Biełaruś zadziejničała avijacyju dla źbićcia dronaŭ, jakija zalatajuć u Viciebskuju vobłaść 

Žychary Viciebskaj vobłaści ŭ apošnija dni nazirali pracu šturmavych samalotaŭ, jakija źbivali bieśpiłotniki, što ruchalisia nad vobłaściu. Pra heta «Našaj Nivie» paviedamili niekalki čytačoŭ.

Ludzi identyfikavali samaloty jak Su-25. Hety šturmavik pryznačany jak dla baraćby z naziemnymi celami, tak i dla źbićcia małachutkasnych pavietranych abjektaŭ. «Naša Niva» nie maje videa ci fota, kab pravieryć hetuju infarmacyju.

Apošnija tydni fiksujecca šmat zalotaŭ dronaŭ z Rasii ŭ Biełaruś i pamiežnyja rajony Bałtyi. Niajasna, ci heta ŭkrainskija drony, jakija źbivajucca z maršrutaŭ pad uździejańniem rasijskich srodkaŭ REB, ci Rasija zapuskaje drony metava pad vyhladam ukrainskich, kab testavać reakcyju krain NATA i padtrymlivać napružanaść.

Publična paviedamlałasia pra niekalki incydentaŭ. U realnaści ich, miarkujučy pa ŭsim, u dziasiatki razoŭ bolš. Ułady Biełarusi ničoha aficyjna nie paviedamlajuć, miascovym ŚMI zabaroniena pra incydenty pisać. 

Viadoma, što 17 maja na terytoryi Biełarusi ŭpaŭ bajavy dron. Jon nie ŭzarvaŭsia sam, siłaviki padarvali jaho na miescy. Heta zdaryłasia na poŭdzień ad Hłybokaha. 

18 maja dron z vybuchoŭkaj byŭ abiasškodžany va Ucianskim rajonie Litvy — heta kala miažy ź Biełaruśsiu.

23 maja kala vioski Janava Sieńnienskaha rajona ŭpaŭ BPŁA, pry padzieńni paškodziŭšy liniju elektrapieradač.

Pracu biełaruskaj avijacyi nazirali ŭ niekalkich rajonach Viciebskaj vobłaści ŭ 20‑ch dniach maja.

20 maja pavietranaja tryvoha abviaščałasia ŭ stalicy Litvy i ŭschodnich rajonach krainy. Kiraŭnictva krainy pieramiaściłasia ŭ schoviščy. Paźniej kamandujučy suchaputnymi siłami vojska Litvy paviedamiŭ, što ab nabližeńni pavietranych abjektaŭ susiedniuju krainu papiaredzili biełaruskija vajskoŭcy. Abjekt ci abjekty ruchalisia prykładna ŭzdoŭž miažy miž krainami i źnikli z radaraŭ u rajonie prykładna miž biełaruskim Voranavam i litoŭskaj Mieračču. 

21 maja pavietranuju prastoru Litvy mahli parušyć dva bieśpiłotniki. Pavietranuju tryvohu abviaščali va Ucianskim rajonie na miažy z Łatvijaj i Biełaruśsiu. Bieśpiłotniki paźniej źnikli z radaraŭ, miesca ich padzieńnia nieviadomaje.

23 maja bajavy dron na vačach u miascovych žycharoŭ upaŭ u voziera Drydzis u Krasłaŭskim krai prykładna za 15 km ad miažy Biełarusi. Pry kantakcie z vadoj jon detanavaŭ, ahłušyŭ rybu ŭ voziery. Ludzi byli daloka i nie paciarpieli.

Adna ź viersij taho, čamu apošnija dni bajavyja drony masava zalatajuć u Biełaruś, — uklučeńnie novych mahutnych srodkaŭ REB na zachadzie Rasii. Jany jak «mahnit» źbivajuć kurs bieśpiłotnikaŭ na bolš zachodni. Ale nielha vyklučać i naŭmysnych pravakacyj Maskvy z metaj eskałacyi kanfliktu i stvareńnia psichałahičnaha fonu dla praviadzieńnia masavaj mabilizacyi ŭ rasijskuju armiju, jakaja apošnim časam pakutuje ad niedachopu žyvoj siły.

Dziaržaŭny sakratar Rady biaśpieki Biełarusi Alaksandr Valfovič 26 maja ŭ Maskvie na pasiadžeńni Kamiteta sakrataroŭ rady biaśpieki ADKB abvinavaciŭ u parušeńni pavietranaj prastory Ukrainu.

«Štodnia našymi srodkami SPA fiksujecca rehularnaje pierasiačeńnie hranicy Biełarusi i Ukrainy bajavymi BPŁA i ich padzieńnie na našy terytoryi. U niekatorych vypadkach heta nie vypadkovyja ataki, a sproby parazić elemienty pamiežnaj infrastruktury, prykryvajučysia nibyta vypadkovymi zalotami. Tolki za apošni tydzień ich było 116. Dziažurnyja siły pa ich prymianialisia 59 razoŭ», — skazaŭ Alaksandr Valfovič. Nieviadoma, ci apošni skaz aznačaje źbivańnie, ci prosta reahavańnie.

Pres-sakratar Dziaržaŭnaj pamiežnaj słužby Ukrainy Andrej Dziemčanka nazvaŭ hetyja słovy Alaksandra Valfoviča absurdnymi.

«Šmat niejkich absurdnych słoŭ pra situacyju va Ukrainie i što štodnia jany srodkami SPA fiksujuć rehularnaje pierasiačeńnie miažy z našaj dziaržavy bajavymi BPŁA. Tolki za apošni tydzień «naličyli» 116. U mianie pytańnie — heta ž kolki davodziłasia siabie strymlivać, kab maŭčać pra takija «pravakacyi» ŭkraincaŭ. I da taho ž ich SPA, peŭna, moža fiksavać tolki ŭkrainskija srodki, bo toje, što zalataje va Ukrainu ź Biełarusi, jany čamuści nie fiksujuć», — skazaŭ pradstaŭnik ukrainskich pamiežnikaŭ.

Instrukcyi hramadzianskaj abarony rajać: kali vy nazirajecie nabližeńnie drona ci kali abvieščanaja pavietranaja tryvoha, ukryjciesia ŭ schoviščy, sutareńni, a kali heta niemahčyma, to ŭ pamiaškańni biez voknaŭ ci dalej ad voknaŭ.

• 0
• 0
• 0
• 0
• 2
• 1
• 1
• 0