Вычварэнцы ўсіх масьцяў, рэгіструйцеся!
Беларусаў маральна рыхтуюць да закону аб дзейнасьці сеціўных мэдыяў. Піша ў сваім блогу Аляксандар Класкоўскі.
Беларусаў маральна рыхтуюць да закону аб дзейнасьці сеціўных мэдыяў. Як вядома, адпаведнае даручэньне прагучала з вуснаў кіраўніка дзяржавы на сустрэчы ў "Советской Белоруссии".
З сёньняшняга інтэрвію прадстаўніка Мінінфарму вынікае, што дзеля гэтай справы ўжо ствараецца працоўная група.
Дарэчы, інтэрвію зь піяраўскага пункту гледжаньня зроблена пісьменна. Ніякага лясканьня пугай. Слова "палітыка" — я прагнаў шукалкай:) — ужыта толькі аднойчы, дый то во ў якой фразе: "Ключавое месца ў эўрапэйскай інтэрнэт-палітыцы займае тэма тэрарызму ды экстрэмізму".
Увогуле ў абываталя мусіць скласца ўражаньне, што нашы дзяржаўныя структуры ў дачыненьні да сеціва найперш заклапочаныя не крамолай апазыцыйнага кшталту (у шырокім сэнсе, гаворка ня толькі пра сайты партыяў:), а змаганьнем супраць парнаграфіі ды тэрарызму. Сьвятая справа.
Няма, аднак, адказу на некалькі прынцыповых пытаньняў:
— Паводле якіх крытэраў тыя ці іншыя інтэрнэт-рэсурсы будуць кваліфікавацца як СМІ? (Каб не атрымалася, што і звычайную асабістую ўэб-бачыну без дазволу ня зробіш. Ва ўсякім разе, пры колішніх спробах рэглямэнтацыі гучалі заявы, што статус СМІ атрымаюць "інфармацыйныя сайты, якія рэгулярна абнаўляюцца". Гумавае вызначэньне.)
— Ці будзе рэгістрацыя сеціўных мэдыяў абавязковай? (Чуе сэрца — будзе.)
— Ці маецца на мэце публічна абмеркаваць праект, напрыклад з прыцягненьнем экспэртаў Беларускай асацыяцыі журналістаў?
Вы ня сьмейцеся, некалькі гадоў таму, калі распрацоўваўся новы законапраект аб СМІ з пунктамі датычна рэглямэнтацыі сеціва, магчыма, менавіта гучныя пратэсты БАЖу, зрэзанаваўшы ў міжнародным маштабе, змусілі высокае чынавенства засунуць той праект у доўгую скрыню. Калі зараз наверсе вырашаць, што новае — гэта добра забытае старое, то мала ня здасца.
Памятаю, мы тады, чытаючы праект ў рэдакцыі "Беларускіх навінаў", якія я рэдагаваў, чухалі патыліцу: ну як, напрыклад, выканаць патрабаваньне аб пазначэньні ў выходных зьвестках пэрыядычнасьці інтэрнэт-СМІ? Хтосьці з калегаў сказаў: мусіць, яны там зусім… кхэ-кхэ… (пошук эўфэмізму:) цьмяна ўяўляюць, што такое сеціва. На што пачуў: наадварот, добра ўяўляюць. Таму і сфармулявалі невыканальныя патрабаваньні. Вось надумаеш на хвалі натхненьня замалаціць звыш нормы геніяльны артыкул сярод ночы — і зачыняць сайт за парушэньне пэрыядычнасьці:)
Галоўнае ж — цяжка сабе ўявіць, каб міжнародныя тэрарысты ды вычварэнцы ўсіх масьцяў з ХХХ-парталаў раптам пашыхтаваліся ў чаргу на рэгістрацыю ў айчынным міністэрстве:)
Найхутчэй што "зарэглямэнтуюць" тых, каго можна рэальна дастаць. Але нашы незалежныя інтэрнэт-рэсурсы, што выступаюць з адкрытым забралам, і так не займаюцца той брыдотай, якой заклапочаны Мінінфарм. Іншая рэч, што крытыкі на адрас уладаў, канешне, стае. І досьвед кропкавых кібэратак у дні выбараў ды масавых акцый выразна засьведчыў: камусьці муляюць менавіта грамадзка-палітычныя сайты, здольныя непадцэнзурным інфармаваньнем падпсаваць, напрыклад, эфэкт чарговай "элегантнай перамогі".
Каментары