У матрацы і пасцельнай бялізне могуць жыць сотні тысяч мікраскапічных кляшчоў, якія здольныя выклікаць алергію. І тое, што мы робім з ложкам адразу пасля абуджэння, можа ўплываць на ўмовы іх жыцця.
Для многіх людзей раніца пачынаецца з простага рытуалу: прачнуцца, адсунуць шторы і заслаць ложак. Гэта дапамагае адчуць, што новы дзень пачаўся, а ў спальні адразу становіцца больш прыбрана. Але менавіта з апошнім пунктам спяшацца не варта, піша IFLScience.
Пакуль мы спім, арганізм працягвае працаваць. Мы дыхаем, пацеем і выдзяляем цяпло, каб падтрымліваць нармальную тэмпературу цела. У выніку за ноч у пасцелі назапашваецца вільгаць. Разам з адмерлымі часцінкамі скуры яна стварае спрыяльныя ўмовы для пылавых кляшчоў.
Гэтыя мікраскапічныя павукападобныя істоты жывуць у матрацах, падушках, коўдрах і мяккай мэблі і сілкуюцца адмерлымі клеткамі чалавечай скуры. У адным ложку іх могуць быць сотні тысяч, хоць заўважыць іх няўзброеным вокам немагчыма. Асабліва добра кляшчы адчуваюць сябе ў пасцельнай бялізне, бо падчас сну скура пастаянна з ёй кантактуе.
Саміх людзей пылавыя кляшчы не кусаюць і пад скуру не пранікаюць. Праблему ствараюць іх экскрэменты і рэшткі целаў, якія ўтрымліваюць алергены.
Паводле экспертаў, пылавыя кляшчы з'яўляюцца адной з самых распаўсюджаных прычын алергіі ў хатніх умовах. Яны могуць выклікаць чханне, насмарк і высыпанні на скуры, а ў людзей з астмай правакаваць яе абвастрэнне. Алергены пылавых кляшчоў выяўляюцца прынамсі ў адным ложку прыкладна ў чатырох з пяці амерыканскіх дамоў.
Каб зменшыць колькасць пылавых кляшчоў, спецыялісты рэкамендуюць рэгулярна мыць пасцельную бялізну і пыласосіць матрац. Але ёсць яшчэ адна простая парада: не спяшацца засцілаць ложак адразу пасля абуджэння.
Лепш адкінуць коўдру і даць прасціне і матрацу праветрыцца. Так вільгаць, якая назапасілася за ноч, будзе хутчэй выпарацца, а ўмовы для пылавых кляшчоў стануць менш спрыяльнымі.
Дадаткова можа дапамагчы сонечнае святло. Ультрафіялетавае выпраменьванне пры дастатковай інтэнсіўнасці здольнае знішчаць кляшчоў, а таксама некаторыя бактэрыі і грыбкі.
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары