Jak buduć raźvivacca padziei, kali Maskva znoŭ, jak i ŭ 2022, pačnie nanosić udary pa Kijevie z terytoryi Biełarusi? Mahčymyja scenary

Aficyjny dyskurs Maskvy zastajecca niaźmienny: vajna da pieramožnaha kanca, mety apieracyi (poŭny kantrol nad Ukrainaj i źmiena bałansu siłaŭ u Jeŭropie) buduć dasiahnutyja, čaho b toje ni kaštavała i kolki b času ni zaniało.

Adnak u realnaści Rasija maje prablemy i na froncie, i z padtrymkaj vajny nasielnictvam. Prasoŭvańnie rasijskaha vojska spyniłasia. Straty na froncie, imavierna, pieraŭzychodziać užo prytok kantraktnikaŭ. Uzrovień vajennaha entuzijazmu źniziŭsia, rasijanie stomlenyja ad vajny. Rasii patrebny novy faktar, kab pierałamać chod kanfliktu. Navat kab nie pierałamać, a prosta nie dapuścić adstupleńnia, zachavać situacyju vajny na źniasilvańnie, u čakańni asłableńnia Ukrainy i Zachadu, Rasii moža spatrebicca novaja chvala mabilizacyi. A kab nie dapuścić paŭtoru lutaha 1917 hoda, patrebna štości, što padniała b vieru ŭ pieramohu.

Analityki dapuskajuć mahčymaść eskałacyi Rasijaj situacyi na miažy z krainami NATA dla apraŭdańnia mabilizacyi, kab možna było zahałasić: «Otiečiestvo v opasnosti». I tady pytańnie, ci Maskva zahadaje biełaruskamu vojsku ŭziać udzieł u takoj eskałacyi i što heta moža saboj ujaŭlać.

U svaju čarhu, Ukraina nastojliva papiaredžvaje pra mahčymaść eskałacyi na paŭnočnym kirunku, z boku Biełarusi.

Minuły tydzień adznačyŭsia praviadzieńniem Rasijaj jadziernych vučeńniaŭ, padčas jakich adpracoŭvałasia dastaŭka atamnych bojehałovak u Biełaruś. Paśla hetaha 22 maja prezident Ukrainy Uładzimir Zialenski pravioŭ razmovu z kiraŭnikami Hiermanii, Francyi i Vialikabrytanii, na jakoj siarod inšaha abmiarkoŭvałasia i biełaruskaje pytańnie.

24 maja adbyłasia telefonnaja razmova Alaksandra Łukašenki i prezidenta Francyi Emanuela Makrona. Jak paviedamiła AFP sa spasyłkaj na krynicu ŭ Jelisiejskim pałacy, Emanuel Makron naŭprost papiaredziŭ Alaksandra Łukašenku pra nastupstvy ŭciahvańnia ŭ rasijskuju ahresiju. Heta pieršy viadomy telefonny kantakt palitykaŭ za bolš čym čatyry hady.

Minsk paviedamiŭ, što razmova adbyłasia ź inicyjatyvy francuzskaha boku.

Zdavałasia b, niama racyjanalnych padstaŭ, kab režym Łukašenki ŭciahnuŭsia na baku Rasii ŭ vajnu, u jakoj Maskva bieznadziejna zaviazła. Kali Łukašenka nie ŭviazaŭsia ŭ 2022-m, kali Maskva raźličvała zaniać Kijeŭ za 3—4 dni, to jakaja łohika leźci ŭ spravu, jakaja zapachła kierasinam? Vajna pryniesła b razbureńni i ekanamičnyja straty, a pry najhoršym scenary moža skončycca i narodnym paŭstańniem pry padtrymcy vojska.

Taki samy racyjanalny analiz kaža, što Ukrainie nie treba, kab adkryŭsia druhi front. Ciapier Ukraina ŭ vajskovym płanie macniejšaja, čym u 2022-m, i taktyka viadzieńnia vajny źmianiłasia. Ukraina maje pieravahu ŭ bieśpiłotnikach małoj dalnaści i blizkaja da parytetu ŭ bieśpiłotnikach vialikaj dalnaści. Adnak Ukraina aščadžaje reziervy.

Što zdarycca, kali Maskva, jak i ŭ 2022-m, pačnie nanosić udary pa poŭnačy Ukrainy i Kijevie, u pryvatnaści, z terytoryi Biełarusi? Vymusiŭšy zhodu Minska ci prosta pastaviŭšy Minsk pierad faktam?

U 2022‑m Kijeŭ ustrymaŭsia ad udaraŭ u adkaz pa terytoryi Biełarusi. Zaraz Kijeŭ budzie kiravacca vajennaj metazhodnaściu. Pradstaŭniki Ukrainy niekalki razoŭ pahražali, što ŭdary ŭ adkaz, a mahčyma i previentyŭnyja ŭdary, kali pahroza stanie niaŭchilnaj, hetym razam buduć naniesienyja. «Siły abarony Ukrainy, Siły biaśpieki i našy śpiecsłužby viedajuć, u čym pahrozy i jak reahavać — jak reahavać spraviadliva, biez sumnievaŭ», — zajaviŭ Uładzimir Zialenski.

Kiraŭnik Siłaŭ bieśpiłotnych sistem Ukrainy Robiert Broŭdzi byŭ jašče bolš rezki: «Minskamu haŭlajtaru Łukašesku, — napisaŭ jon u siabie ŭ fejsbuku. — Pieršyja 500 celaŭ užo na ałoŭku. Biaspłatnaja i vielmi praktyčnaja parada: nie leź na vočy Ukrainie».

Pytańnie, ci ŭ vypadku takoha abmienu ŭdarami Łukašenka zadziejničaje biełaruskija Uzbrojenyja siły i nakolki maštabna. Ci moža heta zaležać ad vybaru Ukrainaj svaich celaŭ dla ŭdaraŭ?

Zrešty, usio heta moža być i dym biez ahniu, jaki Maskva puskaje, kab adciahnuć častku ŭkrainskich siłaŭ ad asnoŭnaha teatra vajennych dziejańniaŭ.

• 3
• 1
• 0
• 0
• 1
• 0
• 2
• 0