаўнікі афіцыйна гэтую інфармацыю не каментавалі.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім13
Каментары