Навукоўцы: Мозг хлопцаў і дзяўчат па-рознаму рэагуе на моцны стрэс
Падзеі, якія выклікалі вельмі моцны стрэс, па-рознаму ўздзейнічаюць на мозг хлопцаў і дзяўчат, сведчаць вынікі даследавання, праведзенага Стэнфардскім універсітэтам. Пра гэта піша ВВС.
Частка мозгу, якая адказвае за эмоцыі і эмпатыю (астраўковая доля), як высветлілі навукоўцы, мае параўнальна маленькі памер у дзяўчат, якія перажылі траўму.
У той жа час у хлопцаў з цяжкім досведам астраўковая доля наадварот аказалася большага памеру, чым звычайна.
Гэта можа растлумачыць, чаму ў дзяўчат часцей, чым у хлопцаў, ўзнікае посттраўматычнае стрэсавае расстройства (ПТСР), лічаць навукоўцы.
Паводле даследавання, хлопцы і дзяўчаты могуць дэманстраваць супрацьлеглыя сімптомы пасля асабліва пакутлівай або страшнай падзеі, а значыць, і лячыць іх, відаць, трэба па-рознаму.
Змены памеру і аб'ёму
Даследчая група са школы медыцыны Стэндфардскага ўніверсітэта мяркуе, што дзяўчаты з ПТСР могуць на самай справе пакутаваць ад занадта рэзкага старэння адной з частак астраўковай долі.
Навукоўцы прасканавалі мозг 59 дзяцей ва ўзросце ад дзевяці да 17 гадоў для даследавання, вынікі якога былі апублікаваныя ў выданні Depression and Anxiety.
Адна група складалася з 14 дзяўчат і 16 хлопцаў, якія перажылі па меншай меры адзін эпізод моцнага стрэсу ці псіхалагічную траўму, другая група з 15 дзяўчынак і 14 хлопчыкаў не мела падобнага досведу.
Даследчыкі зафіксавалі змены памеру і аб'ёму адной з частак астраўковай долі — пярэдняй кругавой баразды — у хлопцаў і дзяўчат, якія перажылі стрэс.
Гэта даказвае, што астраўковая доля змяняецца пад уздзеяннем стрэсу і адыгрывае ключавую ролю ў развіцці посттраўматычнага сіндрому, перакананыя аўтары навуковай працы
Розныя рэакцыі
Вядучы даследчык, доктар Меган Клабунд кажа, што важна ўлічваць розныя фізічныя і эмацыйныя рэакцыі хлопцаў і дзяўчат на стрэсавыя падзеі.
«Важна, каб людзі, якія працуюць з траўмаванымі маладымі людзьмі, улічвалі палавыя адрозненні», — адзначае яна.
«Нашы вынікі паказваюць, што, магчыма, хлопцы і дзяўчаты могуць мець розныя сімптомы траўмы і ім могуць дапамагаць розныя метады лячэння», — падкрэслівае Клабунд.
Паводле яе слоў, навукоўцы ў цяперашні час даследуюць іншыя аддзелы мозгу, звязаныя з астраўковай доляй, на прадмет аналагічных зменаў.
Астраўковая доля адказвае не толькі за апрацоўку эмоцый, але і за распазнаванне сігналаў ад іншых частак цела.
Дзяржаўныя сацыёлагі: Беларусы найперш звязваюць сваю дзяржаўнасць з Вялікім Княствам Літоўскім23
Каментары