U licejach hetymi dniami prachodziać ustupnyja vyprabavańni. U najmacniejšym ź ich, Licei BDU, sioleta rekordna vysoki konkurs — u siarednim 9 čałaviek na miesca.
Na 264 miescy pretendujuć 2072 abituryjenty, ź ich 34 — biez ekzamienaŭ. Pry hetym samaja vysokaja kankurencyja sioleta za prava vučycca ŭ matematyčnym kłasie: bolš za 15 čałaviek na miesca, jak zaŭvažyŭ Dev.by.
Krychu sastupaje matematycy fizika: 14 čałaviek na miesca. Krychu nižej u rejtynhu hramadaznaŭčy, chimičny i infarmatyka-matematyčny profili.
A zamykaje śpis humanitarny kłas (biełaruskaja mova, historyja Biełarusi) — «tolki» 2,7 čałavieka na miesca. Pry hetym konkurs u fiłałahičny kłas (ruskaja, zamiežnaja movy) u razy vyšejšy: 8+ čałaviek.
Letaś konkurs u matematyčny i fizičny kłasy byŭ značna mienšy — 5,17 i 4,40 čałavieka adpaviedna, a ŭ lidarach popytu byŭ infarmatyka-matematyčny kłas (8,53).
A najbolš anamalnym byŭ 2021 hod. Konkurs u matematyčny kłas tady pieravysiŭ 41 (!) čałaviek na miesca, u fizičny — 26, u infarmatyka-matematyčny — 21, humanitarny — 18.
Ale navat pry takich pakazčykach lidaraŭ siaredni konkurs byŭ krychu nižejšy, čym u hetym hodzie — 8,56 čałavieka. A ahulnaja kolkaść abituryjentaŭ była na 3% nižejšaj.
Što padšturchnuła konkurs u hetym hodzie? Pieršy adkaz — skaračeńnie kolkaści licejaŭ. Apošnija nabory ŭ licei №1 (u Sierabrancy) i №2 (na Paŭdniovym Zachadzie) u Minsku prajšli ŭ 2021 hodzie, u 2023 hodzie jany pavinny spynić pracu.
Inšy faktar: z hetaha hoda vypuskniki Liceja BDU (i jašče dvuch) pry ŭmovie vydatnaj paśpiachovaści zmohuć pastupać u svaje VNU bieź ispytaŭ. Praŭda, krynicy ŭ samim Licei miarkujuć, što naŭrad ci heta faktar pryciahnieńnia. Maŭlaŭ, amal pałova vypusknikoŭ Liceja pastupaje ŭ zamiežnyja VNU, i BDU dla ich nie takaja ŭžo vabnaja meta.
Treci: prava abituryjentaŭ sioleta padavać zajavy adrazu na dva napramki. U hetym vypadku abiedźvie zajavy ŭličvajucca ŭ konkursie. U jakaści ekśpierymientu ŭpieršyniu takoje prava (zdajecca, možna było vybrać navat bolš za dva profili) było dadzienaje abituryjentam u 2021 hodzie. Imavierna, jano tady i ŭźniała konkurs da niabiosaŭ.
U 2022-m nakał źniziŭsia praz toje, što Licej BDU straciŭ prava pravodzić ustupnyja ekzamieny samastojna i raniej, čym inšyja licei. Kali raniej školniki mahli biesprablemna vykarystoŭvać probnuju sprobu, a pry niaŭdačy padacca ŭ inšy licej, to ciapier pravał pahražaje niepastupleńniem ni ŭ jaki.
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary