Vyčvarency ŭsich maściaŭ, rehistrujciesia!
Biełarusaŭ maralna rychtujuć da zakonu ab dziejnaści sieciŭnych medyjaŭ. Piša ŭ svaim błohu Alaksandar Kłaskoŭski.
Biełarusaŭ maralna rychtujuć da zakonu ab dziejnaści sieciŭnych medyjaŭ. Jak viadoma, adpaviednaje daručeńnie prahučała z vusnaŭ kiraŭnika dziaržavy na sustrečy ŭ "Sovietskoj Biełoruśsii".
Ź siońniašniaha interviju pradstaŭnika Mininfarmu vynikaje, što dziela hetaj spravy ŭžo stvarajecca pracoŭnaja hrupa.
Darečy, interviju ź pijaraŭskaha punktu hledžańnia zroblena piśmienna. Nijakaha laskańnia puhaj. Słova "palityka" — ja prahnaŭ šukałkaj:) — užyta tolki adnojčy, dyj to vo ŭ jakoj frazie: "Klučavoje miesca ŭ eŭrapejskaj internet-palitycy zajmaje tema teraryzmu dy ekstremizmu".
Uvohule ŭ abyvatala musić skłasca ŭražańnie, što našy dziaržaŭnyja struktury ŭ dačynieńni da sieciva najpierš zakłapočanyja nie kramołaj apazycyjnaha kštałtu (u šyrokim sensie, havorka nia tolki pra sajty partyjaŭ:), a zmahańniem suprać parnahrafii dy teraryzmu. Śviataja sprava.
Niama, adnak, adkazu na niekalki pryncypovych pytańniaŭ:
— Pavodle jakich kryteraŭ tyja ci inšyja internet-resursy buduć kvalifikavacca jak ŚMI? (Kab nie atrymałasia, što i zvyčajnuju asabistuju ŭeb-bačynu biez dazvołu nia zrobiš. Va ŭsiakim razie, pry kolišnich sprobach rehlamentacyi hučali zajavy, što status ŚMI atrymajuć "infarmacyjnyja sajty, jakija rehularna abnaŭlajucca". Humavaje vyznačeńnie.)
— Ci budzie rehistracyja sieciŭnych medyjaŭ abaviazkovaj? (Čuje serca — budzie.)
— Ci majecca na mecie publična abmierkavać prajekt, naprykład z pryciahnieńniem ekspertaŭ Biełaruskaj asacyjacyi žurnalistaŭ?
Vy nia śmiejciesia, niekalki hadoŭ tamu, kali raspracoŭvaŭsia novy zakonaprajekt ab ŚMI z punktami datyčna rehlamentacyi sieciva, mahčyma, mienavita hučnyja pratesty BAŽu, zrezanavaŭšy ŭ mižnarodnym maštabie, zmusili vysokaje čynavienstva zasunuć toj prajekt u doŭhuju skryniu. Kali zaraz naviersie vyrašać, što novaje — heta dobra zabytaje staroje, to mała nia zdasca.
Pamiataju, my tady, čytajučy prajekt ŭ redakcyi "Biełaruskich navinaŭ", jakija ja redahavaŭ, čuchali patylicu: nu jak, naprykład, vykanać patrabavańnie ab paznačeńni ŭ vychodnych źviestkach peryjadyčnaści internet-ŚMI? Chtości z kalehaŭ skazaŭ: musić, jany tam zusim… kche-kche… (pošuk eŭfemizmu:) ćmiana ŭjaŭlajuć, što takoje sieciva. Na što pačuŭ: naadvarot, dobra ŭjaŭlajuć. Tamu i sfarmulavali nievykanalnyja patrabavańni. Voś nadumaješ na chvali natchnieńnia zamałacić zvyš normy hienijalny artykuł siarod nočy — i začyniać sajt za parušeńnie peryjadyčnaści:)
Hałoŭnaje ž — ciažka sabie ŭjavić, kab mižnarodnyja terarysty dy vyčvarency ŭsich maściaŭ z CHCHCH-partałaŭ raptam pašychtavalisia ŭ čarhu na rehistracyju ŭ ajčynnym ministerstvie:)
Najchutčej što "zarehlamentujuć" tych, kaho možna realna dastać. Ale našy niezaležnyja internet-resursy, što vystupajuć z adkrytym zabrałam, i tak nie zajmajucca toj brydotaj, jakoj zakłapočany Mininfarm. Inšaja reč, što krytyki na adras uładaŭ, kaniešnie, staje. I dośvied kropkavych kiberatak u dni vybaraŭ dy masavych akcyj vyrazna zaśviedčyŭ: kamuści mulajuć mienavita hramadzka-palityčnyja sajty, zdolnyja niepadcenzurnym infarmavańniem padpsavać, naprykład, efekt čarhovaj "elehantnaj pieramohi".
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»7
Kamientary