У ліцэях гэтымі днямі праходзяць уступныя выпрабаванні. У наймацнейшым з іх, Ліцэі БДУ, сёлета рэкордна высокі конкурс — у сярэднім 9 чалавек на месца.
На 264 месцы прэтэндуюць 2072 абітурыенты, з іх 34 — без экзаменаў. Пры гэтым самая высокая канкурэнцыя сёлета за права вучыцца ў матэматычным класе: больш за 15 чалавек на месца, як заўважыў Dev.by.
Крыху саступае матэматыцы фізіка: 14 чалавек на месца. Крыху ніжэй у рэйтынгу грамадазнаўчы, хімічны і інфарматыка-матэматычны профілі.
А замыкае спіс гуманітарны клас (беларуская мова, гісторыя Беларусі) — «толькі» 2,7 чалавека на месца. Пры гэтым конкурс у філалагічны клас (руская, замежная мовы) у разы вышэйшы: 8+ чалавек.
Летась конкурс у матэматычны і фізічны класы быў значна меншы — 5,17 і 4,40 чалавека адпаведна, а ў лідарах попыту быў інфарматыка-матэматычны клас (8,53).
А найбольш анамальным быў 2021 год. Конкурс у матэматычны клас тады перавысіў 41 (!) чалавек на месца, у фізічны — 26, у інфарматыка-матэматычны — 21, гуманітарны — 18.
Але нават пры такіх паказчыках лідараў сярэдні конкурс быў крыху ніжэйшы, чым у гэтым годзе — 8,56 чалавека. А агульная колькасць абітурыентаў была на 3% ніжэйшай.
Што падштурхнула конкурс у гэтым годзе? Першы адказ — скарачэнне колькасці ліцэяў. Апошнія наборы ў ліцэі №1 (у Серабранцы) і №2 (на Паўднёвым Захадзе) у Мінску прайшлі ў 2021 годзе, у 2023 годзе яны павінны спыніць працу.
Іншы фактар: з гэтага года выпускнікі Ліцэя БДУ (і яшчэ двух) пры ўмове выдатнай паспяховасці змогуць паступаць у свае ВНУ без іспытаў. Праўда, крыніцы ў самім Ліцэі мяркуюць, што наўрад ці гэта фактар прыцягнення. Маўляў, амаль палова выпускнікоў Ліцэя паступае ў замежныя ВНУ, і БДУ для іх не такая ўжо вабная мэта.
Трэці: права абітурыентаў сёлета падаваць заявы адразу на два напрамкі. У гэтым выпадку абедзве заявы ўлічваюцца ў конкурсе. У якасці эксперыменту ўпершыню такое права (здаецца, можна было выбраць нават больш за два профілі) было дадзенае абітурыентам у 2021 годзе. Імаверна, яно тады і ўзняла конкурс да нябёсаў.
У 2022-м накал знізіўся праз тое, што Ліцэй БДУ страціў права праводзіць уступныя экзамены самастойна і раней, чым іншыя ліцэі. Калі раней школьнікі маглі беспраблемна выкарыстоўваць пробную спробу, а пры няўдачы падацца ў іншы ліцэй, то цяпер правал пагражае непаступленнем ні ў які.
Пракурорскі начальнік абурыўся неабгрунтаванымі затрыманнямі беларусаў8
Каментары