Fanaty «Dynama»: «Nienavidzim režym»

Na futbolnym matčy «Biełšyna» — «Dynama» (Minsk) 27 maja paśla zabitaha hołu dynamaŭcy padbiehli da trybuny svaich fanataŭ, paśla čaho AMAPaŭcy pačali adhaniać fanataŭ hazam i adšturchoŭvać. Adzin sa śpiecnazaŭcaŭ raspyliŭ bałon z hazam. Pry hetym haz trapiŭ na piacihadovaha chłopčyka. Paśla hetaha fanaty pačali skandavać «Nienavidzim režym».

U minułuju piatnicu na babrujskim stadyjonie «Spartak» dychańnie pierachoplivała jak ad pierypietyj matču «Biełšyna» — «Dynama» (Minsk), tak i ad ślezaciečnaha hazu, jaki niečakana ŭžyli achoŭniki pravaparadku. Paciarpieli zaŭziatary staličnaj kamandy, u tym liku i 5-hadovaje dzicia. Hłynuli hazu i futbalisty. Goals.by daviedaŭsia padrabiaznaści hetaj historyi, hierojem jakoj staŭ praparščyk Uładzimir Recikaŭ.

Na 67-j chvilinie matču dynamaŭski brazilec Ledesma zabiŭ u varoty «Biełšyny» hoł-pryhažun, jaki ŭ vyniku i staŭ pieramožnym. Futbalisty staličnaj kamandy pabiehli da trybuny, jakuju zajmali fanaty minčukoŭ. Zaŭziatary pamknulisia nasustrač. Idyliju parušyli supracoŭniki mahiloŭskaha śpiecnaza (jany zvyčajna supravadžajuć pryjezdžych amataraŭ futboła ŭ Babrujsku). Adzin z pravaachoŭnikaŭ, mabyć, adčuŭšy pahrozu, užyŭ ślezaciečny haz. Jak vynik — jość paciarpiełyja.

Baćka paciarpiełaha chłopčyka: «Paśpieŭ zatulić syna»

Juryj voś užo 12 hadoŭ aktyŭna padtrymlivaje minskaje «Dynama» — i doma, i na vyjaznych matčach. Apošnija dva-try hady jon biare z saboj na stadyjon syna. Dakładniej, braŭ.

— Kali naša kamanda zabiła treci hoł, naturalna, usie pačali śviatkavać pośpiech. Niekatoryja fanaty trochi padbiehli nasustrač futbalistam, pakinuŭšy trybunu. Choć na pole nichto nie pabieh, i navat dumak takich nie było.

Ale adzin amapaviec u krapavym bierecie, ničoha nie tłumačačy, z krykam «Stajać, suki!» staŭ palivać usich hazam.

U hety momant my ź dziciem znachodzilisia na pieršym šerahu. Ubačyŭšy bałon u rukach amapaŭca, paśpieŭ zakryć syna. U vočy haz nie trapiŭ, ale tvar dobra abpaliła. Dzicia ŭ šoku! Nas dastavili ŭ miedpunkt, dzie pramyli tvar vadoj. Na praciahu hadziny ŭsie prajšło. Ale skažycie, jak dzicia ciapier zmoža chadzić na futboł? Paśla taho, što zdaryłasia ŭ jaho nazirajecca niehatyŭnaja reakcyja na ludziej u formie. Kali adzin supracoŭnik milicyi padbieh dapamahčy, syn staŭ kryčać: «Nie padychodźcie da mianie!» Uličvajučy toje, što zdaryłasia, na fanacki siektar ź dziciem bolš nie pajdu.

Nie viedaju, kudy źviarnucca, kab atrymać acenku dziejańniam supracoŭnika AMAPu. Choć vydatna razumieju, što ŭ našaj krainie budzie składana dakazać vinu hetaha čałavieka. Chto daŭ jamu prava ŭžyvać ślezaciečny haz?! Da taho ž jon vydatna bačyŭ, što ŭ pieršym šerahu znachodzicca dzicia. Tolki praparščyka Recikava Uładzimira Michajłaviča heta nie spyniła.

Jon potym mnie skazaŭ: «Kali na mianie biažyć natoŭp, usio roŭna, chto tam znachodzicca — dzieci ci žančyny».

Za 12 hadoŭ, što naviedvaju vyjaznyja matčy, užo stolki nahledzieŭsia na samavolstva milicyi, tamu ŭžo ničomu nie dziŭlusia. U Barysavie navat dzicia nie vypuskali ŭ prybiralniu.

Adhavorka prostaja: «U mianie zahad. Mnie ŭsio roŭna — dzicia, žančyna abo babula».

Razumiejecie, u čužym horadzie da pryjezdžych zaŭziataraŭ staviacca jak da kryminalnikaŭ, niby my ludzi nižejšaha hatunku. Choć siarod maich znajomych mnohija z vyšejšaj adukacyjaj, zajmajuć dobryja pasady. Voś ja źjaŭlajusia techničnym dyrektaram pryvatnaj STA.

My pryjazdžajem na svaich aŭtamabilach, zaŭsiody ćviarozyja, ale ad hetaha staŭleńnie milicyi da nas nie źmianiajecca.

Michaił Afanaśjeŭ: «Nie davodziłasia sutykacca z takimi vypadkami»

Siarod inšych futbalistaŭ raździalić radaść ad pieramožnaha hoła ŭ varoty «Biełšyny» chacieŭ paŭabaronca «Dynama» Michaił Afanaśjeŭ. Jon padbieh da trybunaŭ, i razam z prychilnikami staličnaj kamandy hłynuŭ ślezaciečnaha hazu.

— Paśla treciaha zabitaha hała my padbiehli radavacca da našaha fan-siektaru. Adzin amapaviec užyŭ hazavy bałon. Choć i niašmat, ale haz trapiŭ mnie ŭ rot — potym dychałasia ciažka. Nakolki viedaju, chłopčyku, jaki pryjechaŭ na futboł u Babrujsk z baćkam, navat spatrebiłasia miedycynskaja dapamoha.

Kali ščyra, za ŭsiu svaju karjeru nie davodziłasia sutykacca z takimi vypadkami.

Alaksandr Černik: «Amapaviec zasłuhoŭvaje pakarańnia»

Hałoŭny śpiecyjalist upraŭleńnia pa praviadzieńni spabornictvaŭ ABFF Alaksandr Černik paabiacaŭ, što vinavatyja ŭ incydencie abaviazkova buduć pakaranyja. Praŭda, nie adkazaŭ, jak i kali. Chočacca vieryć, što tak i adbudziecca, choć niezrazumieła, jak fiederacyja moža ŭpłyvać na pravaachoŭnikaŭ.

Dumaju, hety čałaviek budzie pryciahnuty da adkaznaści.

Pryniaćcie kančatkovaha rašeńnia zastajecca za kiraŭnictvam padraździaleńnia, dzie słužyć hety supracoŭnik pravaachoŭnych orhanaŭ.

— Daviedaŭsia pra vypadak u Babrujsku ŭ paniadziełak — niepryjemny incydent. Na majoj pamiaci heta pieršy padobny vypadak. Naturalna, pa fakcie zdareńnia budzie pravodzicca rasśledavańnie jak z boku fiederacyi, tak i z boku milicyi. Mahu skazać, što dziejańni supracoŭnika mahiloŭskaha śpiecnaza źjaŭlajucca niepravamiernymi. Dumaju, hety čałaviek budzie pryciahnuty da adkaznaści. Pryniaćcie kančatkovaha rašeńnia zastajecca za kiraŭnictvam padraździaleńnia, dzie słužyć hety supracoŭnik pravaachoŭnych orhanaŭ.

