Смерць 15-гадовага сына беларускі, якая магла быць выкліканая булінгам у школе, дзе ён вучыўся, ускалыхнула ўсю Італію. Выпадак атрымаў вялікі рэзананс: тэма не сходзіць са старонак мясцовых газет, у грамадстве пачалося шырокае абмеркаванне праблемы падлеткавага цкавання, піша «Беларусь і свет».
Трагедыя адбылася ўвечары ў нядзелю 13 кастрычніка ў камуне Сенігалія, у вобласці Марке.
Паводле звестак СМІ, навучэнец Інстытута гатэльнага абслугоўвання імя Панцыні Леанарда К., які скардзіўся напярэдадні на здзекі з боку некаторых аднакласнікаў, дастаў з сейфа бацькі, які служыць у паліцыі, табельны пісталет, пайшоў з дому і застрэліўся.
У той фатальны вечар тата хлопчыка думаў, што сын спусціўся ўніз пагуляць на прыстаўцы. Аднак, відаць, знаходзячыся ў прыгнечаным стане, той пакапаўся ў звязцы бацькавых ключоў, знайшоў ключ ад сейфа, дзе тата захоўваў службовую зброю, і пакінуў дом.
Пабачыўшы, што Леанарда няма, бацька падняў трывогу, патэлефанаваў маме хлопчыка, і тут жа пачалася пошукавая аперацыя. Жанчына ў тым ліку расказала паліцэйскім, што трое аднакласнікаў сына — двое хлопцаў і дзяўчына — зневажалі яго.
Пошукі прынеслі сумную навіну. Неўзабаве пасля 11.00 хлопчыка знайшлі мёртвым каля асобна стаячага вясковага дома ў раёне Мантыньяна, за два кіламетры ад таго месца, дзе ён жыў разам з бацькам.
Як пішуць СМІ, бацькі Леанарда жылі ўжо асобна, але знаходзіліся ў добрых адносінах і абодва бралі належны ўдзел у выхаванні сына. Бацька служыць у дарожнай паліцыі Сенігаліі, ён на добрым рахунку. Мама — бухгалтар па адукацыі, яна родам з Мінска і даўно жыве ў Італіі.
Іх дзіця зусім нядаўна стала вучыцца ў Інстытуце гатэльнага абслугоўвання імя Панцыні. І, як кажуць бацька і маці, у апошнія дні ён пачаў скардзіцца на булінг, а таксама паведаміў, што настаўнікі ў школе не робяць ніякіх захадаў.
Мама таксама адзначыла, што прапаноўвала сыну звярнуцца ў праваахоўныя органы, але ён адмовіўся, бо спадзяваўся, што сітуацыя вырашыцца без умяшання паліцыі, што ён проста пагаворыць з тымі аднакласнікамі.
Паводле інфармацыі шэрагу СМІ, якраз у панядзелак павінна была адбыцца сустрэча бацькоў Леанарда і адміністрацыі школы, на якой магло б быць вырашана пытанне аб пераходзе хлопчыка ў іншую адукацыйную ўстанову.
Паліцыя завяла па факце гібелі 15-гадовага школьніка крымінальную справу аб давядзенні да самагубства ў дачыненні да неўстаноўленых асоб, вядзецца расследаванне. Менавіта следчыя павінны высветліць, ці стала прычынай гібелі хлопчыка цкаванне, ці мела месца бяздзейнасць настаўнікаў і гэтак далей.
Тым часам выпадак са смерцю навучэнца прыцягнуў вялікую ўвагу газет, тэлеканалаў і грамадскасці. Пра яго выказаўся ў тым ліку міністр адукацыі, даручыўшы правесці адпаведныя праверкі.
Дыскусія па праблеме булінгу набыла нацыянальны маштаб. Людзі выказваюць спачуванне родным Леанарда, а таксама абмяркоўваюць, як абараніцца ад цкавання падлеткамі сваіх аднагодкаў, хто і як павінен своечасова рэагаваць на папярэджанне такой з'явы.
У Сенігаліі была абвешчаная агульнагарадская жалоба. На пахаванне хлопчыка прыйшла вялікая колькасць жыхароў і кіраўніцтва горада.
З чым звязаны рост колькасці дэпрэсій у дзяцей і моладзі?
Пяць галоўных памылак бацькоў у камунікацыі з падлеткамі
Чацвера білі, а трое здымалі на тэлефон. Дзяўчынка з-пад Мінска стала ахвярай булінгу
Публікацыя відэа са сцэнай збівання салігорскага сямікласніка выклікала рэзананс і прыцягнула ўвагу да праблемы
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку31
Каментары