Viadomy ŭ minułym restaratar, a ciapier błohier Vadzim Prakopjeŭ abvieščany ŭ vyšuk biełaruskaj milicyjaj. Udakładniajecca, što jon padazravany pa kryminalnaj spravie za źniavahu pradstaŭnika ŭłady, maksimalna mahčymaje pakarańnie pa hetym artykule — da troch hod źniavoleńnia. Jašče ŭ 2020 hodzie Prakopjeŭ źjechaŭ va Ukrainu, adkul i viadzie svoj kanał na YouTube. Pahladzieli, chto jašče ŭ bazie vyšuku MUS pa «palityčnych» artykułach.
Aproč Vadzima Prakopjeva, u bazie vyšuku MUS znachodzicca opiernaja śpiavačka i błohierka Marharyta Laŭčuk (art. 370 KK — źniavaha dziaržaŭnaha ściaha) i jaje partnior pa YouTube-kanale Andrej Pavuk (č. 3 art. 203-1 KK, art. 369 KK, art. 370 KK — niezakonny zbor infarmacyi ab pryvatnym žyćci, abraza čynoŭnika, źniavaha ściaha). Adznačym, što z-za miažy dostup da bazy zakryty.
Usiaho pa artykułach, źviazanych z palityčnaj pazicyjaj, u bazie 26 proźviščaŭ. Varta adznačyć, što heta nie adzinaja isnujučaja baza vyšuku.
Naprykład, u joj niama palitykaŭ Śviatłany Cichanoŭskaj i Paŭła Łatuški, błohieraŭ Antona Matolki, Ściapana Puciły, pradstaŭnikoŭ fondaŭ dapamohi Andreja Stryžaka i Alaksieja Lavončyka, choć biełaruskija siłaviki nieadnarazova zajaŭlali, što abviaścili ich u vyšuk, niekatorych sprabavali ŭklučyć u vyšuk i pa linii interpała.
Chto ž u bazie MUS?
Z adnosna viadomych ludziej — aktyvist i były kandydat u deputaty ź Mikaševičaŭ Leanid Dubanosaŭ, jakoha niedanarazova zatrymlivali siłaviki.
U kartcy vyšuku paznačana, što suprać jaho zaviedzienaja sprava za raspalvańnie varožaści (č. 1 art. 130 KK «Raspalvańnie rasavaj, nacyjanalnaj, relihijnaj albo inšaj sacyjalnaj varožaści»).
Pa takim ža artykule šukajuć nastupnych ludziej:
- Dźmitryj Chłud (1983 h.n.),
- Siarhiej Dziemidovič (1974 h. n., aproč taho, zaviedzienaja sprava pa art. 368 «Abraza prezidenta»),
- Viktar Kałaŭr (1977 h. n., suprać jaho taksama zaviali pa art. 369 «Abraza pradstaŭnika ŭłady»).
Pa abvinavačvańni va ŭdziele ŭ masavych biesparadkach (art. 293 KK) u bazie vyšuku MUS:
- Kanstancin Tukała (1985 h. n.),
- Andrej Kazimiraŭ (1999 h.n.) Anarchist, jaki byŭ paranieny humovaj kulaj na adnoj z akcyjaŭ pratestu ŭ Minsku, paźniej jon byŭ zatrymany i źbity. Źjechaŭ u Rasiju, Biełaruś patrabuje jaho departavać.
- Vadzim Dubojski (1990 h.n.) Byŭ zatrymany i źbity ŭ Breście, źjechaŭ u Rasiju, dzie byŭ zatrymany, Biełaruś patrabuje jaho departacyi.
- Rusłan Fiodaraŭ (1998 h. n.),
- Aleh Juraŭ (2003 h. n., fihurant «karahodnaj spravy» ŭ Breście, nie źjaviŭsia ŭ sud),
- Alaksandr Sižuk (1991 h.n.),
- Hanna Biehal (1995 h.n.),
- Viktoryja Škut (1998 h. n.),
- Vasil Hrudavik (1991 h. n.),
- Uładzimir Chamicevič (1993 h. n., fihurant «pinskaj spravy»),
- Dzianis Dzienisienka (1998 h. n.),
- Andrej Kuźmiančuk (1971 h. n.).
Aproč Prakopjeva, za abrazu pradstaŭnika ŭłady (art. 369 KK) zaviali spravy i abviaścili ŭ vyšuk nastupnych ludziej:
- Michaił Prakapienia (1987 h. n.),
- Ivar Łanhie (1987 h. n.),
- Raman Šabanovič (1970 h. n., biełaruski tataryn, plamieńnik viadomaha mufcija Abu-Biekira Šabanoviča. Paśla vybaraŭ rasfarbavaŭ svoj hruzavik u čyrvona-biełyja kolery, za što mašynu zabrali, byŭ na «sutkach»),
- Uładzimir Tarasiuk (1980 h. n., suprać jaho taksama zaviali spravu pa art. č. 3 art. 203-1, 391 KK),
- Śviatłana Šeleh (1964 h. n.).
Za supraciŭleńnie siłavikam (art. 363 KK) šukajuć Dźmitryja Šajko (1999 h. n.).
Usiaho ž u bazach vyšuku Biełarusi znachodzicca 2,5 tysiačy čałaviek. Amal pałovu ź ich u vyšuk abviaścili ŭ 2021 hodzie.
Čytajcie taksama
Novy «Tok» — z Vadzimam Prakopjevym. Pra čynoŭnikaŭ, siłavikoŭ i biznes pry Łukašenku
«Vy chacieli, kab tam adny durni pracavali?» Jak biełaruskija siłaviki sprabujuć padmanuć Interpał
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary