Мінск увайшоў у тройку самых крыміналізаваных гарадоў Усходняй Еўропы
Аналітычны сэрвіс Numbeo склаў рэйтынг найбольш крыміналізаваных гарадоў Усходняй Еўропы. Вынікі аказаліся даволі нечаканымі.
Усяго ў рэйтынг увайшлі 30 гарадоў, а ўзначалілі яго два ўкраінскія населеныя пункты — Дняпро і Адэса, а следам за імі, на трэцім месцы, ідзе наш Мінск.
Больш беларускіх гарадоў у гэтым рэйтынгу няма, а з украінскіх прысутнічаюць яшчэ тры — Харкаў (5-е месца), Кіеў (8-е) і Львоў (13-е).
З расійскіх гарадоў у яго ўвайшлі геаграфічна азіяцкі Навасібірск (7-е месца), Санкт-Пецярбург (12-е), Масква (14-е) і Ніжні Ноўгарад (22-е).
З польскіх гарадоў найбольшыя праблемы ў Лодзі (11-е месца), пасля ідуць Гданьск (17-е), Познань (19-е), Уроцлаў (22-е), Кракаў (24-е) і Варшава (26-е).
Гарады краін Балтыі ў 30-ку па версіі Numbeo не патрапілі, а сталіца Малдовы Кішынёў займае 9-е месца.
Праўда, не варта да гэтага рэйтынгу ставіцца надта сур'ёзна, улічваючы даволі сумнеўную метадалогію яго складання. База даных Numbeo збірае даныя для некалькіх рэйтынгаў гарадоў па наступных паказчыках: індэкс кошту жыцця, цэны на нерухомасць, бяспека, ахова здароўя, дарожны рух, узровень забруджвання і г.д. Пры зборы даных за аснову прымаюцца ацэнкі карыстальнікаў платформы.
У выпадку з рэйтынгам крымінальных гарадоў у карыстальнікаў просяць адказаць на пытанне аб узроўні злачыннасці і бяспекі ў іх гарадах. На аснове гэтых адказаў і фарміруецца рэйтынг, то-бок ён вельмі суб'ектыўны.
Дастаткова сказаць, што па выніках мінулага года Мінск увогуле займаў 1-е месца.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары