Украінцы знішчылі флагман Чарнаморскага флоту — ракетны крэйсер «Масква»
«Крэйсер «Масква» Чарнаморскага флоту атрымаў сур'ёзныя пашкоджанні ў выніку дэтанацыі боезапасу, якая адбылася з прычыны пажару», — заявіла Міністэрства абароны Расіі. Раней украінскі бок заявіў, што па крэйсеры быў нанесены ўдар дзвюма ракетамі «Нептун».
Экіпаж эвакуяваны, паведамляе ТАСС са спасылкай на Мінабароны Расіі. Прычыны пажару ўстанаўліваюцца.
Раней у сераду кіраўнік Адэскай абласной адміністрацыі палкоўнік Максім Марчанка заявіў, што ўкраінскія вайскоўцы нанеслі па крэйсеры «Масква» удар супрацькарабельнымі крылатымі ракетамі «Нептун» і прычынілі яму сур'ёзныя пашкоджанні.
«Ён пайшоў менавіта туды, куды яго паслалі нашы памежнікі на востраве Змяіны! — напісаў Марчанка. — Ракеты «Нептун», якія стаяць на варце Чорнага мора, нанеслі расійскаму караблю вельмі сур'ёзныя пашкоджанні».
«Масква» — флагман Чарнаморскага флоту ВМФ РФ і карабель з самым магутным узбраеннем на Чарнаморскім флоце. Менавіта ён удзельнічаў у захопе вострава Змяіны, дзе адбыўся знакаміты эпізод з пагранічнікамі і іх адказам на ультыматум.
Экіпаж карабля складаецца з 510 чалавек. Паводле інфармацыі расійскага Мінабароны, ён быў цалкам эвакуяваны. Праверыць гэтую заяву немагчыма.
Іна Кулей: Мілінкевіч перамог смерць, але шлях да поўнага адужання няблізкі4
Каментары