Рашэнне пра закрыццё часопіса прынялі ў Доме друку. Апошні нумар «На экранах» выйшаў яшчэ ў снежні 2025 года, але рэдакцыя пакуль працягвае апрацоўваць зробленае за гады існавання, каб перадаць усё ў Беларускі дзяржаўны архіў кінафотафонадакументаў.
Калектыў засмучаны такім развіццём падзей, але зрабіць нічога не можа. Апошнія гады тыраж «На экранах» складаў мізерныя 500 асобнікаў. У часопісе было ўсяго 16 старонак.
Да свайго закрыцця часопіс па праве лічыўся ветэранам беларускай прэсы — яго заснавалі ў 1957 годзе. Сярод іншага, калектыў выдання стаяў ля вытокаў стварэння кінафестывалю «Лiстапад». Таксама часопіс быў галоўным інфапартнёрам нацыянальнай кінастудыі «Беларусьфільм».
Пасаду галоўнай рэдактаркі «На экранах» займала выкладчыца факультэта журналістыкі БДУ Людміла Перагудава. Агулам жа на старонках часопіса ў розны час друкаваліся вядомыя кіназнаўцы і крытыкі, кандыдаты і дактары навук — Таццяна Арлова, Нэлі Крывашэева, Людміла Саянкова і іншыя.
Каментары