Вядомы ў мінулым рэстаратар, а цяпер блогер Вадзім Пракоп’еў абвешчаны ў вышук беларускай міліцыяй. Удакладняецца, што ён падазраваны па крымінальнай справе за знявагу прадстаўніка ўлады, максімальна магчымае пакаранне па гэтым артыкуле — да трох год зняволення. Яшчэ ў 2020 годзе Пракоп’еў з’ехаў ва Украіну, адкуль і вядзе свой канал на YouTube. Паглядзелі, хто яшчэ ў базе вышуку МУС па «палітычных» артыкулах.
Апроч Вадзіма Пракоп’ева, у базе вышуку МУС знаходзіцца оперная спявачка і блогерка Маргарыта Ляўчук (арт. 370 КК — знявага дзяржаўнага сцяга) і яе партнёр па YouTube-канале Андрэй Павук (ч. 3 арт. 203-1 КК, арт. 369 КК, арт. 370 КК — незаконны збор інфармацыі аб прыватным жыцці, абраза чыноўніка, знявага сцяга). Адзначым, што з-за мяжы доступ да базы закрыты.
Усяго па артыкулах, звязаных з палітычнай пазіцыяй, у базе 26 прозвішчаў. Варта адзначыць, што гэта не адзіная існуючая база вышуку.
Напрыклад, у ёй няма палітыкаў Святланы Ціханоўскай і Паўла Латушкі, блогераў Антона Матолькі, Сцяпана Пуцілы, прадстаўнікоў фондаў дапамогі Андрэя Стрыжака і Аляксея Лявончыка, хоць беларускія сілавікі неаднаразова заяўлялі, што абвясцілі іх у вышук, некаторых спрабавалі ўключыць у вышук і па лініі інтэрпала.
Хто ж у базе МУС?
З адносна вядомых людзей — актывіст і былы кандыдат у дэпутаты з Мікашэвічаў Леанід Дубаносаў, якога неданаразова затрымлівалі сілавікі.
У картцы вышуку пазначана, што супраць яго заведзеная справа за распальванне варожасці (ч. 1 арт. 130 КК «Распальванне расавай, нацыянальнай, рэлігійнай альбо іншай сацыяльнай варожасці»).
Па такім жа артыкуле шукаюць наступных людзей:
- Дзмітрый Хлуд (1983 г.н.),
- Сяргей Дземідовіч (1974 г. н., апроч таго, заведзеная справа па арт. 368 «Абраза прэзідэнта»),
- Віктар Калаўр (1977 г. н., супраць яго таксама завялі па арт. 369 «Абраза прадстаўніка ўлады»).
Па абвінавачванні ва ўдзеле ў масавых беспарадках (арт. 293 КК) у базе вышуку МУС:
- Канстанцін Тукала (1985 г. н.),
- Андрэй Казіміраў (1999 г.н.) Анархіст, які быў паранены гумовай куляй на адной з акцыяў пратэсту ў Мінску, пазней ён быў затрыманы і збіты. З'ехаў у Расію, Беларусь патрабуе яго дэпартаваць.
- Вадзім Дубойскі (1990 г.н.) Быў затрыманы і збіты ў Брэсце, з'ехаў у Расію, дзе быў затрыманы, Беларусь патрабуе яго дэпартацыі.
- Руслан Фёдараў (1998 г. н.),
- Алег Юраў (2003 г. н., фігурант «карагоднай справы» ў Брэсце, не з'явіўся ў суд),
- Аляксандр Сіжук (1991 г.н.),
- Ганна Бегаль (1995 г.н.),
- Вікторыя Шкут (1998 г. н.),
- Васіль Грудавік (1991 г. н.),
- Уладзімір Хаміцэвіч (1993 г. н., фігурант «пінскай справы»),
- Дзяніс Дзенісенка (1998 г. н.),
- Андрэй Кузьмянчук (1971 г. н.).
Апроч Пракоп’ева, за абразу прадстаўніка ўлады (арт. 369 КК) завялі справы і абвясцілі ў вышук наступных людзей:
- Міхаіл Пракапеня (1987 г. н.),
- Івар Ланге (1987 г. н.),
- Раман Шабановіч (1970 г. н., беларускі татарын, пляменнік вядомага муфція Абу-Бекіра Шабановіча. Пасля выбараў расфарбаваў свой грузавік у чырвона-белыя колеры, за што машыну забралі, быў на «сутках»),
- Уладзімір Тарасюк (1980 г. н., супраць яго таксама завялі справу па арт. ч. 3 арт. 203-1, 391 КК),
- Святлана Шэлег (1964 г. н.).
За супраціўленне сілавікам (арт. 363 КК) шукаюць Дзмітрыя Шайко (1999 г. н.).
Усяго ж у базах вышуку Беларусі знаходзіцца 2,5 тысячы чалавек. Амаль палову з іх у вышук абвясцілі ў 2021 годзе.
Чытайце таксама
Новы «Ток» — з Вадзімам Пракоп’евым. Пра чыноўнікаў, сілавікоў і бізнэс пры Лукашэнку
«Вы хацелі, каб там адны дурні працавалі?» Як беларускія сілавікі спрабуюць падмануць Інтэрпал
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі37
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4545
Каментары