Бабруйчане арганізавалі ў Расіі дзве наркалабараторыі, а ў судзе папрасіліся на вайну ва Украіне
Беларусы атрымалі па 16 гадоў калоніі строгага рэжыму і захацелі паслужыць у расейскім войску.
Жыхары Бабруйска Уладзіслаў і Антон атрымалі ў Расіі па 16 гадоў калоніі строгага рэжыму. Іх справу разглядаў Уладзімірскі абласны суд.
Беларусаў прызналі вінаватымі ў тым, што яны стварылі наркалабараторыі і выраблялі наркотыкі на продаж — гэта значыць у незаконнай вытворчасці і замаху на незаконны збыт наркатычных сродкаў, учыненых арганізаванай групай у асабліва буйным памеры і незаконным захоўванні прэкурсораў наркатычных сродкаў, піша «Магілёў-Анлайн».
Як вынікае з матэрыялаў справы, бабруйчане паехалі на заробкі ў Расію, а там завербаваліся ў арганізаваную злачынную групу, арганізатар і кіраўнік якой па справе праходзіць як «неўстаноўленая асоба». Маладыя людзі выконвалі даручэнні свайго куратара, якога, па іх словах, ні разу не бачылі — размаўлялі праз інтэрнэт.
За год такой камандзіроўкі бабруйчане паспелі стварыць дзве наркалабараторыі. Увесну мінулага года іх затрымалі супрацоўнікі ФСБ у вёсцы Нядзюрава Кіржацкага раёна, дзе на імя сястры аднаго з бабруйчан быў набыты двухпавярховы дом і зямельны ўчастак.
Следства ўстанавіла, што Уладзіслаў і Антон паспелі зварыць больш за 6 кг мефедрону, частку якога размясцілі ў схованках-закладках, а іншую захоўвалі дома. Акрамя гатовай прадукцыі, з незаконнага абароту канфіскавалі звыш 163 кг прэкурсораў наркатычных рэчываў і больш за тону розных рэактываў.
Сваю віну бабруйчане цалкам прызналі. Вызначаючы памер пакарання, суд улічваў асобы беларусаў. У прыватнасці, абодва раней не судзімыя, нават да адміністрацыйнай адказнасці не прыцягваліся, па месцы жыхарства і па ранейшых месцах працы характарызуюцца станоўча.
Абвінавачаныя прадставілі ў суд нават граматы за ўдзел у школьных і спартыўных конкурсах і грамадскім жыцці. Акрамя таго, Уладзіслаў паведаміў, што аказваў матэрыяльную дапамогу Бабруйскаму дзіцячаму дому.
Больш за тое — у судзе беларусы папрасіліся ў расійскую армію на вайну ва Украіне. У прысудзе пазначана, што суд улічыў «прынясенне выбачэнняў перад грамадствам за прычыненую шкоду і намер удзельнічаць у якасці добраахвотнікаў у складзе Узброеных сіл Расійскай Федэрацыі ў зоне правядзення спецыяльнай вайсковай аперацыі».
Далейшы лёс бабруйчан невядомы. Пра Вячаслава ў судовых картатэках наогул няма звестак, Антон жа абскардзіў прысуд у апеляцыйным парадку, а затым і ў касацыйным. У верасні яго скарга паступіла ў Другі касацыйны суд агульнай юрысдыкцыі. Магчыма, яна яшчэ не разгледжаная. Ці паехалі беларусы на вайну, невядома.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары