На філфаку БДУ стане менш беларускай мовы? Разбіраемся, ці так
У некаторых СМІ з’явілася інфармацыя, што на філфаку БДУ стануць менш вывучаць беларускую мову. Звязаная гэта нібыта з яе незапатрабаванасцю ў абітурыентаў і нястачай выкладчыцкага складу.
У прыватнасці, Белсат пісаў пра тое, што «у новым навучальным годзе на кафедры славянскай філалогіі філалагічнага факультэта БДУ збіраюцца адмяніць вывучэнне беларускай мовы ў звязцы з іншымі славянскімі. Замест яе будуць вывучаць расейскую мову».
Праўда, на філфаку адсутнічае кафедра славянскай філалогіі, аднак ёсць, напрыклад, кафедра сучаснай беларускай мовы, якая, па інфармацыі крыніцы «НН», знаходзіцца пад пагрозай закрыцця.
Што пра гэтыя чуткі кажуць у БДУ?
У прэс-службе БДУ сцвярджаюць, што ніякіх рэформаў не плануецца.
«Філалагічны факультэт штогод паспяхова выконвае план набору на ўсе спецыяльнасці, у тым ліку і на беларускую філалогію. Зразумела, што за апошнія дзесяцігоддзі змяншалася колькасць выпускнікоў школ, адпаведна, змяншаўся і набор на розныя спецыяльнасці ў цэлым у краіне.
На сёння на ўсе спецыяльнасці факультэта, у тым ліку і беларускую філалогію, мы набіраем па адной акадэмічнай групе на бюджэтнай аснове. Пры гэтым кадравы склад нашага факультэта адзін з найбольш прадстаўнічых у Беларусі. Так, на факультэце працуе 21 выкладчык беларускай мовы. З іх 4 дактары навук і 14 кандыдатаў навук. Беларускую літаратуру і літаратуразнаўства выкладаюць 25 чалавек, з якіх 7 дактароў навук і 13 кандыдатаў навук. Ці можаце прывесці прыклад, дзе яшчэ больш кадраў вышэйшай кваліфікацыі па беларускай мове і літаратуры? У сувязі з вышэйадзначаным гаварыць пра недахоп кадраў, мякка кажучы, недарэчна. Зусім зачыняць кафедру сучаснай беларускай мовы ніхто не збіраецца», — паведамілі «НН» у прэс-службе, дадаўшы, што ніякіх змен, звязаных з вывучэннем беларускай мовы, у адукацыйным працэсе не чакаецца.
Цяпер чытаюць
Ціханоўскі прапанаваў радыкальна перагледзець стратэгію для Беларусі36
Каментары