Візажыстка з Гомеля ў гонар 9 мая запісала святочны ролік — максімальна вульгарна расфарбавала 13‑гадовую дачку
«Патрыятычны» тыкток Алены Брыцько ўжо паглядзела больш за 2 мільёны чалавек. І сотні з іх напісалі, што такая баявая расфарбоўка не пасуе для песні «Кацюша». Але візажыстка шчыра ўпэўненая: гэта проста людзі нічога не разумеюць у мастацтве.
На тыкток візажысткі Алены Брыцько з Гомеля падпісана каля 69 тысяч чалавек. Звычайна яна запісвае ролікі разам з дачкой — робіць той макіяж, пасля якога школьніца пачынае выглядаць старэйшай мінімум гадоў на дзесяць.
Напярэдадні Дня Перамогі Алена запісала чарговае відэа, якое, імаверна, павінна было выклікаць нейкія патрыятычныя пачуцці. Пад рэмікс «Кацюшы» — песні, якая на постсавецкай прасторы стала адным з сімвалаў Другой сусветнай вайны — візажыстка зрабіла макіяж сабе і дзяўчынцы.
Напрыканцы роліка жанчына з дачкой выглядаюць даволі правакацыйна — улічваючы тое, што разам з баявой расфарбоўкай яны апранулі вайсковую форму. Большасць каментатараў яркі мэйкап не ацанілі. Людзі сотнямі пішуць каментары, што ён не пасуе для Дня Перамогі.
Алена ж з гэтым катэгарычна нязгодная і піша, што людзі нічога не разумеюць у яе творчасці. А яна мастак і так бачыць: «Гэта толькі вам так падаецца! Я раблю толькі такія макіяжы. Мой макіяж — гэта мастацтва, а не проста нюд».
Каментары