Ivan Paškievič: Vučań Łukašenka hodny svajho nastaŭnika Stalina

Były namieśnik kiraŭnika Administracyi prezydenta, a ciapier daradca staršyni Sajuzu evanhielskich chryścijan-baptystaŭ kamentuje haładoŭku evanhielistaŭ z carkvy «Novaje žyćcio»: «Łukašenka raspačaŭ nieprychavanuju vajnu proci pratestanckaj carkvy ŭ Biełarusi». Pryvodzim poŭny tekst jahonaha lista.

Vajna z pratestantami

Praŭnaje biazładździe čyniać usie struktury dziaržaŭnaje ŭłady ŭ dačynieńni da carkvy evanhielskich chryścijan «Novaje žyćcio». I Mienskaja haradzkaja ŭłada, i najvyšejšy haspadarčy sud, i Administracyja Prezydenta pavychodzili nia tolki za miežy siońniašniaha zakanadaŭstva, ale j pierastupili praz artykuły biełaruskaje Kanstytucyi. Carkva, što arhanizavałasia pavodle zakonu, nabyła budynak pavodle zakonu, dziejničaje pavodle zakonu, vinoju ŭłady raptam apynułasia pa-za zakonam. Zabrali malitoŭny dom, zabrali srodki, układzienyja na ramont domu, zabrali prava na evanhielskaje słužeńnie. Dziaržava na čale z Łukašenkam zabaraniła tysiačy viernikaŭ sabracca razam dziela malitvy i čytańnia Biblii.

Łukašenka raspačaŭ nieprychavanuju vajnu proci pratestanckaj carkvy ŭ Biełarusi. Aryšty prapaviednikaŭ i pastyraŭ, niepamysnyja štrafy na carkoŭnych słužkaŭ, zakryćcio malitoŭnych damoŭ, admova rehistravać novyja cerkvy – voś nabor vajskovych srodkaŭ «pravasłaŭnaha ateista» ŭ dačynieńni da evanhielskich chryścijan. Za jahonuju dvanaccacihadovuju prezydenckuju dziejnaść nivodnaja evanhielskaja carkva, u tym liku j katalickaja, nie atrymała ŭ Miensku nivodnaj pustki j dazvołu na budaŭnictva carkvy.

Sotni malitoŭnych damoŭ nia možna zarehistravać jak kultavyja budynki, a značycca vierniki nia mohuć źbiracca dziela prasłaŭleńnia Hospada. Jak i za savieckimi časami, supracoŭniki KDB sočać carkoŭnych rabotnikaŭ, biescyrymonna zaprašajuć ich na biasiedy ŭ svaje kabinety.

«Pravasłaŭny ateist», jak siabie mianuje A.Łukašenka, viadzie vajnu ź viernikami nie prychavana, ihnarujučy pratestanckuju reakcyju navat ad mižnarodnych strukturaŭ. Karystajučy biaźmiežnaj uładaj i biespakaranaściu, jon usčaŭ čarhovuju raspravu z carkvoju, u jakoj čalcoŭ jość bolej jak tysiača. Vučań Łukašenka hodny svaich biazbožnych nastaŭnikaŭ Lenina-Stalina, jakija hetaksama buldozerami rujnavali chramy j kidali za kraty ludziej tolki za toje, što tyja vieryli ŭ Boha.

Častka evanhielskich chryścijan z carkvy «Novaje žyćcio» abviaściła haładoŭku. Takim čynam jany chočuć pryciahnuć uvahu hramadzkaści da biazbožnych, antykanstytucyjnych dziejaŭ ułady.

Na žal, napieradzie ich čakajuć jašče bolšyja ciažkaści. Vielmi dobra viedajučy charaktar Łukašenki, śled čakać aryštaŭ haładoŭnikaŭ, prymianieńnia sił AMAPu proci ich, źbićcia, nie ździŭlusia, kali spectechnika zrujnuje budynak malitoŭnaha domu, jak heta nadoječy zrabili ŭ dačynieńni da aŭtakiefalnaje pravasłaŭnaje carkvy.

Biblija vučyć, što chryścijan časam adusiul hniatuć, ale jany nie pryhniečanyja; byvajuć u rospačnym stanie, ale nie ŭpadajuć u rospač; ich honiać, ale jany nie pakinutyja; ich valać, ale jany nia hinuć (2 Karynf. 4:8–9). My viedajem, što napieradzie ŭ Łukašenki i takich, jak jon sam, sud čałaviečy i sud Božy. Ale my jak sapraŭdnyja chryścijanie nia prahniem kryvi, ale molimsia za jaho i takich, jak jon, i prosim: «Daruj im, Boža, bo nia viedajuć, što čyniać».

Ivan Paškievič, daradca staršyni Źviazu evanhielskich chryścijan-baptystaŭ

□

Na hetuju ž temu hladzi:

– Da haładoŭki pratestantaŭ dałučylisia ŭžo 110 čałaviek (25 pastaraŭ z usioj Biełarusi źjechalisia na malitoŭnaje bohasłužeńnie ŭ carkvu «Novaje žyćcio». Da haładoŭki viernikaŭ dałučajucca dziejačy apazycyi i intelihiencyi);

– a taksama błohi Julii Daraškievič i Andreja Lankieviča.

• 0
• 0
• 0
• 0
• 0
• 0
• 0
• 0