Кітайскія навукоўцы абвясцілі аб стварэнні зброі з «Зорных войнаў»
Новая тэхналогія «ўльтрадакладнай часовай сінхранізацыі» дазваляе ствараць імпульсы мікрахвалевага выпраменьвання, якія выводзяць з ладу спадарожнікі і навігацыйныя сістэмы.
Як піша South China Morning Post, кітайскія навукоўцы заявілі аб стварэнні канвергентнай энергетычнай прамянёвай зброі. Канцэпцыя нагадвае Зорку Смерці з «Зорных войнаў»: для разбурэння планеты велізарная касмічная станцыя павінна была аб’яднаць восем лазерных прамянёў у адзін.
Аднак у рэальнасці дасягнуць такой дакладнасці складана, бо электрамагнітныя хвалі, якія ідуць з розных платформаў, павінны прыбыць у адзін пункт адначасова і ў патрэбнай форме для эфектыўнага аб’яднання энергіі.
Па разліках навукоўцаў, каб стварыць такі прамень, электрамагнітныя імпульсы павінны дасягаць аднаго пункта з дакладнасцю да 170 трыльённых частак секунды. Гэта патрабуе найвышэйшай сінхранізацыі, якая пераўзыходзіць дакладнасць атамнага гадзінніка.
Кітайскія даследчыкі сцвярджаюць, што здолелі дасягнуць патрэбнага ўзроўню, выкарыстоўваючы прарыўныя тэхналогіі «ўльтрадакладнай часовай сінхранізацыі» і злучыўшы сем установак з дапамогай аптавалаконных злучэнняў. Выпрабаванні сістэмы адбыліся летась у заходнім Кітаі, дзе навукоўцы змаглі сінхранізаваць час з дакладнасцю да 10 трыльённых частак секунды на адлегласці 1800 кіламетраў.
Для дакладнага навядзення на цэль ва ўстаноўцы выкарыстоўваюцца лазерныя прылады, якія забяспечваюць навігацыю з дакладнасцю да міліметра. Спецыяльны камандны цэнтр аналізуе дадзеныя аб часе і месцы знаходжання цэлі, пасля чаго пасылае каманду на адначасовае ўключэнне ўсіх сямі ўстановак.
Навукоўцы адзначаюць, што аб’яднаная магутнасць імпульсаў дасягае эфекту «1+1>2», што робіць гэтую зброю больш магутнай, чым стандартныя мікрахвалевыя сістэмы.
Хоць магутнасць новай кітайскай мікрахвалевай зброі непараўнальная з разбуральнай сілай Зоркі Смерці, эксперыменты пацвердзілі, што прылада можа эфектыўна падаўляць GPS-сігналы спадарожнікаў і вырашаць вайсковыя задачы.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было57
Каментары