Вадзім Пракоп’еў пра полк «Пагоня»: Каліноўцы прапанавалі нам прадэманстраваць жывучасць у канкурэнтнай барацьбе
Былы рэстаратар, а цяпер арганізатар беларускага вайсковага падраздзялення «Пагоня» ва Украіне Вадзім Пракоп'еў у інтэрв'ю тэлеканалу «Белсат» расказаў, хто камандуе падраздзяленнем, як арганізуецца яго забеспячэнне, калі ён пойдзе ў бой і якія адносіны з батальёнам Кастуся Каліноўскага. Пераказваем асноўныя моманты з гэтага інтэрв'ю.
Паводле Пракоп'ева, падраздзяленне «Пагоня» нядаўна правяло на ўкраінскім палігоне баявыя стрэльбы з выкананнем тактычных задач, вывучэннем матэрыяльнай часткі правіл стральбы з розных відаў зброі, а таксама адпрацоўкай эвакуацыю параненых і наданне медычнай дапамогі. Заняткі праводзілі ўкраінскія інструктары-франтавікі.
Планы стварыць цэлы беларускі полк у Пракоп'ева не змяніліся, хоць пра канкрэтную колькасць у ім цяпер нічога пэўнага не гаворыцца. Пракоп'еў разважае, што тыя людзі, якія праводзяць навучанне на палігоне — гэта мускулы падраздзялення, а акрамя іх ёсць яшчэ мазгі, функцыі якіх — забеспячэнне выведкі ўсіх відаў, збор і аналіз звестак навакольнай абстаноўкі, арганізацыя і ўзаемадзеянне ўсіх відаў забеспячэння і планаванне баявых дзеянняў. Мазгі ўжо, маўляў, пабудаваныя, а цяпер застаецца нарошчваць мускулы.
У баявых дзеяннях падраздзяленне пакуль што ўдзелу не брала, такі досвед маюць толькі асобныя байцы. Калі падраздзяленне будзе гатовае да баявога зладжвання — вызначаць украінскія інструктары.
Што тычыцца камандавання ўласна падраздзялення, то з самага пачатку, як сцвярджае Пракоп'еў, зроблена стаўка на прафесійных вайскоўцаў, у шэрагах «Пагоні» служаць афіцэры беларускай арміі, якія з розных прычынаў і ў розны час з яе звольніліся.
Сам Пракоп'еў бачыць сваю ролю як арганізатара. Ён вядзе штабную работу, працуе з прэсай, вырашае пытанні забеспячэння. А таксама чытае курс англійскай мовы для байцоў падраздзялення, бо сярод іншага запланаваная праца і з інструктарамі з ЗША.
Першапачаткова полк утрымлівалі Пракоп'еў і група ягоных сяброў-бізнэсоўцаў на ўласныя сродкі, але цяпер, як ён лічыць, падраздзяленне прадэманстравала свой патэнцыял, таму ў хуткім часе можна звернуцца да патэнцыйных фундатараў, каб яны дапамагалі фінансава.
Што тычыцца аб'яднання з батальёнам імя Кастуся Каліноўскага, то Пракоп'еў не выключае сітуацыі, што ў нейкі момант два падраздзяленні маглі б аб’яднацца, і перамовы адносна гэтага вядуцца. Але падыходы ў іх адрозніваюцца.
Пракоп'еву каліноўцы прапанавалі прадэманстраваць жывучасць у канкурэнтнай барацьбе.
Нагадаем, што пра пачатак фармавання беларускага палка «Пагоня» Вадзім Пракоп'еў заявіў 30 сакавіка. У паведамленні гаварылася, што полк ствараецца з беларускіх афіцэраў дзеля абароны незалежнасці і тэрытарыяльнай цэласці Украіны. Паводле Пракоп’ева, «Пагоня» ўваходзіць у склад міжнароднага легіёна УСУ.
Каментары