Sterylnaje asiarodździe sapraŭdy vyklikaje ŭ dziaciej alerhii. Ciapier navukoŭcy vyśvietlili, što dziaciej ad alerhii abaraniaje

Alerhija, astma i atapičny dermatyt usio čaściej sustrakajucca ŭ dziaciej u industryjalna raźvitych krainach. Adna z hipotez tłumačyć heta tym, što praźmierna sterylnaje asiarodździe ŭ rańnim uzroście nie daje imunnaj sistemie dastatkovaha kantaktu ź mikraarhanizmami. U vyniku jana moža zanadta aktyŭna reahavać na biaskryŭdnyja rečyvy — naprykład, pyłok raślin abo poŭść žyvioł.

Daŭno zaŭvažana, što dzieci, jakija rastuć u sielskaj miascovaści i štodnia kantaktujuć ź sielskahaspadarčymi žyviołami, majuć mienšuju ryzyku takich zachvorvańniaŭ. Hetuju źjavu nazyvajuć «efiektam fiermy». Ale dahetul zastavałasia niezrazumiełym, jakija mienavita mikraarhanizmy mohuć jaho zabiaśpiečvać.

Daśledčyki ź Miunchienskaha ŭniviersiteta Ludviha-Maksimilijana i Instytuta prafiłaktyki astmy i alerhii imia Hielmholca pasprabavali heta vyśvietlić. Na vyniki ich daśledavańnia źviartaje ŭvahu National Geographic.

Navukoŭcy daśledavali mikrabijom asiarodździa, u jakim žyli dzieci. Jany praanalizavali pył z matracaŭ bolš jak tysiačy školnikaŭ ź sielskich rajonaŭ Hiermanii i Japonii, a taksama ŭzory pavietra ź niekalkich dziasiatkaŭ karoŭnikaŭ.

U vyniku jany zmahli vyłučyć dzieviać vidaŭ hramdadatnych bakteryj, prysutnaść jakich była źviazanaja z achoŭnym efiektam. Krynicaj hetych mikraarhanizmaŭ, pavodle daśledčykaŭ, mohuć być karovy. Bakteryi žyvuć u ich stravavalnaj sistemie, traplajuć u hnoj, a adtul — u pavietra karoŭnika. Dzieci mohuć udychać mikraskapičnyja čaścinki, a taksama prynosić ich dadomu na vopratcy.

U pavietry karoŭnikaŭ vyznačanyja dzieviać vidaŭ składali kala čverci ŭsich vyjaŭlenych mikraarhanizmaŭ. U pyle ź dziciačych matracaŭ ich dola była značna mienšaj — kala 6%.

Jak heta ŭpłyvaje na imunitet

Daśledčyki pasprabavali vyśvietlić nie tolki suviaź pamiž bakteryjami i mienšaj častatoj alerhičnych zachvorvańniaŭ, ale i mahčymy miechanizm ich dziejańnia.

Akazałasia, što rečyvy, jakija vypracoŭvajuć hetyja bakteryi, mohuć uździejničać na receptar AhR — śpiecyjalny białok u kletkach, jaki reahuje na peŭnyja chimičnyja rečyvy i dapamahaje rehulavać pracu imunnaj sistemy.

Pry ŭmieranym uździejańni bakteryjalnych mietabalitaŭ aktyvujucca miechanizmy, zdolnyja strymlivać zapalenčuju reakcyju. Heta moža dapamahać imunnaj sistemie nie reahavać praźmierna na zvyčajnyja rečyvy z navakolnaha asiarodździa.

Pry hetym daśledčyki źviartajuć uvahu mienavita na ŭmieranaje ŭździejańnie. Vysnovy pracy nie aznačajuć, što čym bolš čałaviek kantaktuje z bakteryjami, tym lepš. Praźmiernaja aktyvacyja taho ž receptara AhR moža mieć niadobryja nastupstvy.

Ci źjaviacca «bakteryi ź fiermy» ŭ haradskich kvaterach?

Pavodle raźlikaŭ daśledčykaŭ, vyjaŭlenyja bakteryi mohuć tłumačyć značnuju častku achoŭnaha efiektu fiermierskaha asiarodździa — prykładna dźvie traciny ŭ vypadku astmy i kala pałovy ŭ vypadku alerhii na pyłok i atapičnaha dermatytu.

Ale heta nie aznačaje, što dziela prafiłaktyki alerhii treba vazić dziaciej u karoŭniki ci admaŭlacca ad hihijeny. Praca chutčej adkryvaje mahčymaść dla raspracoŭki novych sposabaŭ prafiłaktyki. U pierśpiektyvie daśledavańni mohuć pryvieści, naprykład, da stvareńnia srodkaŭ, jakija biaśpiečna ŭzbahačajuć chatni mikrabijom, abo inhalataraŭ na asnovie rečyvaŭ, što vypracoŭvajuć patrebnyja bakteryi.

Ale pierš čym takija srodki mohuć źjavicca, navukoŭcam treba pravieści jašče šerah ekśpierymientaŭ i padrabiazna vyvučyć kožny etap uzajemadziejańnia hetych bakteryj z čałaviečym arhanizmam.

• 3
• 0
• 0
• 0
• 0
• 0
• 1
• 0