Чарговы суд над журналістам. Пачынаецца працэс над Канстанцінам Залатых
У Мінску пачынаецца суд над палітзняволеным дырэктарам газеты «Беларусы і рынак», паведамляе «Вясна».
Залатых абвінавачваюць паводле чатырох артыкулаў Крымінальнага кодэкса: ч. 2 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы), ч. 1 арт. 368 (абраза Лукашэнкі), арт. 369 (знявага прадстаўніка ўлады), ч. 2 арт. 426 (перавышэнне ўлады або службовых паўнамоцтваў).
Справу вядзе суддзя Алена Шылько.
Канстанціна Залатых затрымалі яшчэ 18 мая 2022 года пасля вобшуку ў рэдакцыі. Яму першапачаткова выставілі крымінальнае абвінавачанне па ч. 2 арт. 130 Крымінальнага кодэкса Беларусi (распальванне варожасці, спалучанае з гвалтам альбо здзейсненае службовай асобай).
Палітвязень адразу знаходзiўся ў жодзінскім СІЗА, на пачатку жніўня 2022 года быў пераведзены ў СІЗА-1 на Валадарскага.
Па матэрыялах следства, Канстанцін Залатых, «з'яўляючыся дырэктарам ЗАТ «Медыярынак», ведаў аб унесеных у Закон Рэспублікі Беларусь «Аб сродках масавай інфармацыі» зменах, якія перашкаджалі двум грамадзянам Рэспублікі Польшча валодаць сумарна 28% акцый таварыства.
З гэтай мэтай у маі 2021 — студзені 2022 года ён, у парушэнне заканадаўства, без правядзення агульнага сходу акцыянераў, аднаасобна ўнёс змены ў Статут ЗАТ аб выключэнні са складу заснавальнікаў вышэйзгаданых замежных грамадзян і зарэгістраваў яго ў Галоўным упраўленні юстыцыі Мінскага гарвыканкама. Затым разам з іншымі дакументамі прадставіў у Міністэрства інфармацыі, што стала падставай для працягу таварыствам сваёй дзейнасці, а ім адпаведна — захавання пасады дырэктара».
Апроч гэтага, журналісту ставіцца ў віну некалькі эпізодаў з размяшчэннем абразлівых каментароў у адрас афіцыйных асоб і Аляксандра Лукашэнкі ў сацыяльных сетках.
Судовы працэс праходзіць пакуль што ў адкрытым рэжыме.
Нагадаем, што ўчора былі вынесены прысуды Дзмітрыю Семчанку і Генадзю Мажэйку, а таксама стала вядома, што супраць рэдактара «Рэгіянальнай газеты» Аляксандра Манцэвіча заведзена крымінальная справа.
Усяго за кратамі знаходзіцца 36 журналістаў і супрацоўнікаў медыя.
Цяпер чытаюць
У Гродне выпадкова спынілі фігуранта крыміналкі за 2020 год. Ён зламаў руку міліцыянеру і сігануў у раку2
Каментары