Kolki jašče Ukraina zmoža ŭtrymlivać harady Pakroŭsk i Mirnahrad u Danieckaj vobłaści
Bajavyja dziejańni kala ahłamieracyi Pakroŭsk — Mirnahrad u Danieckaj vobłaści praciahvajucca ŭžo amal paŭtara hoda, i ŭ kancy kastryčnika Kreml abviaściŭ pra ich akružeńnie. Ale ŭkrainskija vajskoŭcy da hetaha času ŭtrymlivajuć paŭnočnyja ŭskrainy Pakroŭska i zachoŭvajuć prysutnaść u centry Mirnahrada. Jak doŭha heta moža praciahvacca, piša Bi-bi-si — Ukraina.
Minuła dva miesiacy paśla taho, jak rasijskija ŭłady abjavili pra «akružeńnie» amal 5,5‑tysiačnaj ukrainskaj hrupoŭki ŭ Pakroŭsku i Mirnahradzie (Kreml vykarystoŭvaje ich savieckija nazvy — Čyrvonaaarmiejsk i Dzimitraŭ).
«Chaču pavinšavać uvieś asabovy skład Abjadnanaj hrupoŭki vojskaŭ z hetymi vynikami. Razam z tym, jak było ŭžo adznačana, napieradzie čakaje vialikaja, składanaja praca pa likvidacyi akružanych farmiravańniaŭ praciŭnika», — zajaviŭ prezident Uładzimir Pucin 26 kastryčnika padčas sustrečy z rasijskim kamandavańniem.
Uviečary 1 śniežnia načalnik Hienštaba RF Valeryj Hierasimaŭ jašče raz dałažyŭ Pucinu ab «uziaćci» Pakroŭska, a 18 śniežnia — paŭtaryŭ heta, dadaŭšy, što ŭ susiednim Mirnahradzie praciŭnik zabłakavany i pałova horada ŭžo pad kantrolem rasijskaj armii.
Adnak padziei «na ziamli» pakazvajuć, što na hetym učastku frontu, jak i, naprykład, na kupianskim nakirunku, ułady RF paśpiašalisia abjavić pra svaje pośpiechi, faktyčna anansavaŭšy ŭziaćcie haradoŭ «u kredyt».
Što adbyvajecca ŭ Pakroŭsku
Jašče ŭ kancy kastryčnika — pačatku listapada ŭkrainskaje kamandavańnie pierakinuła reziervy na hety ŭčastak frontu, kab maksimalna zapavolić prasoŭvańnie praciŭnika. Dadatkovyja siły, u pryvatnaści, uziali z susiedniaha — dabrapolskaha — kirunku.
Hetyja dziejańni dazvolili zatarmazić rasijskija vojski, jakija dla zachopu Pakroŭska i Mirnahrada vykarystoŭvali ŭ asnoŭnym taktyku masiravanych pavietranych udaraŭ i infiltracyi nievialikich hrup piachoty.
Pavodle acenak Hienštaba USU, u cełym armija RF skancentravała na hetym učastku frontu kala 150 tys. bajcoŭ, heta značyć bolš, čym na lubym inšym.
Za minułyja tydni situacyja ŭ Pakroŭsku kardynalna nie źmianiłasia, kažuć krynicy Bi-bi-si va ŭkrainskim kamandavańni.
Rasija zamacavałasia i ŭtrymlivaje paŭdniovuju častku horada, jaki padzieleny čyhunačnymi puciami. Vajskoŭcy RF źbirajucca ŭ hetych rajonach, fatahrafujucca tut sa svaimi ściahami i dazvalajuć zdymki rasijskim vajenkaram, demanstrujučy kantrol nad terytoryjaj.
Ukrainskija siły trymajuć pad ahniavym uździejańniem paŭnočnyja kvartały, dzie pieravažna raźmieščana nizkapaviarchovaja zabudova i pryvatnyja damy. Tut jany nie dajuć praciŭniku nazapasić techniku, a taksama apierataraŭ bieśpiłotnikaŭ.
Adnak usia terytoryja centralnaj i paŭnočnaj častki Pakroŭska faktyčna źjaŭlajecca «šeraj zonaj», heta značyć, ni adzin z bakoŭ nie maje nad joj stabilnaha kantrolu z-za vialikaj kolkaści latajučych nad horadam udarnych i raźviedvalnych dronaŭ. Jany źniščajuć asabovy skład i techniku, jakaja zachodzić u hetyja rajony.
Z pačatku śniežnia armija RF krychu źmianiła taktyku na hetym učastku frontu, kažuć va ŭkrainskim kamandavańni. Pa-pieršaje, jana pačała aktyŭna «raskačvać» abaronu USU, atakujučy fłanhi Pakroŭska i Mirnahrada miechanizavanymi šturmami, a taksama pierakinuła siudy reziervy. U pryvatnaści, 76‑iu desantna-šturmavuju dyviziju.
«Niekatoryja padraździaleńni praciŭnika, jakija płanavali iści na Zaparožža, taksama byli pierakinutyja mienavita na Pakroŭsk. Čakajem, što da Novaha hoda praciŭnik pasprabuje ŭzmacnić nastup i ažyćciaŭlać aktyŭnyja šturmy, u pryvatnaści, miechanizavanyja», — zajaviŭ 21 śniežnia kamandzir 7‑ha korpusa chutkaha reahavańnia USU, hienierał Jaŭhien Łasijčuk.
U asnoŭnym miechanizavanyja šturmy rasijan na hałoŭnyja fłanhavyja kropki — vioski ŭzdoŭž tras na Paŭłahrad i Dabrapolle — pakul nie prynosiać značnaha pośpiechu dla rasijan. Ukrainskija vajskoŭcy apublikavali ŭžo niekalki videazapisaŭ źniščeńnia takich kałon praciŭnika.
Naprykład, 22 śniežnia padraździaleńni Pieršaha korpusa Nachvardyi «Azoŭ» vyjavili i źniščyli adrazu niekalki rasijskich broniekałon, jakija sprabavali prarvacca ŭ bok Dabrapolla.
U vyniku paražeńnia, pavodle danych USU, RF straciła 6 tankaŭ, 15 broniemašyn, 10 adzinak motatechniki i dziasiatki čałaviek asabovaha składu. Heta supravadžajecca videa, na jakim bačnaje źniščeńnie takich kałon.
Što adbyvajecca ŭ Mirnahradzie
Situacyja ŭ Mirnahradzie bolš składanaja, čym u Pakroŭsku. U centry horada da hetaha času zastajecca harnizon ukrainskich vajskoŭcaŭ, jakija vymušany vieści bai faktyčna ŭ poŭnym akružeńni.
Vieryfikavanaj infarmacyi pra toje, ci sapraŭdy USU ŭsio jašče ŭtrymlivajuć «kalidor» dla łahistyki hetaha harnizona, niama. Šlach prachodziŭ praź nievialikija vioski Roŭnaje i Śvietłaje, jakija znachodziacca na trasie pamiž Mirnahradam i Pakroŭskam.
Ale Rasija 7 śniežnia paviedamiła, što jaje armija zachapiła Roŭnaje, a 20 śniežnia — Śvietłaje. Ukrainskaje kamandavańnie nastojvaje, što «kalidor» usio jašče funkcyjanuje. Bolš za toje, USU nibyta prykładajuć namahańni nie tolki dla jaho ŭtrymańnia, ale i pašyreńnia.
U zajavie 7‑ha korpusa ad 24 śniežnia skazana pra ŭzmacnieńnie ŭčastka ŭ Mirnahradzie novymi siłami i srodkami. «U pryvatnaści, łahistyčnyja «kalidory» da zachodniaj častki Mirnahrada ŭzmocnienyja novymi padraździaleńniami. Heta dazvalaje nie spyniać zabieśpiačeńnie ŭkrainskich padraździaleńniaŭ na hetym nakirunku», — havorycca ŭ paviedamleńni.
Praŭda, pierymietr, jaki kantralujuć USU ŭ horadzie, u apošnija tydni značna skaraciŭsia. Ukrainskija padraździaleńni byli vymušany adyści na 5‑7 km na poŭnač ad paŭdniovych uskrain Mirnahrada.
Hienierał Łasijčuk tłumačyŭ, što heta było zroblena dla «zachavańnia ludziej».
«Heta było niaprostaje rašeńnie asabista dla mianie. Havorka išła pra važny płacdarm dla abarony Mirnahrada. Ale my vymušany byli heta zrabić dla zachavańnia žyćcia ludziej i palahčeńnia našaj łahistyki», — adznačyŭ jon.
OSINT-prajekt DeepState pakazvaje, što jak takoha pierymietra, jaki USU ŭtrymlivali ŭ Mirnahradzie, užo niama. Uvieś horad, zhodna z danymi analitykaŭ, ciapier źjaŭlajecca vialikaj «šeraj zonaj».
Pa słovach sakratara parłamienckaha kamiteta pa pytańniach nacbiaśpieki i abarony Ramana Kastenki, na hety momant Mirnahrad užo znachodzicca ŭ «apieratyŭnym akružeńni».
«Praciŭnik z dapamohaj svaich srodkaŭ trymaje horad u apieratyŭnym akružeńni, nie dazvalajučy tudy traplać łahistycy. Tam składanaja situacyja ŭ cełym», — skazaŭ jon.
U kamandavańni 7‑ha korpusa nie chavajuć, što łahistyka dla ŭkrainskaha harnizona istotna ŭskładnienaja: tolki 30% pastavak pieradajecca suchaputnym šlacham, astatniaje — pavietranym i naziemnymi dronami.
Kolki jašče možna ŭtrymlivać hetyja harady i dla čaho?
Raman Kastenka nazyvaje situacyju ŭ Pakroŭska-Mirnahradskaj ahłamieracyi «asabliva ciažkaj».