Kali brać u cełym naša hramadstva, to zakony dla ŭsich choć i adnolkavyja, ale za adny i tyja ž złačynstvy kožny atrymlivaje roznyja terminy. Ciažka adkazać, ci mohuć zvolnić takoha supracoŭnika.

Nieabchodna hladzieć, nakolki jon pieravysiŭ svaje paŭnamoctvy. Ja nie maju prava razvažać pa hetaj padstavie. Amapaviec zasłuhoŭvaje pakarańnia — heta biassprečna. Jakoha? Nie mahu adkazać, bo nie zajmajusia dadzienymi pytańniami. Pačynajučy ź siońniašniaha dnia budziem sačyć za chodam spravy. Jak tolki źjavicca pieršaja infarmacyja, navina źjavicca na aficyjnym sajcie ABFF. U lubym vypadku, rasśledavańnie pravodzić nie fiederacyja, a milicyja.

Darečy, Alaksandr Černik sam pracavaŭ u sistemie MUS, jaho zvańnie — pałkoŭnik zapasu. Tak što ab pravamiernaści prymianieńnia śpiecsrodkaŭ hety čałaviek moža mierkavać z poŭnaj padstavaj.

Pradstaŭnik milicyi: «Na adras supracoŭnikaŭ było skazana niešta abraźlivaje»

Svaja praŭda ŭ mahiloŭskaj milicyi, jakoj treba budzie razabracca ŭ tym, što zdaryłasia. Namieśnik načalnika ŭpraŭleńnia achovy pravaparadku i prafiłaktyki Mahiloŭskaha UUS Dźmitryj Parkoŭ prakamientavaŭ toje, što adbyłosia na stadyjonie ŭ Babrujsku. Da piaci hadzin paniadziełka Dźmitryj Ivanavič abiacaŭsia dać bolš hruntoŭnuju infarmacyi incydentu, ale, mabyć, nie zachacieŭ. Na telefanavańni jon bolš nie adkazaŭ.

— Zabiŭšy hoł, futbalisty minskaha «Dynama» padbiehli da haściavoha fanackaha siektaru. Zaŭziatary, u svaju čarhu, rynulisia na pole. Adnaho navat złavili na biehavoj darožcy. Naturalna, supracoŭniki milicyi nie puścili fanataŭ, viarnuŭšy ich na trybunu. Paśla hetaha na adras supracoŭnikaŭ było vykazana niešta abraźlivaje.

— Svaju niezadavolenaść fanaty vykazali da zachadaŭ, pryniatych mahiloŭskim śpiecnazam?

— Nie hatovy adkazać. Choć, dumaju, paśla. Usio ž taki jany pasprabavali vybiehčy na pole, a ich nie puścili.

Nichto nie źbiraŭsia vybiahać na pole…

— Jak mnie skazali, adnaho čałavieka zatrymali na biehavoj darožcy. Jon irvanuŭsia ŭ kirunku pola.

— Čamu ŭ dačynieńni fanataŭ byŭ užyty ślezaciečny haz?

— Pakul nie hatovy skazać, tak jak nie ŭ kursie ŭsiaho taho, što zdaryłasia.

Sardečna zaprašajem u Mahiloŭ!

Adznačym, što mahiloŭski śpiecnaz u hetym futbolnym siezonie ŭžyvaje śpiecsrodki druhi raz. Na matčy pieršaha tura čempijanatu krainy pamiž «Dniaprom» i «Minskam» suprać pryjezdžych fanataŭ taksama byli prymienieny haz i dubinki.

Varta skazać, što mahiloŭskaja milicyja pa-asablivamu adorvaje pryjezdžych zaŭziataraŭ. Adzin ź ich raspavioŭ,

Jak u dzień praviadzieńnia matču «Dniapro» — «Dynama» (Minsk) supracoŭniki pravaachoŭnych orhanaŭ nie puskali aŭtamabili ź minskimi numarami ŭ Mahiloŭ.

• 0
• 0
• 0
• 0
• 0
• 0
• 0
• 0