«Я прыехала ў 4:50 і была ў чарзе 77-я». Як рыэлтарка набывала для сяброўкі кватэру ў элітным ЖК Мінска
Навінамі пра тое, што беларусы дзяжураць начамі пад офісам дзяржаўных забудоўшчыкаў, каб мець магчымасць адносна танна пабудаваць кватэру, наўрад ці каго здзівіш. А вось начная чарга па элітную нерухомасць — нешта новае.
Пра квэст з набыццём нерухомасці ў Мінску расказала ў тыктоку блогерка пад нікам @realtoranainara. Гэта рыэлтарка, якая пераехала з Рыгі ў Мінск. У беларускай сталіцы жанчына таксама працуе па спецыяльнасці.
Яна расказала ў роліку, што кватэру ў ЖК «Паўночны бераг» яе папрасіла па даверанасці набыць сяброўка, якая жыве ў Германіі.
— Я прыехала да офіса продажаў у 4:50, а тут ужо чарга. Я ў чарзе 77-я. Уяўляеце? Офіс адчыніцца а 9-й раніцы. Мабыць, да гэтага моманту кватэры скончацца. Некаторыя ўжо спяць у машынах — запісаліся і адпачываюць. Вось так у Мінску кватэры прадаюць — трэба за трое сутак стаць у чаргу і, можа быць, атрымаецца купіць.
19.09.2024. квест "купить квартиру в Северном береге, Минск.
У наступным відэа жанчына распавяла, што яна выйшла з офіса продажаў у 12:47. У яе атрымалася зарэзерваваць для сяброўкі двухпакаёвую кватэру плошчай 50 квадратаў. Адзін метр каштаваў прыкладна 1470 еўра.
— Тыя, хто кажа, што ў Мінску ў асноўным купляюць кватэры замежнікі, — не, няпраўда. І нават не перакупшчыкі. Была вялікая чарга, ледзь да бойкі не дайшло.
Рыэлтарка дзеліцца, як арганізавана чарга. Былі ініцыятыўныя людзі, якія з панядзелка дзяжурылі пад офісам продажаў і склалі нейкія свае спісы. Старт продажаў быў у чацвер, 19 верасня — у гэты дзень і прыехала рыэлтарка. Зразумела, што не ўсе людзі тры дні не адыходзілі ад офіса.
— Тыя, хто прыйшоў зранку, і пачуў: «Вы васьмідзясятыя ў чарзе», — сказалі: «Ідзіце вы… са сваімі чэргамі. Вось я прыйшоў, бачу перад сабой дзесяць чалавек і станаўлюся адзінаццатым, астатняе мяне не хвалюе». Галоўнае — трапіць ва ўнутр. Запускаюць па 10 чалавек у офіс.
Жанчына сказала, што ўжо ўнутры супрацоўнікі офіса продажаў складаюць свае спісы, а спісы энтузіястаў на вуліцы яна назвала самадзейнасцю.
— Усім, каго гэта цікавіць: на будучыню не ўлічвайце ўсе гэтыя самадзейныя спісы. Пажадана мець кантакт з нейкім канкрэтным менеджарам. Таму што як мы тут паглядзелі, людзей, у якіх не было запісу да канкрэтнага менеджара і чый кантакт не быў зарэгістраваны ва ўнутранай сістэме «Паўночнага берага», абслугоўвалі ў апошнюю чаргу. Умоўна, 100 чалавек зайшло, усе зарэгістраваліся па сваім імені і кантактным нумары. Менеджар глядзіць, што з гэтага спісу 10 чалавек — ягоныя кліенты, і забірае іх да сябе.
19.09.2024.
Атрымалася, што тыя, хто не кантактаваў раней з менеджарамі, аказаліся ў чарзе апошнімі — нават калі пад офісам стаялі з панядзелка. Шмат людзей засталіся незадаволенымі такой сістэмай.
— Найбольшай папулярнасцю карыстаюцца кватэры невялікай плошчы — так званыя еўрастудыі ці еўрадвушкі. На іх быў самы вялікі ажыятаж. Шмат людзей пайшло расчараванымі, бо калі ў мінулым доме такія кватэры каштавалі 50-60 тысяч еўра, то цяпер каля 75 тысяч еўра плюс-мінус некалькі тысяч (у залежнасці ад паверха).
Рыэлтарка раіць тым, хто ў будучыні плануе набываць невялікую кватэру (бо вялікія, хутчэй за ўсё, можна набыць амаль у любы момант), быць маральна гатовымі фізічна адстойваць сваю чаргу.
— Нам да бойкі сапраўды не хапіла крыху. Людзі смяяліся, што вось мы зараз паб'ёмся, а потым будзем суседзямі, будзем згадваць, як мы змагаліся за кватэры. Усё скончылася пазітыўна.
У Мінску прадаюць 8-пакаёвую кватэру. Колькі просяць?
Вельмі рэдкая прапанова. Прадаецца кватэра ў доме, дзе жыў Машэраў — у самым цэнтры Мінска
Беларускія суды перасталі пасля продажу кватэры выпісваць людзей, якія за мяжой? Вось што вядома
Да $1900: паглядзелі, якія кватэры прапануюць у арэнду студэнтам у Мінску напярэдадні навучальнага года
«Пра сустрэчу Луку заўсёды прасілі перадаць Пуціну». Шустэр расказаў, як Лукашэнка прапаноўваў свае паслугі амерыканцам9
Каментары