Adnak ukrainskaje kamandavańnie ŭsio jašče praciahvaje ŭtrymlivać svaje harnizony ŭ hetych haradach. Vajskoŭcy vymušany vieści źniasilvajučyja haradskija bai faktyčna ŭ situacyi poŭnaha akružeńnia.
Vyvieści ŭkrainskich vajskoŭcaŭ z hetych haradoŭ niekatoryja palityki i vajennyja dziejačy zaklikali jašče ŭ pačatku listapada. Adnak Hienštab USU vybraŭ inšy płan dziejańniaŭ.
Hałoŭnakamandujučy USU Alaksandr Syrski naŭprost zajaŭlaje, što meta — vymatać praciŭnika i spynić jaho prasoŭvańnie. Akramia taho, pavodle jaho słoŭ, kala Pakroŭska ŭkrainskim siłam navat udajecca pierachoplivać inicyjatyvu i vyzvalać terytoryi.
«Ukrainskija padraździaleńni trymajuć abaronu i pierachoplivajuć inicyjatyvu. U vyniku kontrnastupalnych dziejańniaŭ viarnuli kantrol nad 16 kv. km u paŭnočnaj častcy horada. Taksama adbili 56 kv. km terytoryi ŭ rajonach nasielenych punktaŭ Hryšyna, Kotlina, Udačnaje na zachad ad Pakroŭska», — zajaviŭ jon 17 śniežnia.
Sapraŭdy, «zachrasańnie» rasijskaj armii ŭ bajach za Mirnahrad i Pakroŭsk vidavočna nie ŭvachodziła ŭ płany Hienštaba RF.
Kali b hetaja ahłamieracyja pała da pačatku zimy, to dla rasijskich vajskoŭcaŭ hetyja bujnyja pramysłovyja harady z vyšynnaj zabudovaj stali b zručnym łahistyčnym centram dla nazapašvańnia vojskaŭ i techniki, a taksama płacdarmam dla dalejšaha ruchu ŭ bok administracyjnych miežaŭ Danieckaj vobłaści.
Uličvajučy, što apošniaj bolš-mienš istotnaj pieraškodaj tut moža być tolki horad Dabrapolle, nie vyklučana, što hetych miežaŭ rasijanie dasiahnuli b dastatkova chutka.
Akramia taho, vidavočnaja iłžyvaść zajaŭ Kramla pra poŭny kantrol nad Pakroŭskam i Mirnahradam maje i palityčnaje značeńnie.
Prynamsi, na heta źviartaje ŭvahu były hałoŭkam USU (u 2014‑19 hadach) Viktar Muženka. Na jaho dumku, efiektyŭnyja dziejańni USU ŭ hetych haradach byli adnym z faktaraŭ, jakija paŭpłyvali na rašeńnie Jeŭrapiejskaha sajuza vyłučyć Ukrainie 22 śniežnia biespracentny kredyt u pamiery 90 młrd jeŭra.
«Kali b my zdali Pakroŭsk i Mirnahrad i nie było b apieracyi pa vyzvaleńni Kupianska, to, vidać, debaty (z nahody kredytu. — Red.) praciahvalisia b i dahetul. Heta značyć, nie było b davieru da Ukrainy, da ŭkrainskaj armii, jaje zdolnaści strymać voraha», — ličyć były hałoŭkam.
Ale kolki jašče času ŭkrainskaja armija zmoža ŭtrymlivać hetuju ahłamieracyju? Mierkavańni z hetaj nahody razychodziacca. Naprykład, vajenny analityk Kanstancin Mašoviec ličyć, što čas dla «biazbolnaha» vyvadu USU ź Mirnahrada ŭžo ŭpuščany ŭ kancy listapada.
Ale kamandzir Pieršaha asobnaha šturmavoha pałka Dźmitryj Fiłataŭ (pazyŭny «Piarun»), jaki viadzie bai na hetym učastku frontu, upeŭnieny, što abarona Pakroŭska jašče zaciahniecca na niekalki miesiacaŭ.
«Ci stracim my Pakroŭsk? Z ulikam ciapierašniaha chodu padziej — tak, dumaju, dzieści viasnoj — u siaredzinie viasny. Kali ničoha nie źmienicca i ŭsio budzie iści jak idzie», — vykazaŭ svajo mierkavańnie kamandzir.
Dla paraŭnańnia, apieracyja pa ŭziaćci rasijanami bujnoha pramysłovaha horada Aŭdziejeŭki doŭžyłasia 4 miesiacy — ź siaredziny kastryčnika 2023 hoda da 16 lutaha 2024 hoda. Ukrainskija padraździaleńni taksama viali bajavyja dziejańni ŭ paŭakružeńni i zmahli vyjści z horada pa łahistyčnym kalidory tolki ŭ apošni momant i tolki dziakujučy pierakidańniu dadatkovych sił na hety nakirunak.
Kamientary