«Nie paviazu». Taksist u Minsku admoviŭsia vieźci dzicia

Ale kiroŭca «raźviarnuŭ» pasažyraŭ, paraiŭšy vyklikać taryf «Dziciačy». A ŭ Julii z apošnim nieadnarazova ŭźnikali prablemy: pryjazdžali, jak śćviardžaje dziaŭčyna, aŭtamabili nie ŭ najlepšym techničnym stanie, piša Onliner.by.

— Pazaŭčora dačka razam sa svajoj babulaj jechali na jołku ŭ Nacyjanalnuju biblijateku. Kali ja sama jezdžu ź dziciem u taksi, to važu z saboj bustar (mahčyma, tamu mnie jašče ni razu nie admaŭlali ŭ pajezdcy). Ale hetym razam było niezrazumieła, ci možna budzie pakinuć bustar u harderobie, tamu nie chaciełasia «nahružać» im babulu-piensijanierku.

Impreza skončyłasia, ja pačała vyklikać taksi. Adznaču: dla dački zaŭsiody vybiraju mienavita «Biznes» — tam adekvatnyja kiroŭcy i biaśpiečnyja mašyny. Byŭ u mianie dośvied i z taryfam «Dziciačy»: adnojčy pryjechała mocna znošanaja i brudnaja Honda Civic ź niervovym kiroŭcam. Ja dahetul dobra pamiataju tuju pajezdku — jak mužčyna hazavaŭ, kab nie zahłuchnuć! Paśla pa «Dziciačym» da mianie taksama pryjazdžali vielmi śpiecyfičnyja mašyny. Mnie navat sami kiroŭcy tłumačyli: hety taryf — apošni šaniec dla niekatorych, kab nie być adklučanymi ad servisu. U ich z-za nizkaha rejtynhu mała zakazaŭ, dyk jany «ŭpichvajuć» aŭtakresła — i praciahvajuć zarablać. Darečy, u «Biznesu» raniej zaŭsiody byli bustary, ale ciapier ich niama.

Viartajučysia da pazaŭčorašniaj situacyi, Julija raskazvaje: abstanoŭka ŭ horadzie była napružanaja. Darohi zahružanyja, taryfy pavyšanyja… Dziaŭčyna sprabavała znajści «Biznes» z bustaram, ale dvojčy vyklikalisia kiroŭcy bieź ich, i jana admianiała pajezdku. Paralelna manitoryła dziciačy taryf sa spadzievam «vyłavić» dobruju mašynu. Ale takaja stratehija vyniku nie dała. Tady Julija ŭsio ž spyniłasia na «Biznesie».

— Padumała: chacia b mašyna pryjedzie nadziejnaja. Karaciej, zakazała, mnie pryjšło apaviaščeńnie, što mašyna jedzie. Babula z unučkaj vyjšli da prypynku. Dzicia paśla śviata, zrazumieła, prybranaje, ale nie vielmi ciopła apranutaje — dakładna nie dla doŭhaj prahułki.

I tut mnie prylataje paviedamleńnie ad kiroŭcy: bustara ŭ jaho niama, dzicia nie paviazie. Paraiŭ vybrać taryf «Dziciačy». Ja arhumientavała svajo niežadańnie vyklikać hety taryf, ale kiroŭca tolki adkazaŭ: dziaciej nie vozić.

Pavialičyć

Sam zakaz jon nie admianiaŭ, čakaŭ, kali heta zrablu ja. Ja, zrazumieła, nie mahła iści na pryncyp: dzicia z babulaj, paŭtarusia, užo mierźli na prypynku. Vyklikała jašče adnu mašynu — jana pryjechała praz 15 chvilin, vadziciel u pajezdcy nie admoviŭ. Babula z unučkaj ščaśliva dabralisia dadomu.

Mianie zasmučaje toje, što niama mahčymaści vieźci dzicia ŭ kreśle/bustary i pry hetym u dobraj mašynie. Davodzicca vybirać pamiž kresłam i kamfortnym i biaśpiečnym aŭto. Kali čytaješ historyi, jak niejki pjany kiroŭca Mercedes «raskłaŭ» Skoda na M2, dzie było aŭtakresła, ale ad samoj mašyny ničoha nie zastałosia, a Mercedes — ceły (jak i ŭsie, chto ŭ im jechaŭ), razumieješ, što bustar/aŭtakresła — nie panaceja.

Ci mieŭ prava kiroŭca taksi admaŭlać u pajezdcy ź dziciem?

Spačatku źvierniemsia da PDR, a dakładniej — da punkta 178. U aŭtamabili-taksi dziaciej možna pieravozić biez utrymlivajučych pryład. I vadziciel taksi nie moža admović u pieravozcy pasažyra ź dziciem, što nieadnarazova tłumačyli ŭ Mintransie i Transpartnaj inśpiekcyi.

Adnak kanflikty niaredkija: taksisty, ubačyŭšy siarod patencyjnych pasažyraŭ dzicia, časam admaŭlajuć u pajezdcy, spasyłajučysia na adsutnaść u ich aŭtakresła i mahčymaść atrymać štraf ad DAI. Žurnalisty «Anłajniera» ŭžo źviartalisia ŭ Dziaržaŭtainśpiekcyju pa kamientar nakont takich situacyj. Tam tłumačyli: kali supracoŭnik DAI bačyć, što dzicia viazuć biez aŭtakresła, jon vyśviatlaje ŭsie abstaviny, u tym liku pytajecca ŭ vadziciela, ci pracuje toj u taksi. Kali vadziciel kaža, što nie (tak raniej vielmi časta rabili tyja, u kaho nie ŭsio ŭ paradku z dakumientami), jaho štrafujuć pavodle č. 5 art. 18.14 KaAP — za parušeńnie praviłaŭ pieravozki pasažyraŭ.

Atrymlivajecca, adkaz na pastaŭlenaje pytańnie vidavočny. Adnak Julija dasłała redakcyi adkaz ad słužby padtrymki servisu na jaje skarhu: tam paviedamili, što vadzicielu aŭtaparka-partniora «Jandeksa» dazvolena admaŭlacca (vidać, pavodle ŭnutranych praviłaŭ) ad pajezdki, kali pasažyr nie vybraŭ taryf «Dziciačy». Ułasna, padobna, praz takija razychodžańni i ŭźnikajuć nieparazumieńni. Adnak u vypadku, kali pasažyr napiša skarhu ŭ Transpartnuju inśpiekcyju na kiroŭcu, rašeńnie budzie prymacca ŭ adpaviednaści z zakonam.

Pavialičyć

• 2
• 0
• 5
• 0
• 0
• 0
• 1
• 0