U Italii zahinuŭ 15-hadovy syn biełaruski. Mahčyma, heta praz bulinh

Trahiedyja adbyłasia ŭviečary ŭ niadzielu 13 kastryčnika ŭ kamunie Sienihalija, u vobłaści Markie.

Pavodle źviestak ŚMI, navučeniec Instytuta hatelnaha absłuhoŭvańnia imia Pancyni Leanarda K., jaki skardziŭsia napiaredadni na ździeki z boku niekatorych adnakłaśnikaŭ, dastaŭ ź siejfa baćki, jaki słužyć u palicyi, tabielny pistalet, pajšoŭ z domu i zastreliŭsia.

U toj fatalny viečar tata chłopčyka dumaŭ, što syn spuściŭsia ŭniz pahulać na prystaŭcy. Adnak, vidać, znachodziačysia ŭ pryhniečanym stanie, toj pakapaŭsia ŭ źviazcy baćkavych klučoŭ, znajšoŭ kluč ad siejfa, dzie tata zachoŭvaŭ słužbovuju zbroju, i pakinuŭ dom.

Pabačyŭšy, što Leanarda niama, baćka padniaŭ tryvohu, patelefanavaŭ mamie chłopčyka, i tut ža pačałasia pošukavaja apieracyja. Žančyna ŭ tym liku raskazała palicejskim, što troje adnakłaśnikaŭ syna — dvoje chłopcaŭ i dziaŭčyna — źnievažali jaho.

Pošuki prynieśli sumnuju navinu. Nieŭzabavie paśla 11.00 chłopčyka znajšli miortvym kala asobna stajačaha viaskovaha doma ŭ rajonie Mantyńjana, za dva kiłamietry ad taho miesca, dzie jon žyŭ razam z baćkam.

Jak pišuć ŚMI, baćki Leanarda žyli ŭžo asobna, ale znachodzilisia ŭ dobrych adnosinach i abodva brali naležny ŭdzieł u vychavańni syna. Baćka słužyć u darožnaj palicyi Sienihalii, jon na dobrym rachunku. Mama — buchhałtar pa adukacyi, jana rodam ź Minska i daŭno žyvie ŭ Italii.

Ich dzicia zusim niadaŭna stała vučycca ŭ Instytucie hatelnaha absłuhoŭvańnia imia Pancyni. I, jak kažuć baćka i maci, u apošnija dni jon pačaŭ skardzicca na bulinh, a taksama paviedamiŭ, što nastaŭniki ŭ škole nie robiać nijakich zachadaŭ.

Mama taksama adznačyła, što prapanoŭvała synu źviarnucca ŭ pravaachoŭnyja orhany, ale jon admoviŭsia, bo spadziavaŭsia, što situacyja vyrašycca biez umiašańnia palicyi, što jon prosta pahavoryć z tymi adnakłaśnikami.

Pavodle infarmacyi šerahu ŚMI, jakraz u paniadziełak pavinna była adbycca sustreča baćkoŭ Leanarda i administracyi škoły, na jakoj mahło b być vyrašana pytańnie ab pierachodzie chłopčyka ŭ inšuju adukacyjnuju ŭstanovu.

Palicyja zaviała pa fakcie hibieli 15-hadovaha školnika kryminalnuju spravu ab daviadzieńni da samahubstva ŭ dačynieńni da nieŭstanoŭlenych asob, viadziecca rasśledavańnie. Mienavita śledčyja pavinny vyśvietlić, ci stała pryčynaj hibieli chłopčyka ckavańnie, ci mieła miesca biaździejnaść nastaŭnikaŭ i hetak dalej.

Tym časam vypadak sa śmierciu navučenca pryciahnuŭ vialikuju ŭvahu haziet, telekanałaŭ i hramadskaści. Pra jaho vykazaŭsia ŭ tym liku ministr adukacyi, daručyŭšy pravieści adpaviednyja pravierki.

Dyskusija pa prablemie bulinhu nabyła nacyjanalny maštab. Ludzi vykazvajuć spačuvańnie rodnym Leanarda, a taksama abmiarkoŭvajuć, jak abaranicca ad ckavańnia padletkami svaich adnahodkaŭ, chto i jak pavinien svoječasova reahavać na papiaredžańnie takoj źjavy.

U Sienihalii była abvieščanaja ahulnaharadskaja žałoba. Na pachavańnie chłopčyka pryjšła vialikaja kolkaść žycharoŭ i kiraŭnictva horada.

• 0
• 0
• 1
• 3
• 2
• 47
• 3
• 0