Група беларускіх актывістаў затрыманая па падазрэнні ў «арганізацыі масавых беспарадкаў»
Кніганоша Алесь Яўдаха затрыманы па падазрэнні ў «арганізацыі масавых беспарадкаў». Пра гэта напісаў у сваім фэйсбуку намеснік старшыні Саюза беларускіх пісьменнікаў Усевалад Сцебурака.
«Асобы з КДБ, што рабілі вобшук уночы на кватэры Алеся прад'явілі родным ордар і сказалі, што Алесь арыштаваны па абвінавачванні ўарганізацыі падрыхтоўкі масавых беспарадкаў. Крымінальны кодэкс РБ арт 293, частка № 3. Паведамілі, што Пракуратура будзе «паведамлена» сення. Паколькі верагодна затрыманы ў СІЗА КДБ - перадачаў пакуль не возьмуць. З кватэры ўзялі нешта сімвалічнае. Вярнулі ключы ад машыны, на якой Алесь прыехаў на Кастрычніцкую (месца затрымання)».
Учора былі таксама затрыманыя ўдзельнік былой вайскова-патрыятычнай суполкі «Белы легіён» Міраслаў Лазоўскі (на ніжнім фота пасярэдзіне) і жыхар сталіцы Андрэй Дундукоў (на фота справа).
Ёсць інфармацыя і пра іншых затрыманых. Па стане на 10.40 нашы карэспандэнты правяраюць яе.
Жыхар Мінска Андрэй Дундукоў быў затрыманы, калі разам з жонкай і дзіцем ехаў на адпачынак.
Пра Андрэя Дундукова вядома, што ён аматар экстрэмальнага турызму, скачкоў з парашутам, вадалажання, промаальпінізму, страйкбола.
Міраслава Лазоўскага людзі ў цывільным і двое ў чорнай вопратцы ды ў масках на тварах прывезлі Міраслава дамоў і правялі ператрус.
«Быў збіты, твар у крыві. Завялі ў кайданках і пасадзілі на зэдлік тварам да сцяны. Дазволілі толькі даць папіць, размаўляць не дазволілі», — расказала ягоная нявеста Святлана.
З забраных рэчаў Святлана памятае камп'ютар, ейны планшэт. «Сказалі, што для праверкі».
Таксама ў яго забралі шаўрон арганізацыі «Белы легіён».
Са слоў Святланы, чалавек, які праводзіў ператрус, пацвердзіў, што ён звязаны з заклікамі да ўзброенай барацьбы, якія з'явіліся ў інтэрнэце нібыта ад імя Міраслава Лазоўскага.
«Ягоны акаўнт у фэйсбуку быў узламаны, з'явіўся гэты заклік, да якога ён не мае дачынення», — расказала яна.
Кнігараспаўсюднік Алесь Яўдаха быў затрыманы невядомымі пасля цырымоніі ўручэння прэмій «Дэбют» Беларускага ПЭН-цэнтра, што прайшла ўвечары 21 сакавіка ў выставачнай прасторы «ЦЭХ» на вуліцы Кастрычніцкай у Мінску.
Адразу пасля цырымоніі асобы ў цывільным брутальна затрымалі і звезлі Яўдаху. Пра гэта ў фэйсбуку паведаміла Вера Сцебурака.
Як стала вядома пазней, дома ў яго таксама быў ператрус.
Алесь Яўдаха займаўся гандлем кнігамі поштай і ўразнос, гэта быў бізнэс з малымі абаротамі. Ён прадаваў кнігі Быкава, Арлова, Барадуліна.
Праз сваю дзейнасць ён ужо меў праблемы падатковага характару ў 2010—2012 гадах, якія скончыліся судом і штрафам. Яму прысудзілі год абмежавання волі без накіравання на хімію і штраф 57 мільёнаў, на сплату якога збіралі грошы ўсёй беларускай грамадой. Сам Яўдаха звязваў першую справу з тым, што ўзяў на распаўсюд у тым ліку кнігу «Маладафронтаўцы».
Вось ягоная кнігарня «Кнігі — поштай».
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары