Раней Лукашэнка заяўляў, што з Пакістана прыедуць 150 тысяч работнікаў.
У Беларусі знаходзяцца 324 грамадзяніна Пакістана. Пра гэта стала вядома ў чацвер падчас разгляду законапраекта аб ратыфікацыі беларускага-пакістанскага Мемарандума аб працаўладкаванні пакістанцаў, піша Reform.news. У міністра ўнутраных спраў Івана Кубракова спыталі, як паводзяць сябе грамадзяне Пакістана.
«Усе парушэнні, якія выяўляюцца з боку пакістанцаў, якія цяпер знаходзяцца ў нас у краіне і якія прыязджалі да нас, звязаныя з парушэннем міграцыйнага заканадаўства, гэта значыць пражываюць не па месцы, там, дзе яны зарэгістраваныя, альбо парушылі тэрміны рэгістрацыі і гэтак далей. Парушэнняў грамадскага парадку з боку дадзеных грамадзян намі не зафіксавана за 2025 год. Так, было адно злачынства, якое было здзейснена групай асоб, дзе быў і грамадзянін Пакістана. Якіх-небудзь праблем у цяперашні час з іх боку няма», — сказаў ён.
Першапачаткова Аляксандр Лукашэнка заяўляў пра гатоўнасць прыняць да 150 тысяч работнікаў з Пакістана.
Кубракоў таксама вырашыў праілюстраваць падыходы МУС да працоўных мігрантаў на прыкладзе кіроўцаў таксі.
«Вы ўсё выдатна памятаеце сітуацыю, калі была вялікая колькасць замежных грамадзян з розных дзяржаў, але, напэўна, больш з адной краіны, калі кіроўцамі таксі былі замежныя грамадзяне, некаторыя з іх не толькі не зусім выконвалі правілы дарожнага руху, але і не зусім умелі размаўляць на рускай мове.
Мы сабралі ўсіх прадпрымальнікаў, правялі з імі гутарку, сабралі замежных грамадзян. Таксама кожнага з іх папярэдзілі, што ў выпадку ў далейшым парушэнне правілаў дарожнага руху, здзяйснення злачынстваў, мы будзем вельмі жорстка рэагаваць. Супрацоўнікі ДАІ ўзялі на кантроль усе таксі, дзе працавалі дадзеныя грамадзяне, непрадузята, але сітуацыю кантралявалі, у тым ліку і з дапамогай відэа.
Як толькі мы адправілі пэўную колькасць людзей з нашай краіны за парушэнне дзеючага заканадаўства, адразу ж і прадпрымальнікі, якія іх запрашаюць сюды, пачалі іх навучаць. Перападрыхтоўку арганізавалі, у тым ліку па вывучэнні правілаў дарожнага руху. І на сённяшні дзень, не хачу сказаць, што ніхто не парушае правілаў дарожнага руху, але парадак у гэтым плане наведзены. Так будзе з любымі грамадзянамі, якія прыязджаюць у нашу краіну. Яны абавязаны выконваць дзеючае заканадаўства», — распавёў міністр.
Цяпер чытаюць
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?1
Каментары