Redaktar sajtu nn.by uhanaravany premijaj imia Lorenca Natali.
Redaktar sajtu nn.by uhanaravany premijaj imia Lorenca Natali.
Andrej Dyńko staŭ laŭreatam premii imia Lorenca Natali za 2006 hod. Hetaja premija prysudžajecca za najlepšy artykuł. Dyńko staŭ pieršym u historyi premii centralnaeŭrapiejskim žurnalistam, uhanaravanym joju.
Heta mižnarodnaja ŭznaharoda dla pišučych žurnalistaŭ z usiaho śvietu. Premija prysudžajecca za artykuł, napisany ciaham minułaha hodu, jaki čaplaje prablemy abarony demakratyi i pravoŭ čałavieka.
Andrej Dyńko byŭ naminavany za jahony akreścinski dziońnik. Jon napisaŭ jaho ŭ sakaviku 2006 hodu i pieradaŭ na volu. Tvor byŭ apublikavany ŭ “Našaj Nivie” jašče da taho, jak Dyńko vyjšaŭ na svabodu. Pad zahałoŭkam “Terapija achviarnaściu. List ź mienskaj turmy” jaho pierakłali na vosiem eŭrapiejskich movaŭ. Jon byŭ apublikavany u takich značnych vydańniach, jak “Frankfurter alhiemajne cajtunh”, “Respekt”, eurozine.com. Praź jaho ŭdałosia nanoŭ źviarnuć uvahu śvietu na Biełaruś.
Sioleta na premiju imia Natali pretendavali 1529 piśmieńnikaŭ i žurnalistaŭ z 165 krainaŭ z usich kantynentaŭ.
Adbor adbyvajecca ŭ try etapy. Na pieršym usie pradstaŭlenyja na konkurs tvory čytajuć studenty. Hetym razam hetym zajmalisia navučency Vyšejšaj škoły žurnalistyki z Berlina. Studenckaje žury adbiraje 50 najmacniejšych materyjałaŭ. Paśla hetaha za spravu biarecca žury, składzienaje napałovu z žurnalistaŭ ź piaci kantynentaŭ, a napałovu z prafesaraŭ žurnalistyki i pravaabaroncaŭ. Jaho hanarovaj staršynioju była sioleta Femi Okie, viadoŭca afrykanskaje prahramy kanału Si-En-En.
Žury vybiraje 15 pieramožcaŭ ź piacidziesiaci, pa try ad kožnaha kantynentu, akramia Paŭnočnaj Ameryki. U asobny “maciaryk” vyłučany arabski śviet. Cyrymonija ŭznaharodžańnia adbyvajecca ŭ pres-centry Eŭrakamisii ŭ Bruseli, u ramkach śviatkavańnia Dnia svabody presy.
Hran-pry atrymała Li Siu Inh z anhłamoŭnaj hazety Hankonhu za repartaž pra bunt suprać karumpavanaha staršyni sielsavietu ŭ viosačcy na poŭdni Kitaju.
Pieršaja premija ŭ eŭrapiejskim rehijonie adyšła žurnalistu z Šatlandyi. Jon zrabiŭ repartaž pra ŭmovy pracy budaŭnikoŭ u Dubai. Druhaja – Andreju Dyńku. Treciaja – reparcioru “Špihielu”. Jon tajna pierajšoŭ meksykanska-amerykanskuju miažu razam ź nielehalnymi mihrantami.
“Jość ironija ŭ tym, što ja siadzieŭ na Akreścina ŭ korpusie, zbudavanym na hrošy eŭrasajuzaŭskaj prahramy TASIS. A ciapier za repartaž pra heta atrymlivaju eŭrasajuzaŭskuju premiju, - kazaŭ na cyrymonii Andrej Dyńko. – Byŭ choład u kamerach, tłum. Dzieviać čałaviek na piać naraŭ. Udzień hamarnia, dym. Nie było jak zasiarodzicca. Tamu pisaŭ unačy. I voś – ludzi adčuli toje, što pieražyli biełarusy”.
Dyńko staŭ pieršym u historyi premii centralnaeŭrapiejskim žurnalistam, uhanaravanym joju. Dahetul siarod eŭrapiejcaŭ uznaharodu atrymlivali tolki aŭtary z zachodniaj častki kantynentu.
Hetamu jość tłumačeńnie. Z pryčyny pryncypaŭ farmavańnia žury jahonuju pałovu składajuć žurnalisty z krainaŭ Poŭdnia. Dla ich centralnaeŭrapiejskaja tematyka čužaja. Tamu zvyčajna premiju atrymlivajuć aŭtary z Zachodniaj Eŭropy, jakija pišuć na temy Treciaha śvietu. Prablema taksama i ŭ jakasnych pierakładach na anhielskuju.
Siarod inšych materyjałaŭ-pieramožcaŭ – artykuł pra źniknieńni ludziej u Pakistanie, narys pra achviaraŭ hramadzianskaje vajny ŭ Kalumbii, historyja samalijskaha chłopčyka, jaki ŭciok z rodnaha kraju ad vajny i ŭrešcie apynuŭsia ŭ Čyli, i paŭdniovaafrykanskaha aktyvista, jakoha ŭ časy aparteidu niespraviadliva źvinavacili ŭ zabojstvie – rychtyk jak Paŭła Krasoŭskaha.
Heta čaćviertaja mižnarodnaja premija Dyńku. “Pa-svojmu najdaražejšaja, bo adznačaje nie za maju pracu jak redaktara, a za kankretny tvor”, - kaža jon.
Za cyrymonijaj sačyŭ biełaruski dyplamat. Jon syšoŭ z zali, nie pavitaŭšysia i nie pavinšavaŭšy.
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks15
Kamientary