Гэтыя пясочныя пячэнькі на масле настолькі прыгожыя, што іх хочацца павесіць на калядную ялінку як аздобу. І з’есці іх таксама вельмі хочацца. Прапануем вам просты рэцэпт гэтай французскай каляднай радасці.
Фота: monpetitfour.com
Для пячэння «Сабле» вам спатрэбіцца:
- 115 грамаў масла пакаёвай тэмпературы,
- 50 грамаў цукру,
- 25 грамаў цукровай пудры,
- ¼ чайнай лыжкі солі,
- ½ чайнай лыжкі молатага цынамону (ён жа карыца),
- 1/8 чайнай лыжкі молатай гваздзікі,
- 1 жаўток вялікага яйка пакаёвай тэмпературы (бялок пакіньце для глазуры),
- 1 чайная лыжка экстракту ванілі,
- цэдра аднаго сярэдняга апельсіна,
- 150 грамаў мукі (таксама мука спатрэбіцца для раскачкі цеста)
Для глазуры:
- 2 бялкі пакаёвай тэмпературы,
- трошку свежага лімоннага соку,
- 360 грамаў прасеянай цукровай пудры,
- 1 кропля блакітнага харчовага фарбавальніка.
- Размяшайце масла з цукрам да мяккай кансістэнцыі, дадайце цынамон, гваздзіку і соль, перамяшайце. Дадайце жаўток, цэдру апельсіна і экстракт ванілі, перамешвайце, пакуль жаўток не ўбярэцца ў цеста. Дадайце муку і вымесіце цеста.
- Пакладзіце цеста ў пластыкавы пакет і раскачайце ў корж таўшчынёй 2,5 см. Корж схавайце ў лядоўню на адну гадзіну.
- Разагрэйце духоўку да 180 С. Пакладзіце на бляху паперу для выпечкі і адкладзіце ўбок. Цеста дастаньце з лядоўні, дайце яму сагрэцца 15 хвілін. Калі раскачаць яго адразу, на ім з’явяцца трэшчыны.
- Пасыпце дошку мукой і раскачайце на ёй цеста так, каб яго таўшчыня была 5-6 мм. Раскачвайце заўсёды ў адзін бок, пракручваючы цеста патрошку па коле.
- Выражце фігуркі, якія вам даспадобы. Пячэнькі не будуць падымацца, таму можна шчыльна выкласці іх на паперу для выпечкі. Адпраўце іх на паперы ў лядоўню на 10 хвілін.
- Выпякайце 18 хвілін. Яны павінны стаць залацістымі па краях. Дастаньце бляху з духоўкі, але дайце пячэнькам яшчэ паляжаць на ёй хвілін пяць. Калі зняць іх раней, яны будуць надта мяккія.
- Перанясіце пячэнькі на паперы з бляхі на краткі альбо іншую паверхню, каб яны астылі да канца. Пакуль яны астываюць, прыгатуйце глазуру, узбіўшы бялкі з лімонным сокам. Узбіваць іх трэба, пакуль бялкі не згубяць жаўтаватага адцення. Затым дадайце цукровай пудры, раздзяліце 360 грамаў пудры на тры часткі і дадавайце да бялкоў па частках, узбіваючы пры гэтым сумесь. Калі глазура стане белай і густой, перастаньце ўзбіваць.
- Прыкладна трэць падрыхтаванай глазуры перакладзіце ў іншую міску. Дадайце туды кроплю блакітнага харчовага фарбавальніка і ўзбіце. Размалюйце пячэнькі белай і блакітнай глазурай.
- Дачакайцеся, пакуль глазура цалкам застыне (2-3 гадзіны), перш чым аздабляць пячэнькі рознымі ўзорамі.
Каментары